އައްޑޫސިޓީއިން ޕޮޒިޓިވް ކޯވިޑްއަށްް ޕޮޒިޓިވް ކޭސްތަކެއް ފެނުމާއި ގުޅިގެން މުޅި އައްޑޫސިޓީ އެއްކޮށް މޮނީޓަރިން ހާލަތަށް ގެނެސްފިއެވެ.
އައްޑޫސިޓީ މޮނިޓަރިންއަށް ލާފައިވާކަން އެޗްޕިއޭއިން އައްޑޫސިޓީ ކައުންސިލަށް އަންގާފައިވަނީ، އައްޑޫސިޓީ ހިތަދޫއިން ރަށުތެރޭގައި އުޅުނު ދެމީހަކު ފްލޫ ކްލިނިކަށް ދައްކައި ޕޮޒިޓިވް ވުމާއެކުއެވެ. މިކަމާއި ގުޅިގެން އައްޑޫގެ ހުރިހާ އަވަށެއް ހިމެނޭ ގޮތަށް މޮނިޓަރިން އަށް ވަނީ ލާފައެވެ.
މިވަގުތު އައްޑޫގެ ދެ ސަރަހައްދަކުން ޕޮޒިޓިވް ކޭސްތައް ވަނީ ފެނިފައެވެ. އެގޮތުން އެންމެ ފުރަތަމަ މިހަފްތާ ތެރޭގައި އައްޑޫސިޓީ ހުޅުދޫ-މީދޫއިން އެމްޓީސީސީ ސައިޓުގައި ތިބި ބަޔަކު ވަނީ ޕޮޒިޓިވް ވެފައެވެ. އަދި އެމީހުންގެ ތެރެއިން ނެގި ސާމްޕަލްތަކުން މިހާތަނަށް 24 މީހަކު ވަނީ ޕޮޒިޓިވްވެފައެވެ. މީގެ އިތުރުން މިއަދު ހިތަދޫ އިން އިތުރު ދެ މީހަކު ޕޮޒިޓިވްވުމާއެކު މުޅި ޖުމްލަ 26 މީހަކު މިހާތަނަށް ވަނީ ޕޮޒިޓިވް ވެފައެވެ.
އައްޑޫސިޓީ މޮނިޓަރިން ހާލަތަށް ލުމަށް ފަހު ކޮންޓެކްޓް ޓްރޭސިން މަސައްކަތް މިހާރު ދަނީ ކުރެވެމުންނެވެ. އެގޮތުން މިއަދު ހުޅުދޫ-މީދޫގައި ރަށު ތެރެއިން ރެންޑަމް ސާމްޕަލް ނެގުމުގެ މަސައްކަތް ވަނީ ކުރިއަށް ގެންގޮސްފައެވެ.
އެޗްއީއޯސީން ވިދާޅުވި ގޮތުގައި، އައްޑޫ މޮނިޓަރިންއަށް ލީ ނަމަވެސް، އައްޑޫގެ އެތެރޭގެ އަވަށްތަކުގެ ދަތުރުފަތުރު ކުރެވޭނެ ކަމަށެވެ. އެގޮތުން އައްޑޫގެ ގުޅިފައިވާ ރަށްތަކުގައި ދަތުރު ކުރުމަށް ހުރަހެއް ނެތެވެ. ނަމަވެސް އެޗްޕީއޭއިން ވަކިގޮތެއް އަންގަންދެން އައްޑޫއިން އެހެން ސަރަހައްދުތަކަށް ދިއުމާއި އައުން ވަނީ މަނާކޮށްފައެވެ.
ފަހަކަށް އައިސް ކަރަންޓީންގައި ތިބޭ މީހުން ނޫން މީހުން އަތޮޅުތަކުން ކޯވިޑް19އަށް ޕޮޒިޓިވްވަމުންދާކަން ވަނީ ފާހަގަވެފައެވެ. އެގޮތުން މިހާރުވެސް އައްޑޫ ސިޓީ ހުޅުމީދޫއާއި ހިތަދޫގެ އިތުރުން، 4 ރަށެއް އޮތީ މޮނިޓަރިންގައެވެ. އެޗްޕީއޭއިން މަޢުލޫމާތުދޭ ގޮތުގައި މިހާތަނަށް ރާއްޖޭގެ 41 ރަށަކުން ކޯވިޑް 19ގެ އެކްޓިވް ކޭސްތައް ފެނިފައިވެއެވެ. މީގެތެރޭގައި ބޮޑެތި ކްލަސްޓަރތައް އުފެދުނު ރަށްތައްވެސް ހިމެނެއެވެ.