ހއ.ކެލާގައި 200 އެނދުގެ ހޮޓަލެއް ތަރައްޤީކުރުމަށް ޓުއަރިޒަމް މިނިސްޓްރީން ފިޑޯ ޕްރައިވެޓް ލިމިޓެޑާ ހަވާލުކޮށްފިއެވެ.
ޓުއަރިޒަމް މިނިސްޓްރީގައި މިކަމަށްޓަކައި ބޭއްވި ރަސްމީއްޔާތުގައި އެކުންފުންޏާއި މި މަސައްކަތް ހަވާލު ކޮށްފައިވަނީ، ޢަމަލީ މަސައްކަތް ފަށާތާ 30 މަސް ދުވަހުގެ ތެރޭގައި މަސައްކަތް ނިންމާ ގޮތަށެވެ. މިމަޝްރޫއާ ގުޅޭގޮތުން ޕީއެސްއެމް ނިއުސްއަށް މައުލޫމާތު ދެމުން އެކުންފުނިން ބުނީ، އެއްބަސްވުމުގައި ސޮއިކުރެވިގެން ދިއުމާއެކު ޢަމަލީ މަސައްކަތް ފެށުމުގެ ކުރިން ހަދަންޖެހޭ ލޭންޑް ސާވޭކުރުމާއި، ކުރެހުމާއި އީއައިއޭގެ މަސައްކަތް ކުރާނެ ކަމަށެވެ. އަދި ޕްރިލިމިނަރީ މަސައްކަތް ހައެއްކަ މަސްދުވަސް ތެރޭގައި ނިންމާ، ޢަމަލީ މަސައްކަތް ފެށޭނެ ކަމަށް ލަފާ ކުރެވޭ ކަމަށް އެކުންފުނިން ބުނެއެވެ.
ފިޑޯ ޕްރައިވެޓް ލިމިޓެޑުން ބުނީ ކެލާގައި ތަރައްޤީކުރާ 200 އެނދުގެ މި ހޮޓަލަކީ ރިސޯޓެއްގައި ފެންވަރަށް ޙިދުމަތް ލިބޭނެގޮތަށް ތަރައްޤީ ކުރެވިގެންދާނެ ތަނެއް ކަމަށެވެ. އެގޮތުން ވޯޓާ ސްޕޯޓްސްއާއި ޑައިވް ޙިދުމަތާއި ރެސްޓޯރެންޓްގެ ޙިދުމަތް އެތަނުން ލިބޭނޭކަމަށް އެކުންފުނިން ބުނެއެވެ. މީގެ އިތުރުން ކެލާ ތުނޑީ ސަރަހައްދުގައި ތަރައްޤީކުރާ މި ހޮޓެލުގައި މޫދު ކޮޓަރިތައް ވެސް ހުންނާނެކަމަށް އެކުންފުނިން ބުނެއެވެ
ކެލާގައި ޓޫރިސްޓު ހޮޓަލެއް ޤާއިމު ކުރުމަށް ޓުއަރިޒަމް މިނިސްޓްރީން ހުޅުވާލީ މިދިޔަ އަހަރު ފަހުކޮޅުއެވެ. އެގޮތުން 800،000 އަކަފޫޓުގެ ސަރަހައްދުގައި ހޮޓާ ތަރައްޤީ ކުރުމަށް ވަނީ ނިންމާފައެވެ. ކެލާގެ 100 ކޮޓަރީގެ ހޮޓަލުގެ އިތުރުން، ފަތުރުވެރިކަމަށް އިތުރު 14 ބިމެއް ދޫކޮށް، މިދިޔަ މަހުގެ ތެރޭގައި އެއްބަސްވުމުގައި ސޮއިކޮށްފައިވެއެވެ.