އައްޑޫސިޓީ މީދޫގައި ކޯވިޑް-19 ފެތުރިފައިވާ މިންވަރު ބެލުމަށް 280 އަށް ވުރެ ގިނަ ސާމްޕަލް އެރަށުން ނަގާފައިވާ ކަމަށް އައްޑޫ އިކުއިޓޯރިއަލް ހޮސްޕިޓަލުން ބުނެފިއެވެ.
ކޯވިޑް-19 އާއި ގުޅިގެން މިވަގުތު އައްޑޫ ސިޓީން އެންމެ ނުރައްކާތެރި ހާލަތެއްގައި އޮތީ އެސިޓީގެ މީދޫއެވެ. މީދޫގައި މިވަގުތު 13 މީހަކު ވަނީ ކޯވިޑަށް ޕޮޒިޓިވްވެފައެވެ. މީގެ ތެރެއިން ބައެއް މީހުން ރެންޑަމް ސާމްޕަލްއިން ޕޮޒިޓިވްވިއިރު، ބައެއް ފަރާތްތަކުން މީދޫގައި ޤާއިމު ކުރެވިފައި ހުރި ފްލޫ ކްލިނިކަށް ގޮސްގެން ހެދި ޓެސްޓުން ވެސް ޕޮޒިޓިވްވެފައިވެއެވެ. މިކަމާއި ގުޅިގެން މީދޫގެ ހުރިހާ ގެއަކުން ސާމްޕަލް ނެގުމަށް ނިންމިއެވެ.
އެގޮތުން ހޯމަ ދުވަހު އެރަށުން 281 ސާމްޕަލް ނަގާފައިވާއިރު، މީހުން ދިރިއުޅޭ ނިސްބަތުން ހުރިހާ ގެއަކުންވެސް ސާމްޕަލް ނެގުމުގެ މަސައްކަތް ކުރެވުނު ކަމަށް އައްޑޫ އިކުއެޓޯރިއަލް ހޮސްޕިޓަލުން މަޢުލޫމާތުދެއެވެ. އަދިވެސް އިތުރު ސާމްޕަލްތައް ނެގުމަށް ހަމަޖެހިފައިވާ ކަމަށް އައްޑޫ އިކުއެޓޯރިއަލް ހޮސްޕިޓަލުން މައުލޫމާތުދެއެވެ.
އައްޑޫ ސިޓީން މިހާތަނަށް 91 މީހުން ކޯވިޑަށް ޕޮޒިޓިވްވެފައިވާއިރު، މިވަގުތު ބަލީގެ ނުރައްކާ އެންމެ ބޮޑަށް އޮތީ މީދޫގައި ކަމަށް އައްޑޫ އިމަޖެންސީ އޮޕަރޭޝަންސް ސެންޓަރުން މަޢުލޫމާތުދެއެވެ. އެގޮތުން މީދޫން އަލަށް ޕޮޒިޓިވްވި މީހުންގެ ތެރެއިން މިހާތަނަށް 75 މީހުން ޑައިރެކްޓް ކޮންޓެކްޓުންގެ ގޮތުގައި ވަނީ ފާހަގަ ކުރެވިފައެވެ. މިކަމާއި ގުޅިގެން އައްޑޫ ސިޓީގެ މޭޔަރ އަބްދުﷲ ސާދިޤް ވިދާޅުވީ، ކޮންޓެކްޓް ޓްރޭސިންއަށް އިތުރަށް އެއްބާރުލުން ބޭނުންވާ ކަމަށެވެ.
އައްޑޫގައި މިވަގުތު މައިގަނޑު 3 ކްލަސްޓަރއެއް ފާހަގަ ވެފައިވެއެވެ. އައްޑޫ ސިޓީން ކޯވިޑަށް ޕޮޒިޓިވްވެފައިވަނީ މީދޫން 13 މީހުންނާއި، އެމްޓީސީސީ ސައިޓުން ޕޮޒިޓިވްވި 35 މީހުންނާއި އައްޑޫގެ ގުޅިފައިވާ ރަށްތަކުން ޕޮޒިޓިވްވި 43 މީހުންނެވެ. އަދި މީގެ ތެރެއިން 57 މީހުން ވަނީ ބަލިން ރަނގަޅުވެފައެވެ.
އައްޑޫގެ އިތުރުން ފުވައްމުލަކު ސިޓީގައިވެސް ބައްޔަށް އިތުރު މީހުން ދަނީ ޕޮޒިޓިވްވަމުންނެވެ. އެސިޓީން މިހާތަނަށް މިބައްޔަށް ޕޮޒިޓިވްވި މީހުންގެ އަދަދު 50 އަށް އަރާފައިވާއިރު، މިވަގުތު އެކްޓިވްކޭސްގެ އަދަދަކީ 19 އެވެ. ފުވައްމުލަކު ސިޓީން ޕޮޒިޓިވްވި އައްޑޫ ރައްޔިތަކު ވަނީ އައްޑޫއަށް ފޮނުވާލާފައެވެ. މިއާއި އެކު އެސިޓީން 30 މީހުން ބަލިން ރަނގަޅު ވެފައިވާ ކަމަށް ފުވައްމުލަކު އިމަރޖެންސީ އޮޕަރޭޝަން ސެންޓަރުން މައުލޫމާތުދެއެވެ.