އައްޑޫގައި މިހާތަނަށް 10،000 މީހުންނަށް ކޯވިޑް ވެކްސިން ދީފައިވާ ކަމަށް އައްޑޫ އިކުއެޓޯރިއަލް ހޮސްޕިޓަލުން ހާމަކޮށްފިއެވެ.
އައްޑޫގައި 10،000 މީހުންނަށް ވެކްސިން ދީފައިވާއިރު، ވެކްސިން ދޭން އައްޑޫގައި ފަށާފައިވަނީ މާލެއެކޭ އެއްގޮތަށް ފެބްރުއަރީ މަހުގެ އެއްވަނަ ދުވަހުއެވެ. އައްޑޫގައި މުޅި ޖުމްލަ 5 ވެކްސިނޭޝަން ސެންޓަރުވަނީ ޤާއިމްކޮށްފައެވެ. ހިތަދޫގައި ވެކްސިން ދެމުން ގެންދަނީ، ޝަރަފުއްދީން ސްކޫލުގައެވެ. މަރަދޫ އާއި މަރަދޫ ފޭދޫ ރައްޔިތުންނަށް ވެކްސިން ދިނުމަށް އިރުޝާދިއްޔާ ސްކޫލުގައި ވެކްސިން ސެންޓަރެއް ޤާއިމު ކޮށްފައިވާއިރު، ފޭދޫގައި ވެކްސިން ދެމުން ގެންދަނީ ފޭދޫ އޮފީހުގެ ކުރީގެ އިމާރާތުގައެވެ. މީގެ އިތުރުން ހުޅުމީދޫގައި، ސ. އަތޮޅު މަދުރަސާގައި ވެކްސިން ދިނުމުގެ މަސައްކަތް ދަނީ ކުރެވެމުންނެވެ.
އައްޑޫގައި މިވަގުތު ވެކްސިން ދެމުން ގެންދަނީ އުމުރުން 18 އަހަރުން މަތީގެ މީހުންނަށާއި، އުމުރުން 18 އަހަރުން މަތީގެ ދާއިމީ ބަލިތަކަށް ބޭސްކުރަމުންދާ ބިދޭސީންނަށާއި، ދާނުގައި ތިބޭ ބަލި މީހުންގެ އެހީތެރިންނަށެވެ.
އައްޑޫ އިކުއެޓޯރިއަލް ހޮސްޕިޓަލުން ވިދާޅުވީ، ވެކްސިން ދޭން ފެށި ފަހުން، ދުވާލެއްގެ މައްޗަށް 400 އެއްހާ މީހުންނަށް ވެކްސިން ދެވޭ ކަމަށެވެ.
އައްޑޫ އިމަރޖެންސީ އޮޕަރޭޝަންސް ސެންޓަރުން ހިއްސާކޮށްފައިވާ ތަފާސްހިސާބުތަށް ދައްކާގޮތުން، އާދީއްތަ ދުވަހު ހިތަދޫ ވެކްސިން ސެންޓަރުތަކުން 164 ފަރާތްތަކަށް ވެކްސިން ދީފައިވާއިރު، މަރަދޫ އަދި މަރަދޫ-ފޭދޫ ސެންޓަރުން ވެކްސިން ދީފައިވަނީ 82 ފަރާތަށެވެ. އަދި ފޭދޫގައި 50 ފަރާތަކަށް ވެކްސިން ދީފައިވާއިރު ހުޅުމީދޫގައި 72 މީހުންނަށް ވެކްސިން ދީފައިވެއެވެ. މިއާއެކު އާދީއްތަ ދުވަހު އެކަނިވެސް 368 މީހުންނަށް ވެކްސިން ދެވި، އަދި އާދީއްތަ ދުވަހުގެ 6:00 ޖެހުމާއި ހަމައަށް އައްޑޫއިން ވެކްސިން ޖެހި މީހުންގެ އަދަދު 10،032 އަށް އަރާފައިވާކަމަށެވެ.
އައްޑޫ އިކުއެޓޯރިއަލް ހޮސްޕިޓަލުން ވިދާޅުވީ، މާލޭ ސަރަހައްދުން ބޭރުގައި އެއް ސަރަހައްދަކުން އެންމެ ގިނަ ބަޔަކަށް ވެކްސިން ދެވުނީ އައްޑޫގައި ކަމަށެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތައް ދައްކާގޮތުން މިހާތަނަށް ރާއްޖެއިން ވެކްސިންޖެހި މީހުންގެ ޖުމްލަ ޢަދަދު މިވަނީ 151،643 އަށް އަރާފައެވެ. އަދި އަތޮޅުތަކުން ވެކްސިންޖެހި މީހުންގެ އަދަދުވަނީ 62،550 އަށް އަރާފައެވެ.
އައްޑޫގައި މިވަގުތު ކޯވިޑް ވެކްސިން ދެމުންދާއިރު، މުޅީ ސިޓީ އޮތީ މޮނީޓަރިން ހާލަތުގައެވެ. މިހާތަނަށް މިބަލިއަށް 92 މީހުން ފައްސިވެފައިވާއިރު، 67 މީހަކު ބަލިން ރަނގަޅުވެފައިވެއެވެ. އަދި އެކްޓިވް ކޭސްގެ ގޮތުގައި 25 އެކްޓިވް ކޭސް އެބައޮތް ކަމަށް މަޢުލޫމާތުލިބިފއަިވެއެވެ.