އެގްރޯނެޓް ކޯޕަރޭޝަން އިން ކުރިއަށް ގެންދާ ކޮންޓްރެކްޓް ފާމިން މަޝްރޫއުގެ ތެރެއިން 4 ބާވަތެއް ލ. އަތޮޅުގައި ހައްދަން ފަށާފައިވާ ކަމަށް އެކުންފުނިން ބުނެފިއެވެ.
އެގްރޯނެޓް ކޯޕަރޭޝަނުން ޕީއެސްއެމް އަށް މައުލޫމާތު ދެއްވަމުން ވިދާޅުވީ، އެކުންފުނީގެ ކޮންޓްރެކްޓް ފާމިން މަޝްރޫއުގެ ދަށުން ހައްދަން ހަމަޖެހިފައިވާ 17 ބާވަތުގެ ތެރެއިން 4 ބާވަތެއް މިހާރު ހައްދަން ފަށާފައިވާ ކަމަށެވެ. އެގޮތުން މިހާރު ލ. އަތޮޅުގެ 13 ދަނޑުވެރިއަކު އެމަސައްކަތް ކުރަމުންދާ ކަމަށެވެ. އަދި ބާކީ ތިބި ދަނޑުވެރިންވެސް މުޑުވަތް ކުރުމަށް ތައްޔާރުވަމުންދާ ކަމަށް އެކުންފުނިން ހާމަކުރެއެވެ. އެގްރޯނެޓް ކުންފުނިން މައުލޫމާތު ދޭ ގޮތުގައި ލ. އަތޮޅުގައި ދަނޑުވެރިކަން ކުރުމަށް އެކުންފުންޏާއެކު 120 ދަނޑުވެރިން ވަނީ ސޮއިކޮށްފައެވެ. އަދިވެސް އިތުރު ދަނޑުވެރިންނަށް ބައިވެރިވެވޭނެ ކަމަށް އެކުންފުނިން ބުނެއެވެ.
އެކުންފުނިން މައުލޫމާތު ދިން ގޮތުގައި މިހާރު ހައްދަން ފަށާފައިވަނީ، ފަޅޯ، ބަށި، ހަނީ މެލަން އަދި ކިއުކަމްބާއެވެ. މި ބާވައްތައް ހައްދާ ދަނޑުބިންތަކުގައި 46،500 އަކަފޫޓު ހުންނާނެ ކަމަށް އެގްރޯނެޓުން ބުނެއެވެ.
އެގްރޯނެޓްގެ ކޮންޓްރެކްޓް ފާމިންގ މަޝްރޫއު މިދިޔަ އަހަރުގެ ޑިސެމްބަރު މަހު ލ.އަތޮޅުގައި ވަނީ ފަށާފައެވެ. އެގޮތުން މިމަޝްރޫޢު ކުރިއަށްގެންދިޔުމަށް އެގްރޯނެޓުން އެއްބަސްވުންތަކުގައި ސޮއިކޮށްފައިވަނީ ލ.ގަން، އިސްދޫ، ކަލައިދޫ، އަދި ފޮނަދޫގެ ދަނޑުވެރިންނާ އެކުއެވެ.
އެގްރޯ ނެޝަނަލް ކޯރޕަރޭޝަންގެ ފަރާތުން ކުރިއަށްގެންދާ ކޮންޓްރެކްޓް ފާމިންގގެ މި ޕްރޮޖެކްޓްގެ ދަށުން ރާއްޖޭގެ ރަށްރަށުގައި ހައްދާ ބާވަތްތަކަކީ އެކޯޕަރޭޝަނުން މާކެޓު ކުރުމުގައި އެހީތެރިވާނެ ބާވަތްތަކެވެ. މީގެ އިތުރުން މި ބާވަތްތައް ހެއްދުމަށް އެކުންފުނިން ދަނޑުވެރިންނަށް ފަންނީ އެހީ ތެރިކަން ފޯރުކޮށް ދިނުމަށްވެސް ވަނީ ހަމަޖެހިފައެވެ.