ރާއްޖޭގެ ފަތުރުވެރިކަމުގެ އެނދުގެ 94 އިންސައްތަ އަނބުރާ އޮޕަރޭޝަނަށް އައިސްފައިވާ ކަމަށާއި، އަދި ވަޒީފާއަށް އަސަރު ކުރި ގިނަ މީހުންނަށް ވަޒީފާ އަލުން ލިބިފައިވާކަމަށް ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަ ކުރުމަށް ބޭނުން ކުރާ ލޯގޯ އިފްތިތާޙް ކުރުމަށް ބޭއްވި ނޫސްވެރިން ބައްދަލުވުމުގައި ވާހަކަ ދައްކަވަމުން ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވީ، ކޯވިޑް-19ގެ ހާލަތުގެ ކުރީކޮޅު ފުރަތަމަ 3 މަސް ދުވަހު، ފަތުުރުވެރިންނަށް ޚިދުމަތްދޭ ތަންތަނުން މުވައްޒަފުން ގެންގުޅުނު ކަމަށެވެ. ނަމަވެސް މޭމަހާއި ހިސާބުން ނޯ ޕޭއަށް ދިއުމާއި، ޕޭ ރީސްޓްރަކްޗަރ ކުރުން ފަދަ ކަންކަން ކުރެވިގެން ދިޔަކަމަށް މިނިސްޓަރ ވިދާޅުވިއެވެ.
މިނިސްޓަރ މައުސޫމް ވިދާޅުވީ، މިކަންކަމާއި އެކުވެސް ގެއްލުމުން އަރައިގަނެވުމުންދަނީ ހިތްހަމަޖެހޭ ގޮތަށް ކަމަށެވެ. އެގޮތުން މިހާރު ގިނަ ތަންތަނުން ވަޒީފާއަށް މީހުން އަނބުރާ ނެރެން ފަށާފައިވާކަން މިނިސްޓަރ ފާހަގަކުރެއްވިއެވެ.
"މިހާރު ރާއްޖޭގެ އެނދުގެ %94 އޮޕަރޭޝަނަށް އައިސްފި. ވަޒީފާއަށް ވެސް މީހުން ނެރެމުންދަނީ. ޓުއަރިޒަމް މިނިސްޓްރީގެ ސީދާ ތަފާސް ހިސާބު އެދުވަހެއްގެ އަންއެމްޕްލޮއިމެންޓް ރޭޓެއް ނެތް. އެކަމަކު އިންޑަސްޓްރީގެ މުވައްޒަފުންނާއި ވަރަށް ގާތުން އެބަ މަސައްކަތް ކުރެވޭ. އުއްމީދަކީ އަހަރުގެ މެދެއްހާ ހިސާބައް ހުރިހާ ފަރާތްތަކަށް ވަޒީފާ ލިބޭނެ ކަމަށް.ޓުއަރިޒަމް މިނިސްޓަރ މައުސޫމް
މިނިސްޓަރގެ ވާހަކަފުޅުގައި މިއަހަރު އާ ރިސޯޓުތައް ހުޅުވިގެން އިތުރު 9000 ވަޒީފާ އުފެދޭނެކަމަށް ވިދާޅުވިއެވެ. މީގެ އިތުރުން މިހާރު ރާއްޖޭގެ ދެކުނުން އައްޑޫގެ މައި ދެ ރިސޯޓު ބަންދު ކުރެވިފައިވާކަން ފާހަގަކުރައްވާ މިނިސްޓަރ ވިދާޅުވީ، އެ ދެ ރިސޯޓަކީ ވަރަށް ގިނަ ބައެއްގެ ވަޒީފާއާ ގުޅިފައިވާ ދެ ރިސޯޓްކަމަށާއި، އެ ދެ ތަން ހުޅުވުމަށް މިހާރުވެސް މަސައްކަތް ކުރަމުން ދާކަމަށެވެ.
މިނިސްޓަރ ވިދާޅުވީ، ދައިރާގެ ހިއްސާ ދިވެހިންނަށް ދިނުމޭ ބުނަނީ ދިވެހީންގެ ބައިވެރިވުން މިދާއިރާގައި އިތުރުކުރުމަށް ކަމަށެވެ. އެގޮތުން މިހާރުވެސް އިންވެސްޓްމެންޓް ޕްލެޓްފޯމުތަކުގައި ދިވެހިންނާއި އިންވެސްޓަރުން ގުޅޭނެ އިންތިޒާމު ހަމަޖެހި، ބޭރުގެ ޤައުމުތަކުގައި ކާމިޔާބުކަމާއެކު ގެންގުޅޭ މޮޑެލްއަކަށް ޤަވާއިދު ބަދަލު ކުރެވިފައިވާކަން މިނިސްޓަރ ފާހަގަކުރެއްވިއެވެ. އެގޮތުން ދިވެހިން މެޖޯރިޓީ ޝެއާރ ހޯލްޑަރުންގެ ގޮތުގައި ތިބެ، އިންވެސްޓްމެންޓު ހޯދުމަށް މިހާރުވެސް މަގުފަހިވެފައިވާނެކަމަށް މިނިސްޓަރ މައުސޫމް ވިދާޅުވިއެވެ.