އެމްއެމްޕީއާރްސީގެ ދައުވަތަކަށް މަޝްހޫރު ފްރީލާންސް ނޫސްވެރިޔާ ލީސާ ކަޖަލްސަން ރާއްޖެ އަތުވެއްޖެއެވެ.
މިއީ ބޭރުޤައުމުތަކުގައި ރާއްޖެ އިޝްތިހާރު ކުރުމަށް ކުރާ މަސައްކަތުގެ ދަށުން، ފެމް ޓްރިޕްތަކުގެ ގޮތުގައި ރާވާފައިވާ ދަތުރުތަކުގެ ތެރެއިން ދެވަނަ ދަތުރެވެ. އަދި މިއީ އިނގިރޭސިވިލާތަށް އަމާޒުކޮށް ކުރިއަށް ގެންދިޔަ ފުރަތަމަ ދަތުރެވެ. އެމްއެމްޕީއާރްސީން ވިދާޅުވީ، އިނގިރޭސި މާކެޓަށް އަމާޒުކޮށްގެން ރޭވި މިދަތުރުގެ މަޤްސަދަކީ ރާއްޖެއަކީ އިނގިރޭސިވިލާތުގެ ފަތުރުވެރިންނަށް ރައްކާތެރި ތަނެއްގެ ގޮތުގައި ދައްކައިދީ، ރާއްޖޭގައި ހުރި ތަފާތު ކަންކަން ދައްކައި ދިނުން ކަމަށެވެ.
ލީސާ އަކީ، ޓްރެވެލް ލައިފް ސްޓައިލް ބޮޑެތި ނޫސް މަޖައްލާތަކަށް ލިޔާ ނޫސްވެރިއެކެވެ. އޭނާގެ ލިޔުންތައް ޝާއިއު ކުރާ ތަންތަނުގެ ތެރޭގައި، ސްލީޕާ، ޓެޓްލާ، ވެސްޓް ލަންޑަން ލިވިންގް، ސިޓިޒަން ފޭމް އަދި ރޮބް ރިޕޯޓު ހިމެނެއެވެ. އޭނާ މި މަޖައްލާތަކަށް ލިޔާ ލިއުމެއް މިލިއަނަށްކަށް ވުރެ ގިނަ މީހުންނަށް ފޯރާނެ ކަމަށް އަންދާޒާ ކުރެވިފައިވާ ކަމަށް އެމްއެމްޕީއާރްސީން ބުނެއެވެ.
ލީސާގެ ދަތުރާއި ގުޅޭ ގޮތުން އެމްޕީއާރްސީން ބުނީ، އޭނާ ރާއްޖޭގައި ދެ ހަފްތާ ހޭދަ ކުރާނެ ކަމަށެވެ. އަދި ރާއްޖޭގެ 6 ރިސޯޓަކަށް އޭނާ ދިއުމަށް ވަނީ ހަމަޖެހިފައެވެ. އޭނާ ހުރުމަށް ހަމަޖެހިފައިވަނީ، ކުރަމަތި އައިލޭންޑް ރިސޯޓު، ދަ ނޯޓިލަސް މޯލްޑިވްސް، ފޯ ސީޒަން ލަނޑާގިރާވަރު، ކަގި މޯލްޑިވްސް އަދި ސިކްސެންސަސް ލާމުއެވެ. މިއިން ކޮންމެ ރިސޯޓެއްގައިވެސް ފަތުރުވެރިންނަ ހުންނަ ޚާއްސަ ކަންކަމާއި، އަދި އޭގެ އިތުރުން އަންޑަރ ވޯޓާ ޑައިނިން އާއި ކޮރަލް ކޮންޒަވޭޝަން އޭނާ ތަޖުރިބާ ކުރާނެއެވެ.
އެމްއެމްޕީއާރްސީން ބުނެފައިވަނީ ރާއްޖޭގެ ފަތުރުވެރިކަމަށް އިނގިރޭސިވިލާތުގެ މާކެޓަކީ މުހިންމު މާކެޓެއް ކަމަށެވެ. ޓުއަރިޒަމް މިނިސްޓްރީގެ ތަފާސް ހިސާބުތަށް ދައްކާގޮތުން އިނގިރޭސިވިލާތު މާކެޓަކީ މިދިޔަ އަހަރު ތިން ވަނައަށް އެންމެ ގިނަ މީހުން އައި މާކެޓެވެ. އެގޮތުން މިދިޔަ އަހަރު އެޤައުމުން 52،720 މީހުން އައިސްފައިވާއިރު، މިއަހަރު މިހާތަނަށް 2912 މީހުން އިނގިރޭސިވިލާތުން ރާއްޖެ އައިސްފިވެއެވެ.