ކޯވިޑް-19ގެ ކޭސްތަކާއި ގުޅިގެން އައްޑޫގައި އަޅާފައިވާ ހާއްސަ ފިޔަވަޅުތައް އިތުރު 7 ދުވަހަށް ދަމަހައްޓަން ނިންމައިފިއެވެ.
އައްޑޫގައި އަޅާފައިވާ ހާއްސަ ފިޔަވަޅުތައް އިތުރު 7 ދުވަހަށް ދަމަހައްޓަން ނިންމުމާއެކު، އެފިޔަވަޅުތައް މިމަހުގެ 23 ވަނަ ދުވަހުގެ ނިޔަލަށް ދަމަހައްޓާނެއެވެ.
އައްޑޫގައި ކޯވިޑް-19 ގެ ކޭސްތައް ފެންނަމުންދާތީ، މިވަގުތު ގިނަ ފިޔަވަޅުތަކެއް ވަނީ އަޅާފައެވެ. އައްޑޫގައި އަޅާފައިވާ ފިޔަވަޅުތައް ދެމެހެއްޓި އިރު، މިހާތަނަށް ޖުމްލަ 63 ކޭސް އައްޑޫއިން ވަނީ ފެނިފައެވެ. އެގޮތުން އައްޑޫގެ ގުޅިފައިވާ ރައްތަކުގައި ފާހަގަކުރެވިފައިވާ އޭވިއޭޝަން ކްލަސްޓަރއިން މިހާތަނަށް 36 މީހަކު ޕޮޒިޓިވް ވެފައިވެއެވެ. އަދި ހުޅުމީދޫ އެމްޓީސީސީ ސައިޓުން އިތުރު ބިދޭސީއަކު ޕޮޒިޓިވްވެ މިހާތަނަށް 26 މީހަކު އެކްލަސްޓަރއިންވެސް ވަނީ ޕޮޒިޓިވްވެފައެވެ.
އައްޑޫ އިމެޖެންސީ އޮޕަރޭޝަންސް ސެންޓަރުން ބޭއްވި ނޫސްވެރިންގެ ބައްދަލުވުމެއްގައި އައްޑޫސިޓީ މޭޔަރ އަބްދުﷲ ސޯދިޤް ވިދާޅުވީ، މިވަގުތު ރެންޑަމް ސާމްޕްލިން ނަތިޖާތަކަށް ބަލާއިރު މިހާތަނަށް އެއްވެސް ފަރާތެއް ޕޮޒިޓިވްވެފައި ނުވާކަމަށެވެ. އަދި މިވަގުތަށް ކޮމިއުނިޓީ ސްޕްރެޑެއް އޮތްކަން ފާހަގަ ނުކުރެވޭކަމަށް މޭޔަރ ވިދާޅުވިއެވެ.
"ވަކިވަރަކަށް ނަގަން ޖެހޭ ސާމްޕަލްތައް ނެގި ޓެސްޓު ކުރެވި، އޭގެ ނަތީޖާއަށް ބަލާ އެނިންމަވަނީ (އޭއީއެޗްއިން) އެނިންމަވަނީ މިހާރު ފެތުރުފިއެއް ނެތޭ މުޖްތަމަޢުތެރެއަށް. ކޮމިއުނިޓީ ސްޕްރެޑެއް ނެތް ކަމަށް، ފާހަގަ ކުރައްވަނީ އެހިސާބުން. އެހެން ކަމުން އިތުރަށް ސާމްޕަލް ނެގުމުގެ މަސައްކަތް ކުރިއަށް ދާތީވެ، އިތުރަށް (ބަލަން ޖެހޭ ކަންކަން ބެލުމަށް) އިތުރަށް މޮނިޓަރިންގައި ބޭއްވުމަށް ނިންމަވާފައި މިއޮތީ" މޭޔަރ ވިދާޅުވިއެވެ.
އައްޑޫގައި މިވަގުތު ރެންޑަމް ސާމްޕަލް ނެގުމުގެ މަސައްކަތް ކުރަމުންދާއިރު، ކޮންމެ ދުވަހަކުވެސް ގުޅިފައިވާ ރަށްތަކުން ސާމްޕަލް ނެގުމުގެ މަސައްކަތް އާދީއްތަ ދުވަހުން ފެށިގެން ދަނީ ކުރެވެމުންނެވެ. އެގޮތުން މިހާތަނަށް 500 އެއްހާ ސާމްޕަލް ނަގާފައިވާއިރު، އެއްވެސް ސާމްޕަލެއް ޕޮޒިޓިވް ވެފައެއް ނުވެއެވެ. އޭއީއެޗްއިން ވިދާޅުވީ މިހާރު ޕޮޒިޓިވް ވަމުންދަނީ ހަމައެކަނި ޑައިރެކްޓު ކޮންޓެކްޓުން ކަމަށެވެ.
އައްޑޫގައި ކޮވިޑް ކޭސްތަށް ފެނުމާއި ގުޅިގެން އެސިޓީ މޮނިޓަރިންއަށް ލާފައިވަނީ ފެބްރުއަރީ މަހުގެ 6 ވަނަ ދުވަހުއެވެ. އަދި އޭގެ ފަހުން ރައްކާތެރިކަމުގެ ގޮތުން ފެބްރުއަރީމަހުގެ 10 ވަނަ ދުވަހުން ފެށިގެން ހާއްސަ ފިޔަވަޅުތަކެއް ވަނީ އަޅާފައެވެ. އެގޮތުން ޖަމާއަތުގައި ނަމާދު ކުރުން މެދުކަނޑާލުމާއި، ރޭގަނޑު 8:00 އިން ފަތިހު 4:00 އަށް ކާފިއު ހިންގަންވަނީ ފަށާފައެވެ. މީގެ އިތުރުން އެއްވެ އުޅުން މަނާ ކުރުމާއި އެއް އަވަށުން އަނެއް އަވަށަށް ޒަރޫރީ ނޫން ހާލަތުގައި ދިއުން ވަނީ މަނާކޮށްފައެވެ.