މަޝްހޫރު އެނަމާ ބޯޓު ބަންޑުންޖަހާލި ކާރިޘާއަކީ އަޅުގަނޑުމެންގެ ހަނދާނުން ފިލައިގެން ނުދާނެ ބިރުވެރި ހަނދާނެކެވެ. 2004ވަނަ އަހަރުގެ މާޗް މަހުގެ 17ވީ ބުދަ ދުވަހުގެރޭ ހިނގި ކާރިޘާއަށް މިވަނީ 17 އަހަރު ފުރިފައެވެ.
މިކާރިޘާއަކީ ފަހުގެ ތާރީޚުގައި ރާއްޖެއިން އެއްމެ ގިނަ ޢަދަދެއްގެ މީހުން މަރުވި އެއްމެ ހިތާމަވެރި ކަނޑުމަތީގެ ކާރިޘާއެވެ. މިކަން ހިނގާފައިވަނީ ގއ.ވިލިނގިލިން ފުރައިގެން ގދ.ތިނަދުއަށް 122 މީހުންނާއެކު ދަތުރު ކުރަނިކޮށް އެނަމާބޯޓު ބަންޑުން ޖަހާލައިގެންނެވެ. އެއީ ގދ.ތިނަދޫ ބޯޓެކެވެ.
އެނަމާ ބޯޓުގެ މިދަތުރަކީ ގއ.ވިލިނގިލީގައި އޮތް ޒޯން މުބާރާތުގެ ފުޓުބޯޅަ މެޗެއްބެލުމަށް ތިނަދޫން އެރަށަށް ދިޔަ ބަޔަކު އެނބުރި ތިނަދޫއަށްދާން ކުރިދަތުރެކެވެ. ބޯޓު ބަންޑުންޖަހާލީ އެރޭ 8:30 އެހައިކަންހާއިރުއެވެ. މިކާރިޘާގައި ޖުމްލަ 24މީހުންމަރުވެ 2 މީހަކު ގެއްލުނެވެ. މިއީ ރާއްޖޭގައި ފުރަތަމަ ފަހަކަށް ކާރިޘީ ޙާލަތެއް މެދުވެރިވިކަން ސަރުކާރުން ޢިއުލާންކުރި ޙާދިސާއެވެ.
މި ކާރިޘާގައި އެމަޖެންސީ ޙާލަތުގައި ކުރި މަސައްކަތުގައި ފާހަގަކޮށްލެވޭ އެކަކީ ކާޑެއްދޫ އެއާޕޯޓުގެ އެއަރ ޓްރެފިކް ކޮންޓްރޯލަރއެއްގެ ގޮތުގައި މަސައްކަތް ކުރަމުންދިޔަ ސައްދާމް އަޙްމްދު ސައީދެވެ.
އެދުވަހު އޭއާޕޯޓުގައި ހުރި ސައްދާމްވަނީ އޭނާއާ ދިމާވި ކަންކަން އަޅުގަނޑުމެންނާ ހިއްސާކޮށްފައެވެ. ސައްދާމް ބުނީ، އެރޭ ކުއްލިއަކަށް ލިބުނު މެސެޖަކީ އެނަމާ ބޯޓު ބަންޑުންޖަހާލި ކާރިޘާއާ ގުޅިގެން ސިފައިންގެ ޑައިވަރުންގެ ޓީމެއް މާލެއިން ފުރުމަށް ތައްޔާރުވެފައިވާ ކަމުގެ ޚަބަރުކަމަށެވެ. ކޮންމެ ގޮތަކަށް ހަދާފައިވެސް ކާޑެއްދޫ އެއާޕޯޓުގެ ރަންވޭގައި ހުރި ލައިޓުތައް ރަނގަޅު ކުރުމަށެވެ. ކާޑެއްދޫ އެއަރޕޯޓުގެ ރަންވޭގައި އޭރު ރޭގަނޑު ފްލައިޓް ޖެއްސުން އޮތީ މެދުކަނޑާލާފައެވެ. ސަބަބަކީ ރަންވޭގެ ލައިޓުތައް ހަލާކުވެގެން އޭރު އަދި މަރާމާތު ނުކުރެވި އޮތުމުގެ ސަބަބުންނެވެ. އެހެންކަމުން ރަންވޭގައި އަލިކަމެއް ނެތެވެ.
" އަހަންނަށް މިކަން ކުރެވޭނެ ގޮތެއް ނޭނގުނު. ޓެކްނީޝަންވެސް ބުނީ ގަޑިއެއްހާއިރު ތެރޭގައި މިކަން ރަނގަޅު ކުރެވޭ ކަމުގެ އުއްމީދެއް ނެތްކަމަށް. އަހަރެން ދެން ހިތަށްއެރީ މަގުމަތީގައި ބޭނުން ކުރާ ހޮޅިބުރި ރަންވޭގެ 4 ކޮޅުގައި ޖަހައިގެން ރަންވޭ ދިއްލުމަށް." ސައްދާމް ބުންޏެވެ.
