އައްޑޫސިޓީގައި ކޯވިޑް-19 އަށް ޕޮޒިޓިވްވި މީހުންގެ އަދަދު އިތުރުވެ، އާންމު ތަންތަނަށް އެއްވެ އުޅުން މަނާކޮށް ކެފޭ ރެސްޓޯރެންޓު ހުޅުވައިގެން ޚިދުމަތް ދިނުން މެދު ކަނޑާލައިފިއެވެ.
އައްޑޫސިޓީ މިވަގުތު މޮނީޓަރިން އަށް ލާފައިވާއިރު، އައްޑޫ ސިޓީ ކައުންސިލުން ކުރި އިއުލާނުގައި ބުނެފައިވަނީ، އައްޑޫގައި މިވަގުތު ކޮމިއުނިޓީ ސްޕްރެޑެއް އޮވެދާނެ ކަމަށް ލަފާ ކުރެވޭތީ އިއްޔެ ހަވީރު 4:00 އިން ފެށިގެން ފިޔަވަޅުތަކެއް އަޅަން ނިންމާފައިވާ ކަމަށެވެ.
އެގޮތުން ކެފޭ ރެސްޓޯރެންޓް ތަކުން ޑެލިވަރީގެ ޚިދުމަތާއި ޓޭކްއަވޭ ޚިދުމަތް އެކަނި ދިނުމަށް ވަނީ އަންގާފައެވެ. އަދި ގާޑިޔާ ތަކުން ޚިދުމަތް ދިނުން މެދު ކަނޑާލުމާއި އާންމު ވިޔަފާރި ކުރާތަންތަނުން އެއްފަހަރާ ކަނޑައެޅިފައިވާ އަދަދަށް ޚިދުމަތް ދިނުމަށް ވަނީ އަންގާފައެވެ. މީގެ އިތުރުން އާންމު މައިދާން ތަކާއި ތަންތަނަށް މީހުން އެއްވުން ސިޓީ ކައުންސިލުންވަނީ މަނާކޮށްފައެވެ.
އައްޑޫގައި ކޯވިޑް-19 ކޭސްތައް އިތުރުވަމުންދާކަން އެޗްޕީއޭއިންވެސް ވަނީ ހާމަކުރައްވާފައެވެ. އެގޮތުން އެޗްއީއޯސީން ވިދާޅުވި ކޭސްތަކާއި ގުޅުން ހުރި މީހުންނާ ކޮންޓެކްޓްވި 50އަށް ވުރެ ގިނަ ފަރާތްތައް ފާހަގަ ކުރެވިފައިވާ ކަމަށެވެ. ގަމުގައި ބޭއްވި އޭވިއޭޝަން ޓްރެއިނިންގްގެ ތެރެއިންވެސް ބަޔަކު ކޯވިޑް-19 އަށް ޕޮޒިޓިވް ވެފައިވާއިރު، މިހާރު އެ ކްލަސްޓަރގައި ޕޮޒިޓިވްވި މީހުންގެ އަދަދުވަނީ 18 އަށް އަރާފައެވެ.
މީގެ އިތުރުން ހުޅުމީދޫ އެމްޓީސީސީ ސައިޓުން 25 މީހަކު ވަނީ ޕޮޒިޓިވް ވެފައެވެ. ނަމަވެސް އެރަށުގައި ނެގި ރެންޑަމް ސާމްޕަލް ނަތީޖާތައް ވަނީ ނެގެޓިވްވެފައެވެ. މިކްލަސްޓަރގައި ޕޮޒިވްވެފައިވަނީ މުޅިންވެސް ބިދޭސީންނެވެ.
ޕީއެސްއެމްއަށް މައުލޫމާތު ދެއްވަމުން އައްޑޫސިޓީގެ މޭޔަރ އަބްދުﷲ ޞާދިޤް ވިދާޅުވީ، ކޮމިއުނިޓީ ސްޕްރެޑެއް އޮވެދާނެ ކަމަށް ވަރަށް ބޮޑަށް ބެލެވޭތީ މިވަގުތު ޒަރޫރީ ބޭނުންތަކަށް ނޫންގޮތަށް ބޭރަށް ދިއުން ރައްކާތެރި ނޫން ކަމަށެވެ. މީގެ އިތުރުން އައްޑޫގެ ގުޅިފައިވާ ރަށްތަކުގައިވެސް ޒަރޫރީ ނޫން ހާލަތެއްގައި ދަތުރު ކުރުން މަޑު ޖައްސާލާފައިވާ ކަމަށް މޭޔަރ ވިދާޅުވިއެވެ.
މޭޔަރ އިތުރަށް ވިދާޅުވީ، މިހާރު އިންތިޒާމުތައް ހަމަޖެހިފައިވާ ގޮތުން ސިއްޙީ ކަންކަން ކުރިއަށް ގެންދާނީ އެ އަވަށެއްގެ ސިއްޙީ މަރުކަޒު މެދުވެރިކޮށް ކަމަށެވެ. އައްޑޫ އިކުއިޓޯރިއަލް ހޮސްޕިޓަލުން ވެސް ވަނީ އެހޮސްޕިޓަލުގެ ސްޕެޝަލިސްޓް އޯޕީޑީ ބަންދުކޮށްފައެވެ.