އޭވިއޭޝަން ސެކިއުރިޓި ކޮމާންޑް، އޭވްސްކޮމްގެ މުވައްޒަފުން އައްޑޫއަށް ދިޔައީ ޕީސީއާރު ޓެސްޓްހަދާ ނެގެޓިވް ނަތީޖާ ލިބުމުން ކަމަށް، އޭވްސްކޮމްއިން ބުނެފިއެވެ.
އޭވިއޭޝަން ސެކިއުރިޓީ ކޮމާންޑުން މިހެން ބުނެފައިވަނީ، މިދިޔަ ހަފްތާ ތެރޭގައި އެކޮމާންޑުން އައްޑޫ ސިޓީ ގަމުގައި ބޭއްވި ޓްރެއިނިންގް އަށް ދިޔަ ދެ މުވައްޒަފަކު ޕޮޒިޓިވްވެ އެމީހުންގެ ފުށުން ކޯވިޑް-19 ސިޓީ އަށް ފެތުރިގެން ދިޔަ ކަމަށް ތުޙުމަތުކޮށް ބައެއް މީޑިއާތަކުގައި ޚަބަރު ފަތުރަމުންދަނިކޮށެވެ. އައްޑޫސިޓީގެ މޭޔަރ އަބްދުﷲ ސޯދިޤްވެސް ބައެއް މީޑިއާތަކަށް މަޢުލޫމާތު ދެއްވަމުން ވިދާޅުވެފައިވަނީ މި ބަލި ފެތުރިފައިވަނީ ޚާއްސަ ހުއްދައިގެ ދަށުން ދިޔަ ފަރާތެއްގެ ފުށުން ކަމަށެވެ.
މިކަމާ ގުޅިގެން އޭވިއޭޝަން ސެކިއުރިޓީ ކޮމާންޑުން ނެެރެފައިވާ ނޫސްބަޔާނުގައި ބުނެފައިވަނީ، އޭވްސްކޮމް ޓްރެއިނިންގް ޔުނިޓުގެ ދެ މުވައްޒަފުން އައްޑޫ އަށް ދިޔައީ، ފެބްރުއަރީ މަހުގެ ދެވަނަ ދުވަހު ކަމަށެވެ. އަދި އެ މުވައްޒަފުން އައްޑޫއަށް ދިޔައީ އެޗްޕީއޭގެ ގައިޑްލައިން ތަކާއި އެއްގޮތަށް ޕީސީއާރު ޓެސްޓު ހަދާ ނެގެޓިވް ނަތީޖާ ލިބުމުން ކަމަށެވެ. އަދި ބަލި ފެތުރިފައިވަނީ، އޭވްސްކޮމްގެ މުވައްޒަފުންގެ ސަބަބުން ކަމަށް ދޭހަވާ ގޮތަށް ޚަބަރު ފަތުރާފައިވަނީ، ޒިންމާދާރުކަން ކުޑަ ގޮތަކަށް ކަމަށް އެ ފަރާތުން ވަނީ ބުނެފައެވެ.
އެފަރާތުން ނެރުނު ނޫސްބަޔާނުގައި އިތުރަށް ބުނެފައިވަނީ އޭވިއޭޝަން ދާއިރާގައި މަސައްކަތް ކުރާ މުވައްޒަފުންނަކީ ޤަވާއިދުން ޓްރެއިނިންގް ތަކެއް ފުރިހަމަ ކުރަން ޖެހޭ މުވައްޒަފުން ތަކަކަށްވުމުން ކޮންމެހެން ހަދަން ޖެހޭ ޓްރެއިނިންގްތައް ފުރިހަމަ ކުރުމަށް މަސައްކަތް ކުރަނީ ޒިންމާދާރު ކަމާއިއެކު، އެޗްޕީއޭއިން ކަނޑައަޅާފައިވާ ގައިޑްލައިންތާކައި އެއްގޮތަށް ކަމަށެވެ. އަދި މިގޮތަށް ޚަބަރު ފަތުރާއިރު އޭވްސްކޮމްގެ ބަހެއް ނުހޯދާ އެ މުވައްސަސާ ބަދުނާމުވާ ގޮތަށް ޚަބަރު ފަތުރާ، ކަން ހިނގި ގޮތަށް ރިއާޔަތް ނުކޮށް، ޚަބަރު ޝާއިއު ކުރުމަކީ ޒިންމާދަރުކަން ކުޑަ އަމަލެއް ގޮތުގައި އެ ފަރާތުން ވަނީ ސިފަކޮށްފައެވެ. މޭޔަރއާއި ހަލާވާދީ މިކަމާ ގުޅޭ ޚަބަރު ގެނެސްދިންއިރުވެސް އޭވްސްކޮމްގެ ބަހެއް ހޯދާފައި ނުވާކަމަށް އެމުވައްސަސާއިން ބުނެއެވެ.
އައްޑޫ ސިޓީގައި ކޯވިޑްގެ ކޭސްތައް ފެންނަން ފެށީ ހިތަދޫގައި ހުންނަ ފްލޫ ކްލިނިކަށް ދެއްކި މީހަކު އިއްޔެގެ ވަގުތެއްގައި ޕޮޒިޓިވް ވުމާއެކުއެވެ. އޭގެ ފަހުން ރޭ ދަންވަރު 12:00 ޖެހުމާއި ހަމައަށް ހިތަދޫ ކްލަސްޓަރ އާއި ގުޅުން ހުރި 4 މީހަކު އައްޑޫގެ ގުޅިފައިވާ ރައްތަކުން ވަނީ ޕޮޒިޓިވް ވެފައެވެ. މިކަމާއި ގުޅިގެން އެޗްޕީއޭއިންވަނީ މުޅި އައްޑޫސިޓީ މޮނީޓަރިން އަށް ލާފައެވެ. އަދި ކޮންޓެކްޓް ޓްރޭސިން މަސައްކަތްވެސް ދަނީ ކުރަމުންނެވެ.