މޯލްޑިވްސް ސްޓޭޓް ޝިޕިންގް އިން ފުރަތަމަ ފަހަރަށް ލައިވް ކާގޯގެ ގޮތުގައި އައްޑޫއަށް ގެންނަ އަސްތައް ހޮނިހިރުދުވަހު ގެނައުމަށް މަސައްކަތް ކުރަމުންދާކަމަށް އެކުންފުނިން ވިދާޅުވެއްޖެއެވެ.
ޕީއެސްއެމް އަށް މައުލޫމާތު ދެއްވަމުން އެކުންފުނިން ވިދާޅުވީ، ލައިވް ކާގޯ ރާއްޖެއަށް ގެނައުމުގެ މަސައްކަތް ފަށާފައިވާއިރު، ފުރަތަމަ ގެންނަ މިފަދަ ކާގޯއަކީ އައްޑުއަށް ގެންނަ އަސްތަކެއް ކަމަށެވެ. ހޮނިހިރު ދުވަހުގެ ރޭ އަސްތައް ގެނެވޭނެކަމަށް ލަފާ ކުރެވޭކަމަށް އެކުންފުނިން ވަނީ ވިދާޅުވެފައެވެ. ފުރަތަމަ ގެންނަނީ 3 އަސް ކަމަށާ މިއީ އިންޑިއާއިން ގެންނަ އަސްތަކެއްކަމަށްވެސް އެކުންފުނިން ވިދާޅުވެއެވެ.
މިއަސްތައް ގެންނަ ސަދަން ސްޓޭލިއަން އިން ވިދާޅުވީ، އަސްތައް ގެނައުމަށް ފަހު މީޑީއާ މައުލޫމާތު ހިއްސާކުރާނެ ކަމަށެވެ.
މޯލްޑިވްސް ސްޓޭޓް ޝިޕިންގްއިން ލައިވް ކާގޯ ގެންނަން ފަށާއިވާއިރު، އިންޑިއާގެ ޓުޓިކޮރިންއިން ކޮންމެ 20 ދުވަހަކުން އައްޑޫއަށް އެކުންފުނިން ދަނީ ކާގޯ ގެންނަމުންނެވެ. އައްޑޫގެ އިިތުރުން ޓުޓިކޮރިންއިން ގެންނަ ކާގޯ ގދ.ތިނަދޫއަށް ވެސް ގެންދެއެވެ.