މަދުރަސީ ދައުރުގައި ދަރިވަރުންނަށް ވަޒީފާގެ ހުނަރުތައް ދަސްކޮށްދޭ ޕްރޮގްރާމްތަކެއް ތައުލީމީ މަންޙަޖުގައި ހިމެނުމަށް މަސައްކަތްކުރަމުންދާކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލް ވިދާޅުވެއްޖެއެވެ.
މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލް މިހެން ވިދާޅުވީ ވެރިކަންކުރާ މައި ޕާޓީ އެމްޑީޕީން ކުރިއަށްގެންދާ ލޯކަލް ކައުންސިލް އިންތިޚާބުގެ ކެމްޕެއިން "ރަށްވެހި ފަތިސް"ގެ ކެނޑިޑޭޓުންގެ ބައްދަލުވުމުގައި ވާހަކަދައްކަވަމުންނެވެ.
އިކޮނޮމިކް މިނިސްޓަރ ފައްޔާޒް ވިދާޅުވީ ރާއްޖޭގެ މަސައްކަތުގެ މާޙައުލަށް ބޭނުންވާ ހުނަރުތަކާއި، ވަޒީފާގެ މާޙައުލުގައި ދަމަހައްޓަންޖެހޭ އަޙްލާޤީ މިންގަނޑުތަކާއި ގުޅޭ ޕްރޮގްރާމްތަކެއް ސްކޫލްތަކުގައި ހިންގުން މުޙިއްމު ކަމަށެވެ. މިނިސްޓަރ ވިދާޅުވީ މިކަމާއި ގުޅޭ މަސައްކަތްތަކެއް އެޑިއުކޭޝަން މިނިސްޓްރީއާއެކު ކުރިއަށްދާކަމަށެވެ.
" ދުރު މުސްތަޤްބަލެއްގައި ކަންނޭގެ މިކަމުގެ އެންމެ ރަނގަޅު ނަތީޖާއެއް ނެރެވޭނީ، އެޑިއުކޭޝަން މިނިސްޓަރާއި އެކު މަސައްކަތްތަކެއް އެބަކުރަން ޕްރީ ސްކޫލުން ފެށިގެން ތައުލީމީ ބައި ނިމެންދެން ވޯކް ޑިސްޕްލިންއާއި ވިޔަފާރީގެ ހުނަރުތަކާއި ބެހޭ ޕްރޮގްރާމްތަކެއް ކަރިކިއުލަމްތެރޭގައި ހިމެނުމަށް،" ފައްޔާޒް ވިދާޅުވިއެވެ.
ރާއްޖޭގެ ވަޒީފާގެ މާޙައުލަށް އަލަށް ނިކުންނަ ޒުވާނުން ތައުލީމީ ގޮތުން ރަނގަޅު ނަތީޖާއެއް ލިބިފައި ހުރި ނަމަވެސް މަސައްކަތުގެ ހުނަރު ނުހުންނަ މައްސަލައަކީ ވަޒީފާދޭ ފަރާތްތަކުން ކުރާ ޝަކުވާއެކެވެ. އެކަމަަށް ސަރުކާރުގެ އެކި ވުޒާރާތައް ގުޅިގެން މަސައްކަތްކުރަމުންދާއިރު ސަރުކާރުގެ އަމަޒާކީ ރާއްޖޭގެ މަތީ ފަންތީގެ ވަޒީފާތަކުގައި ދިވެހިންގެ އަދަދު އިތުރުކުރުމެވެ.