އައްޑޫގެ ގުޅިފައިވާ ރަށްތަކުގައި ކޯވިޑްގެ ކޮމިއުނިޓީ ސްޕްރެޑެއް ފާހަގަވާން ނެތުމުން، އެރަށްތަކުގައި އަޅާފައިވާ ފިޔަވަޅުތައް އުވާލައިފިއެވެ.
އައްޑޫގެ ގުޅިފައިވާ ރަށްތަކުގައި ކޯވިޑާއި ގުޅިގެން އަޅާފައިވާ ފިޔަވަޅުތަކަށް ލުއި ދިން ނަމަވެސް، ހުޅުމީދޫގައި އަޅާފައިވާ ފިޔަވަޅުތައް އިތުރު 7 ދުވަހަށް ދަމަހައްޓަން ވަނީ ނިންމާފައެވެ.
ކޯވިޑްގެ ކޭސްތަކެއް ފެނުމާއި ގުޅިގެން މުޅި އައްޑޫސިޓީ މޮނީޓަރިން އަށް ލާފައިވަނީ ފެބްރުއަރީމަހުގެ 6 ވަނަ ދުވަހުއެވެ. އައްޑޫގެ ގުޅިފައިވާ ރަށްތަކާއެކު މުޅި އައްޑޫ މޮނީޓަރިންއަށް ލާފައިވަނީ، ހިތަދޫގައި ހެދިފައިވާ ފްލޫ ކްލިނިކަށް ދިޔަ ދެ މީހަކު ޕޮޒިޓިވް ވުމާއި ގުޅިގެންނެވެ. އޭވިއޭޝަން ކްލަސްޓަރ ގޮތުގައި ވަކިކުރެވުނު މިކްލަސްޓަރއިން މިހާތަނަށް 42 ފަރާތެއް ވަނީ ކޯވިޑަށް ޕޮޒިޓިވްވެފައިވެއެވެ. ނަމަވެސް މިކްލަސްޓަރގައި މިހާރު ޕޮޒިޓިވް ވަމުންދަނީ ކޮންޓެކްޓުންގެ ގޮތުގައި ފާހަގަކުރެވިފައިވާ ފަރާތްތައްކަމަށް އައްޑޫ އިކުއެޓޯރިއަލް ހޮސްޕިޓަލުން ވިދާޅުވެއެވެ.
މީގެ އިތުރުން މިމަހުގެ 4 ވަނަ ދުވަހު އައްޑޫގެ ހުޅުމީދޫ އެމްޓީސީސީ ސައިޓުގައި ތިބި ބިދޭސީންތަކެއް ޕޮޒިޓިވްވުމާއެކު، އެރަށް މޮނީޓަރިން އަށް ލިއެވެ. ހުޅުމީދޫ މިކްލަސްޓަރއާއި ގުޅިގެން މިހާތަނަށް 26 މީހުން ޕޮޒިޓިވްވެފައިވާއިރު، މީދޫ އަވަށުން ނެގި ރެންޑަމް ސާމްޕަލް އަކުން 2 ފަރާތެއް ޕޮޒިޓިވްވިއެވެ. އޭގެ ފަހުން އެ ދެފަރާތާއި ގުޅުން ހުރި އިތުރު 6 މީހަކު ޕޮޒިޓިވްވެ، ކްލަސްޓަރއިން ޕޮޒިޓިވްވި މީހުންގެ އަދަދު 8 އަށް ވަނީ އަރާފައެވެ. ހުޅުމީދޫން އަލަށް ފެނުނު ކޭސްތަކާއި ގުޅިގެން އެރަށުގައި އިތުރު 7 ދުވަހަށް ފިޔަވަޅުތައް ދަމަހައްޓަން އެޗްޕީއޭއިން ވަނީ ނިންމާފައެވެ.
އައްޑޫސިޓީގެ މޭޔަރ އަބްދުﷲ ސޯދިޤް ވިދާޅުވީ، ފިޔަވަޅުތަކަށް ލުޔެއް ދިން ނަމަވެސް، އާއްމުން އެއްވެ އުޅުން މަދުކުރުން މުހިންމު ކަމަށެވެ.
"ހުރިހާ ބޭފުޅުންނަށްވެސް ފާހަގަ ކުރެވޭނެ މިދިޔަ ނަތިޖާތަކުންވެސް، ހުޅުދޫ މީދޫގެ އަލަށް މި ފެނުނު ކްލަސްޓަރގެ ކޭސްތަކެއް މިވަނީ މިދިޔަ 24 ގަޑިއިރު ތެރޭވެސް [ހޯމަ ދުވަހުގެ ރޭ] ފެނިފަ. އެއްގޮތަކަށްވެސް ބަލައިގެން ނުވާނެ ގައިދުރު ކަމެއް ނެތި ވީއްލިގެން އެއްވެ، ބީޗަށް ގޮސް ޕާޓީ ބާއްވާ (ކަން ކަން ކުރުމަށް). ވީހާވެސް ބޮޑަށް އެއްވުން މަދު ކުރަން ޖެހޭ.އަބްދުﷲ ސޯދިޤް - އައްޑޫ މޭޔަރ
އައްޑޫ އިކުއެޓޯރިއަލް ހޮސްޕިޓަލުން ވިދާޅުވީ މިހާތަނަށް ހުޅުމީދޫއިން އަލަށް ފެނުނު ކްލަސްޓަރއިން ޑައިރެކްޓު ކޮންޓެކްޓުންގެ ގޮތުގައި، 19 ފަރާތެއް ފާހަގަކުރެވިފައިވާ ކަމަށާއި، މިއީ ކުރިން އައްޑޫގައި ފާހަގަކުރެވުނު ދެ ކްލަސްޓަރއާ ގުޅުމެއްވާ ކްލަސްޓަރއެއްކަމެއް މިހާތަނަށް ބެލިބެލުމުން ފެންނަން ނެތްކަމަށެވެ.
އައްޑޫއިން މިހާތަނަށް 76 މީހަކު ކޯވިޑަށް ޕޮޒިޓިވްވެފައިވާއިރު، އަންގާރަ ދުވަހުގެ އިރުއޮއްސި ހައެއް ޖެހުމާއި ހަމައަށް 44 މީހަކު ވަނީ ބަލިން ރަނގަޅުވެފައެވެ.