މިއަހަރު އެންމެ ގިނަ ފަތުރުވެރިން އައީ އިއްޔެ

މިއަހަރު މިހާތަނަށް ރާއްޖެ އެންމެ ގިނަ ފަތުރުވެރިން އައިސްފައިވަނީ އިއްޔެކަމަށް ޓުއަރިޒަމް މިނިސްޓްރީން ހާމަކޮށްފިއެވެ.

ޓުއަރިޒަމް މިނިސްޓަރ އަބްދުﷲ މައުސޫމް ކުރެއްވި ޓްވީޓެއްގައި ވިދާޅުވީ، މިއަހަރު މިހާތަނަށް އެންމެ ގިނަ ފަތުރުވެރިން އައިސްފައިވަނީ އިއްޔެ ކަމަށާއި، އިއްޔެ ރާއްޖެއަށް 4700 އަށްވުރެ ގިނަ ފަތުރުވެރިން އައިސްފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވި ގޮތުގައި ޤައުމީ ފެންވަރުގައި ހިންގަމުންދާ ކޯވިޑް ދިފާޢު ވެކްސިން ޕްރޮގްރާމުގެ ސަބަބުން ފަތުރުވެރިކަން ރަނގަޅު މިސްރާބަކަށް ދާކަމަށެވެ.

#NewRecord
Yes New Record of Tourist arrivals for 2021 today with over 4,700 tourists. Thank you ALL for your contributions towards #Maldives tourism recovery. With nationwide #COVID19 vaccination in progress tourism outlook is very promising.@visitmaldives #VisitMaldivesNow

— Abdulla Mausoom (@Mausoom_Maus) February 12, 2021

ޓުއަރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ މިހާތަނަށް އެއް ލައްކަ ސައުވީސް ހާހަށްވުރެ ގިނަ ފަތުރުވެރިން ވަނީ ރާއްޖެ އައިސްފައިވެއެވެ. މީގެ ތެރެއިން ފެބްރުއަރީމަހު 30000 އަށް ވުރެ ގިނަ ފަތުރުވެރިން އައިސްފައިވާއިރު، މިދިޔަ މަހު، އެކަނިވެސް، 92103 ފަތުރުވެރިން ރާއްޖެ ވަނީ އައިސްފައެވެ.

ކޯވިޑް-19 އާއެކު ރާއްޖެ އަންނަމުންދާ ފަތުރުވެރިން އެހެން އަހަރުތަކާއި އަޅާ ބަލާއިރު މަދު ނަމަވެސް، ރައްޖޭގެ ފަތުރުވެރިކަމުގެ ދާއިރާ އިޔާދަ ވަމުން އަންނަ ކަމަށް ޓުއަރިޒަމް މިނިސްޓްރީން ބުނެއެވެ. މީގެ އިތުރުން ރާއްޖެއަކީ ރައްކާތެރި މަންޒިލެއްގެ ގޮތުގައި މާކެޓު ކުރުމަށް ގިނަ މަސައްކަތަކެއް ދަނީ ކުރެވެމުންނެވެ. އަދި މިދާއިރާގައި ހަރަކާތްތެރިވާ ފަރާތްތަކުގެ ރައްކާތެރިކަމަށް ބެލި ދާއިރާގެ ކުރީ ސަފުގައި ހަރަކާތްތެރިވާ ފަރާތްތަކަށް ވެކްސިން ދިނުމަށް ވެސް ވަނީ ފެށިފައެވެ.