އައްޑޫސިޓީ ކައުންސިލުގެ އިތުރު 2 ގޮނޑި އިންތިހާބުގެ ކުރިން އެމްޑީޕީން ކަށަވަރު ކޮށްފިއެވެ.
އައްޑޫސިޓީ ކައުންސިލުގެ އިތުރު ދެ ގޮނޑި އެމްޑީޕީއަށް ކަށަވަރުވީ، އެ ދައިރާތަކަށް ކުރިމަތިލި އެމްޑީޕީ ކެނޑިޑޭޓުން ފިޔަވައި އެހެން ކެނޑިޑޭޓުންގެ ނަން އަނބުރާ ގެންދިއުމުންނެވެ. އެގޮތުން ކައުންސިލު ގޮނޑި ކަށަވަރުވެފައި ވަނީ، ހިތަދޫ ކޮރަވައު ދާއިރާއަށް ކުރިމަތިލާފައިވާ ކެންޑިޑޭޓު އިބްރާހިމް ޝިނާޒް މޫސާ އަށާއި، ހުޅުދޫ ދާއިރާއަށް ވާދަކުރާ ހުސެއިން ފައިޒުއްރަހްމާންއަށެވެ.
ހުޅުދޫ ދާއިރާ އަށް ފައިޒުއްރަޙްމާންގެ އިތުރުން ޕީޕީއެމް ކެނޑިޑޭޓެއްގެ ގޮތުގައި މޫސާ ބުޝްރީ ވާދަކުރިއެވެ. އަދި އަމިއްލަ ގޮތުން މުހައްމަދު ޔާސީން އަދި އައްބާސް ވާފިރު ވާދަކުރެއްވިއެވެ. މިހުރިހާ ކެންޑިޑޭޓުންވެސް ވަނީ އެކި ސަބަބުތަކާއި ހެދި ނަން އަނބުރާ ގެންގޮސްފައެވެ. އެހެންކަމުން ފައުޒުއްރަހްމާންއަށް މިގޮނޑި އިތުރު ކެނޑިޑޭޓެއް ނެތުމާއެކު ކަށަވަރުވެއެވެ.
ހިތަދޫ ކޮރޮވައު ދާއިރާއަށް ކުރިމަތިލާފައިވަނީ ދެ ކެނޑިޑޭޓުންނެވެ. އެއީ ޕީޕީއެމްގެ ފަރާތުން ކުރިމަތިލާފައިވާ މުހައްމަދު ޖިނާން ޖަލީލް އާއި ގޮނޑި މިހާރު ކަށަވަރު ކޮށްފައިވާ އެމްޑީޕީ ކެންޑިޑޭޓު އިބްރާޙީމް ޝިނާޒް މުސާއެވެ. މީގެތެރެއިން ޖިނާން ނަން އަނބުރާ ގެންދިއުމާއެކު ޝިނާޒްއަށް ވަނީ ގޮނޑި ކަށަވަރުވެއެވެ.
މިގޮނޑީގެ އިތުރުން އިތުރު ކެނޑިޑޭޓެއް ކުރިމަތިލާފައި ނެތުމުގެ ސަބަބުން ސިޓީ ކައުންސިލުގެ ހިތަދޫ ބޭރުމަތި ދާއިރާއަށް އެމްޑީޕީން ވާދަ ކުރާ ކެނޑިޑޭޓް މަރިޔަމް ސައިދާވެސް ވަނީ އެގޮނޑި ކާމިޔާބު ކޮށްފައެވެ. މި ގޮނޑި އަކީ އަންހެނުންނަށް ހާއްސަ ކުރެވިފައިވާ ގޮނޑިއެކެވެ. މީގެ އިތުރުން މަރަދޫ އަދި ފޭދޫ ދައިރާގެ އަންހެނުންގެ ކޮމެޓީގެ ދެ ގޮނޑިވެސް އެމްޑީޕީ ކެނޑިޑޭޓުން ވަނީ ކަށަވަރުކޮށްފައެވެ.
އައްޑޫ ސިޓީ ކައުންސިލުގައި މިވަގުތު 7 މެންބަރުން ތިބި ނަމަވެސް، އަލަށް ހޮވޭ ކައުންސިލުގައި މޭޔަރއާއެކު 13 މެންބަރުން ތިބޭނެއެވެ. އައްޑޫ ސިޓީ ކައުންސިލުގެ މޭޔަރުކަމަށް އެމްޑީޕީން ވާދަކުރަނީ، ކުރީގެ ހިތަދޫ ދެކުނު ދައިރާގެ މެންބަރު އަލީ ނިޒާރުއެވެ. ޕީޕީއެމްއިން މި ގޮނޑިއަށް ވާދަ ކުރަނީ ވޮލީ ބޯޅަ އެސޯސިއޭޝަންގެ ރައީސް ކަމުގައި ހުންނެވި، މުހައްމަދު ލަތީފުއެވެ.
އޭޕްރިލްމަހުގެ 10 ވަނަދުވަހު ލޯކަލް ކައުންސިލް އިންތިޚާބު ބޭއްވުމަށް އިލެކްޝަންސް ކޮމިޝަނުން އަންނަނީ ތައްޔާރުވަމުންނެވެ. މިގޮތުން މި އިންތިޚާބުގައި ވޯޓް ދިނުމުގެ ޙައްޤު ލިބިފައިވާ މީހުންގެ ލިސްޓު ވަނީ އާއްމުކޮށްފައެވެ. އަދި އިންތިޚާބުގައި ވާދަކުރަން ނިންމި ކެންޑިޑޭޓުން ނަން ނެގުމަށް ދިން ފުރުސަތުވެސް ވަނީ ހަމަވެފައެވެ.