އައްޑޫއިން ކޯވިޑް 19އަށް ބަޔަކު ޕޮޒިޓިވްވެގެން މޮނީޓަރިންއަށް ލީތާ 36 ދުވަސް ފަހުން، އެ ސިޓީ މޮނީޓަރިންއިން ނަގައިފިއެވެ.
އައްޑޫސިޓީ މޮނީޓަރިންއަށް ލާފައިވަނީ ހިތަދޫ ފްލޫ ކްލިނިކަށް ދިޔަ ބަޔަކު ޕޮޒިޓިވްވުމާއި ގުޅިގެންނެވެ. މިކޭސްތަކާއި ގުޅިގެން އައްޑޫ ސިޓީ އެއްކޮށް މޮނީޓަރިންއަށް ލާފައިވާއިރު، އައްޑޫގައި މައިގަނޑު 3 ކްލަސްޓަރއެއް އުފެދިގެން ދިޔައެވެ. މިކްލަސްޓަރ ތަކުން ޖުމްލަ 91 ފަރާތެއް ޕޮޒިޓިވްވިއެވެ. އަދި މީގެ ތެރެއިން ބައެއް މީހުންނަށް ހޮސްޕިޓަލުގައިވެސް ފަރުވާ ދިނެވެ.
ހިތަދޫއިން ޕޮޒިޓިވް މީހުން ގުޅިގެން ދިޔައީ އޭވިއޭޝަން ކްލަސްޓަރއާއެވެ. މިކްލަސްޓަރ ގުޅިގެން ޕޮޒިޓިވްވީ ގަމުގައި ބޭއްވި ޓްރެއިނިންގއަކާއި ގުޅުން ހުރި ފަރާތްތަކެކެވެ. އަދި އޭގެ ފަހުން އެމީހުންގެ ޑައިރެކްޓް ކޮންޓެކްޓުން ވެސް މިކްލަސްޓަރ ތެރެއިން ޕޮޒިޓިވްވިއެވެ. ދެން އުފެދުނު ކްލަސްޓަރއަކީ، ހުޅުމީދޫ އެމްޓީސީސީ ސައިޓުގައި މަސައްކަތްކުރުމަށް އައި ބަޔަކު ޕޮޒިޓިވްވުމާއެކު އުފެދުނު ކްލަސްޓަރއެވެ. މީގެ އިތުރުން، މީދޫއިން ނެގި ރެންޑަމް ސާމްޕަލްތަކެއް ޕޮޒިޓިވްވެގެން އެރަށުންވެސް ވަކި ކްލަސްޓަރއެއް އުފެދުނެވެ.
އައްޑޫސިޓީ މޮނީޓަރިން ހާލަތަށް ފެބްރުއަރީމަހުގެ 6 ވަނަ ދުވަހު ގެނައުމަށް ފަހު އައްޑޫގެ އެކި އަވަށްތަކުން ރެންޑަމް ސާމްޕަލް ނަގައި ޓެސްޓުތަކެއް ކުރިވިގެން ދިޔައެވެ. އެގޮތުން އައްޑޫއިން ފެބްރުއަރީ 6 އިން ފެށިގެން 5000 އެއްހާ ސާމްޕަލް ޓެސްޓު ކުރިކަމަށް އައްޑޫ އެކުއިޓޯރިއަލް ހޮސްޕިޓަލުން މައުލޫމާތުދެއެވެ.
އައްޑޫގެ އޭވިއޭޝަން ކްލަސްޓަރ ކޮންޓެކްޓް ޓްރޭސިންގއަށް ފަހު ގުޅިފައިވާ ރަށްތަކުން ނެގި ރެންޑަމް ސާމްޕަލްއެއް ޕޮޒިޓިވް ނުވެއެވެ. މީދޫގެ ކޭސްތަކެއް ފެނުމާއެކު ކޮންޓެކްޓް ޓްރޭސިން ހެދުމަށް ފަހު، ބަލި އޮތް މިންވަރު ބެލުމަށް 280 އަށްވުރެ ގިނަ ސާމްޕަލް އެ އަވަށުންވެސް ނެގިއެވެ. އެއިން އެއްވެސް ސާމްޕަލްއެއް ޕޮޒިޓިވް ނުވެއެވެ.
އައްޑޫގެ މޮނީޓަރިން ހާލަތާއެކު ގުޅިފައިވާ ރަށްތަކުގައި އަދި ހުޅުމީދޫގައި ހާއްސަ ފިޔަވަޅުތަކެއް އެޅިގެން ދިޔައެވެ. ނަމަވެސް ފެބްރުއަރީމަހުގެ 23 ވަނަ ދުވަހު އައްޑޫގެ ގުޅިފައިވާ ރައްތަކުގައި އަޅާފައިވާ ހާއްސަ ފިޔަވަޅުތައް އުވާލިއެވެ. އަދި ހުޅުމީދޫގެ ރެންޑަމް ސާމްޕަލް އަދި ފްލޫ ކްލިނިކަށް ދިޔަ ބައެއް ފަރާތްތައް ޕޮޒިޓިވްވުމާއެކު، ހުޅުމީދޫގައި ފިޔަވަޅުތައް ދަމަހައްޓަން ވަނީ ނިންމާފައެވެ.
މޮނީޓަރިން ހާލަތު އުވާލާފައިވާކަމަށް އަންގާ އެޗްޕީއޭއިން ބުނެފައިވަނީ ކޯވިޑް-19ގެ ސަބަބުން ރައްކާތެރިކަމުގެ ފިޔަވަޅުތައް އެޅުމަށްފަހު، ބަލަން ޖެހޭ ކަންކަން ބެލުމާއެކު އިތުރަށް ފިޔަވަޅުތައް ދަމަހައްޓަން ޖެހޭ ސަބަބެއް ނެތުމާއިއެކު، އައްޑޫސިޓީ މޮނީޓަރިން ހާލަތު އުވާލާފައިވާކަަމަށެވެ.
އައްޑޫގައި މިވަގުތު ޕޮޒިޓިވްވި 91 މީހުންގެ ތެރެއިން ބަލިން ރަނގަޅު ނުވެ ތިބީ ހުޅުމީދޫގައި ތިބި 3 މީހަކުކަމަށް އައްޑޫ އެކުއިޓޯރިއަލް ހޮސްޕިޓަލުން މައުލޫމާތުދެއެވެ.