ދިގު މުއްދަތަކަށް ރާއްޖޭގައި ޗުއްޓީ ހޭދަކުރަން ބޭނުންވާ ފަތުރުވެރިންނަށް ޙާއްސަ ވިސާއެއް ތަޢާރަފްކުރުމަށް މަސައްކަތްކުރައްވަމުން ގެންދަވާކަމަށް ޓޫރިޒަމް އަބްދުﷲ މަޢުސޫމް ވިދާޅުވެއްޖެއެވެ.
ކޯވިޑާއި ގުޅިގެން ރާއްޖޭގެ ބޯޑަރުތައް ބަންދުކުރުމަށްފަހު އަލުން ހުޅުވާލުމުން ރާއްޖެއަށް އަންނަ ފަތުރުވެރިންގެ އަދަދު ދުވަހެއް ދުވަހަކަށް އަންނަނީ އިތުރުވަމުންނެވެ. އަދި މި ފަތުރުވެރިންގެ ރާއްޖޭގައި މަޑުކުރާ ދުވަސްތައްވެސް އަންނަނީ އިތުރުކުރަމުންނެވެ.
ޕީއެސްއެމް ނިއުސް އާއި ވާހަަކަދައްކަވަމުން މިނިސްޓަރ ވިދާޅުވީ ދިގު މުއްދަތަކަށް ރާއްޖޭގައި ޗުއްޓީ ހޭދަކުރަން ބޭނުންވާ ފަތުރުވެރިންނަށް ޙާއްސަކޮށްގެން ވަކި ވިސާއެއް ތައާރަފުކުރެއްވުމުގެ މަސައްކަތް ކުރައްވަމުން އަންނަކަމަށެވެ. އަދި މި ވިސާ ތައާރަފުކުރެވޭނީ އިމިގްރޭޝަންގެ ޤާނޫނަށް އިސްލާޙްތަކެއް ގެނެސްގެންކަމަށާއި އެކަމާއި ގުޅޭ މަޝްވަރާތަކާއިއެކު މަސައްކަތް ފަށާފައިވާކަމަށްވެސް ޑރ މައުސޫމް ވިދާޅުވިއެވެ. މިނިސްޓަރ ވިދާޅުވީ ފަތުރުވެރިކަން އަލުން ފެށިގެން އައުމާއެކު ފަތުރުވެރިން ރާއްޖޭގައި ހޭދަކުރާ ޗުއްޓީގެ މުއްދަތު ދިގުކަން ފާހަގަކުރެވިފައިވާކަމަށެވެ.
"ފަހަކަށް އައިސް އަޅުގަނޑުމެންނަށް މި ފެނުނީ ރާއްޖެއަށް އަންނަ ފަތުރުވެރިން ދިގު މުއްދަތަކަށް ރާއްޖޭގައި ތިބޭކަން، ޓޫރިސްޓް ވިސާ މި ލިބެނީ އެންމެ ގިނަވެގެން 3 މަހަށް، އެއަށްފަހު މިވަގުތު ޤާނޫނަކުން ޖާގައެއް ނުދޭ ޓޫރިސްޓް ވިސާ އިތުރުކޮށްދޭކަށް، " މިނިސްޓަރ މަޢުސޫމް ވިދާޅުވިއެވެ.
މިނިސްޓަރ ވިދާޅުވީ ރާއްޖޭގައި ދިގު މުއްދަތަކަށް ޗުއްޓީ ހޭދަކުރަން ބޭނުންވާ ފަތުރުވެރިންނަށް އިމިގްރޭޝަނުން މިހާރުވެސް ހާއްސަ ވިސާއެއް ދޫކުރަމުން އަންނަކަމަށެވެ. އެހެންނަމަވެސް މިއީ ވަގުތީ ހައްލައްކަންވެސް މިނިސްޓަރ ވަނީ ފާހަގަކުރައްވާފައެވެ.
