އައްޑޫގެ ގުޅިފައިވާ ރަށްރަށުން ކޯވިޑް-19އަށް މީހުން ޓެސްޓުކުރުމަށްޓަކައި ރެންޑަމް ސާމްޕަލްތައް ނެގުމުގެ މަސައްކަތް ފަށައިފިއެވެ.
އައްޑޫގައި މިވަގުތު އެކްޓިވް ކޭސްތަކަށް ބަލާއިރު، އޭވިއޭޝަން ކްލަސްޓަރއިން ޕޮޒިޓިވްވި މީހުންގެ ޢަދަދު 34އަށް އަރައެވެ. އަދި ހުޅުމީދޫ އެމްޓިސީސީ ސައިޓުގައި 25 މީހެއް ޕޮޒިޓިވް ވެފަ އެބަތިއްބެވެ. މިކްލަސްޓަރ އިން އިތުރު ކޭސްއެއް ފެނިފައި ނުވެއެވެ. ހޯމް ކަރަންޓީނު ސާމްޕަލަކުން ޕޮޒިޓިވްވި މީހަކާއި އެކު ޖުމްލަ 60 ކޭސް މިވަގުތު އައްޑޫގައި އެކްޓިވް ކޭސްގެ ކޮށް އެބައޮތް ކަމަށް އައްޑޫ އިމަޖެންސީ އޮޕަރޭޝަންސް ސެންޓަރުން މައުލޫމާތު ދެއްވައެވެ.
އައްޑޫ އެމަޖެންސީ އޮޕަރޭޝަންސް ސެންޓަރުގައި ބޭއްވި ނޫސްވެރިންގެ ބައްދަލުވުމެއްގައި، އިކުއެޓޯރިއަލް ހޮސްޕިޓަލުގެ އެކްޓިން މެޑިކަލް ޑައިރެކްޓަރ ޑރ.ޢަބްދުﷲ އަދްސާރު ވިދާޅުވީ، މިއަދުން ފެށިގެން އެއް ހަފްތާ ވަންދެން ރެންޑަމް ސާމްޕަލް ނެގުމުގެ މަސައްކަތް ކުރިއަށް ގެންދާނެ ކަމަށެވެ.
" އެއް ހަފްތާ ވަންދެން ރެންޑަމް ސާމްޕަލް ނެގުމުގެ މަސައްކަތް ޕަބްލިކް ސެކްޓަރ އޭރިއާ ތަކުގައި އާއި، މަގުމަތީގައި ކުރިއަށް ދާނެ. އެއް ހަފްތާ ތެރޭ ނަތީޖާ ލިބޭ ގޮތުން އޭގެ ކުރިއަށް އިތުރަށް ގެންދާނެ ގޮތެއް ޑިސައިޑު ކުރާނީ. އެއީ ކޮންޓިނިއުސްކޮށް ޑިސައިޑު ކުރަމުން ކުރިއަށް ގެންދާކަމެއް. ރިކުއެސްޓް ކުރީމަ އެއްބާރުލުން ދީގެން ކުރިއަށް ގެންދެވުން އަޅުގަނޑުމެންގެ ރިކުއެސްޓަކީ. ސީދާ ވަކި ޢަދެދެއް އޮންނަ އެއްޗެއް ނޫން އެއީކީ." ޑރ.އަދްސަރު ވިދާޅުވިއެވެ.
އައްޑޫ އެމަޖެންސީ ސެންޓަރުން ވިދާޅުވީ މިކޭސްތަކާ ގުޅިގެން މިހާތަނަށް 182 ގެއެއް ކަރަންޓީނުކޮށްފައި ވާއިރު، 341 ޑައިރެކްޓް ކޮންޓެކްޓް ފެނިފައިވާކަމަށެވެ. މީގެ އިތުރުން ހައިރިސްކް މީހުންނާއި ޢަލާމަތްތަށް ފާހަގަވި މީހުންގެ ތެރެއިން 4 މީހަކު އައްޑޫ ކޯވިޑް މެނޭޖްމެންޓް ފެސިލިޓީގައި ފަރުވާ ދެމުންދާ ކަމަށް އައްޑޫ އިކުއެޓޯރިއަލް ހޮސްޕިޓަލުން މައުލޫމާތު ދެއްވައެވެ.
ފުވައްމުލަކުގައި ހުރި އައްޑޫގެ ރައްޔިތަކުވެސް ފެސިލިޓީ އަށް ގެނައުމުގެ މަސައްކަތް ކުރަމުން ދާކަމަށް އޭއީއެޗްއިން ވަނީ ހާމަކުރައްވާފައެވެ. މިއާއެކު އައްޑޫ ކޮވިޑް މެނޭޖްމެންޓު ފެސިލީޓީގައި 5 މީހަކު ތިބޭނެ ކަމަށް އޭއީއެޗް އިން ވިދާޅުވެއެވެ.
އައްޑޫގެ ގުޅިފައިވާ ރައްތަކުގެ ރެންޑަމް ސާމްޕަލް ނެގުމުގެ މަސައްކަތް ފަށާފައިވާއިރު، މީގެ ކުރީން ހުޅުމީދޫ އެމްޓީސީސީ ސައިޓު ކްލަސްޓަރ އާއި ގުޅިގެން ވެސް ރެންޑަމް ސާމްޕަލް ވަނީ ނަގާފައެވެ. އެރަށުން ނެގި ހުރިހާ ރެންޑަމް ސާމްޕަލެއް ވަނީ ނެގެޓިވް ވެފައެވެ.