ދުނިޔެ ތަރައްޤީވެ، އޮންލައިންކޮށް ވަޒީފާ އަދާކުރާ މީހުންގެ އަދަދު އިތުރުވަމުން އަންނަކަމަށާއި ވަޒީފާ އަދާކުރަމުންވެސް ރާއްޖޭގައި ޗުއްޓީ ހޭދަކުރެވޭނެ އިންތިޒާމެއް ހަމަޖެއްސުން މުޙިއްމުކަންވެސް މިނިސްޓަރ މައުސޫމް ފާހަގަކުރެއްވިއެވެ.
" މިއީ ރާއްޖޭގައި ވަޒީފާ އަދާކުރާ ވާހަަކައެއް ނޫން، ރާއްޖެއަށް އައިސް ރާއްޖޭގައި ތިބެގެން، ޙާއްސަކޮށް ބިޒްނަސް އެގްޒެކެޓިވުން، ކުންފުނިތަކުގެ ބޮޑެތި މީހުން، އެމީހުންގެ ކުންފުނިތަކުގެ މަސައްކަތް، ރާއްޖޭގައި ޗުއްޓީ ހޭދަކުރަމުންވެސް ކުންފުނީގެ މަސައްކަތް ކުރެވޭގޮތަށް ޖާގަ ދިިނުން، މިކަމަށް ވަރަށް ފްލެކްސިބަލް ވިސާއެއް ބޭނުންވޭ،" މިނިސްޓަރ ވިދާޅުވިއެވެ.
މިދިޔަ އަހަރު އިމިގްރޭޝަންގެ ޤާނޫނަށް ގެނައި އިސްލާހުގެ ދަށުން މަދުވެގެން 250000 ޑޮލަރު އިންވެސްޓް ކުރާ ބޭރުގެ ފަރާތްތަކަށް ކޯޕަރޭޓް ރެސިޑެންޓް ވިސާ މިހާރު ލިބޭނެއެވެ. ޑރ މައުސޫމް ވިދާޅުވީ އަލަށް ތައާރަފުކުރާ ވިސާ ވާންޖެހޭނީ ކޯޕަރޭޓް ރެސިޑެންޓް ވިސާއާއި މިހާރު ދޫކުރަމުން އަންނަ ހާއްސަ ވިސާއާއި ދޭތެރޭ މެދަށް ފެތޭ ވިސާއަކަށެވެ.
ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު އަޙްމަދު ޙުސައިން ވެސް ވިދާޅުވީ ވިސާއާއި ގުޅޭ ޤާނޫނަށް އިސްލާޙްތަކެއް ގެނައުމުގެ މަސައްކަތް މިހާރު ފަށާފައިވާކަމަށެވެ. އަދި އެކަމާއި ގުޅިގެން ބައެއް ދިރާސާތައް ކުރަމުން އަންނަކަންވެސް ކޮންޓްރޯލަރ ވަނީ ފާހަގަކުރައްވާފައެވެ.
ރާއްޖެއަކީ މުއްސަދިންގެ މެދުގައި މަޤްބޫލް މަންޒިލެކެވެ. މިކަން ރާއްޖޭގައި ތަރައްޤީކޮށްފައިވާ މަތީ ފަންތީގެ ރިސޯޓްތަކަށް އޮންނަ ޑިމާންޑަށް ބަލާލުމުންނާއި، ރާއްޖެއަށް ޖެޓުތަކުގައި އަންނަ ފަތުރުވެރިންގެ އަދަދުތަކަށް ބަލާލުމުން އެނގެއެވެ.
ފަތުރުވެރިކަމުގައި ރާއްޖެއާއި ވާދަކުރާ ޤައުމުތަށްވެސް އިތުރުވަމުންދާއިރު، މިފަދަ ވިސާއަކާއި އެކު ރާއްޖޭގެ މަޤްބޫލްކަން ފަތުރުވެރިންގެ މެދުގައި އިތުރުވެގެންދާނެ ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކުން ބުނެއެވެ.