ސައްދާމު ދެކުނީ ރަންވޭ ނުދިއްލޭ ކަމައްވަންޏާ ރަންވޭގެ ހަތަރު ކޮޅުގައި ހޮޅިބުރި ޖަހައިގެން މަތިން އަންނަ ފްލައިތަކަށް އެންމެ ކުޑަމިނުން ރަންވޭ ވަކި ކުރެވޭނެ ގޮތް ހެދުމެވެ. އޭރު އޭނާ އާއި އެތަނުގެ ޓެކްނީޝަންވެގެން މަސައްކަތް ކުރަން ފެށިއިރު، ބޭނުންވާ ވަރަށް ކަރަންޓު ވައިރުވެސް ނެތެވެ. އަދި އެމަސައްކަތް ގަޑިއެއްހާއިރުގެ ތެރޭގައި ނިންމޭވަރަށް މީހުންނެއްވެސް ނެތެވެ. އޭރު އެއާޕޯޓުގެ ގިނަ މުވައްޒަފުން ތިބީ ހިނގައިގެން އުޅޭ ހިތާމަވެރި ކާރިޘާއާ ގުޅިގެން ތިނަދޫގައެވެ.
އެހެންނަމަވެސް ސައްދާމަށް ގޮތެއް ހުހެއްނުވެއެވެ. ފްލައިޓް ގެއްސޭ ވަރަށް ރަންވޭ އަލިކުރެވޭނެ ގޮތް ހެދިއެވެ. އާދައިގެ ހޮޅިބުރިތަކެއް ދިއްލައިގެން ރަންވޭ ފާހަގަކުރެވޭ މިންވަރަށް އަލިކުރުމަށް ކުރި މަސައްކަތަށްފަހު އެއަރޕޯޓު ޓަވަރަށް ސައްދާމު އެރިއިރު، ޑޯނިއަރ ޓަވަރަށް މެސެޖު ދިނީ، ރަންވޭ ދިއްލިފައި ނެތް ނަމަ، އައްޑޫ ގަމަށް މިސްރާބު ބަދަލު ކުރާނެ ކަމަށެވެ. ނަމަވެސް ސައްދާމް ރަންވޭ ދިއްލޭނެ ކަމުގެ ޔަޤީން ކަން ކެޕްޓަނަށް ދިނެވެ. ޑޯނިއަރ ފްލައިޓަށް ރަންވޭ ވަކި ކުރެވޭނެ ގޮތަށް ހެދުމަށް، ކާޑެއްދޫގައި ތިބި މުވައްޒަފުންނާއި ޓެކްނިޝަނަށް އެންގީ ރަށުގެ އެހެން ހުރިހައި ބޮތްކެއް ނިވައި ހަމައެކަނި ރަންވޭގައި ހަރުކުރި 4 ހޮޅިބުރި ދިއްލާފައި ބެހެއްޓުމަށެވެ. މިގޮތަށް ހެދުމުން ހަމައެކަނި ރަންވޭ ދިއްލި ރަންވޭ ވަކި ކުރެވޭގޮތް ވިއެވެ.
އޭރު އޭނާ ދިޔައީ ޓަވަރުގައި ހުރި ލައިޓުން ސިގްނަލް ދެމުންނެވެ. ފްލައިޓަށް ޖީޕީއެސް ފިޔަވައި އެހެން ގޮތަކަށް ކާޑެއްދޫ ރަންވޭ ވަކި ކުރެވޭނެ ގޮތަށް ސިގްނަލް ދެމުން ދިޔައެވެ. އެންމެ ފަހުން ފްލައިޓު އެނބުރުމަށް ފަހު، މިވަރުން ފުދޭނެ ކަމަށް ކެޕްޓަން އެންގިއެވެ.
ކެޕްޓަން ފްލައިޓު ޖެއްސުމަށް ފަހު، ސައްދާމާ އެންމެފުރަތަމަ ކުރި ސުވާލަކަށްވީވެސް މިގޮތަށް މިކަން ކުރުމުގެ ޚިޔާލު އައީ ކިހިނެއްހެއްޔެވެ. އެވަގުތާއި ޙާލަތުގައި އޭނާއަކަށް އެ ޚިޔާލައް އައިގޮތް ކިޔައިދޭންވެސް ނޭނގުނެވެ. ކުރެވުނުހާވެސް ކަމަކީ ލޮލުން އޮހިގަތް ކަރުނަތައް ފޮހެލުމަށްފަހު މާތްﷲއަށް ޙަމްދުކުރުމެވެ.
ކޮންމެއަކަސް ޔަޤީންވާ ކަމަކީ އެނަމާބޯޑު ބަންޑުންޖަހާލައި ހިނގި އެ ހިތާމަވެރި ކާރިޘާގައި ކަނޑުވި މީހުންނާއި ގެއްލުނު މީހުން ހޯދުމަށް ކުރިއަށްގެންދިޔަ ރެސްކިއު އޮޕަރޭޝަނަށް މާލެއިން ދިޔަ ޑައިވަރުންގެ ޓީމަށް ކާޑެއްދޫ އެއަރޕޯޓު ރަންވޭއަށް ޖެއްސުމުގެ ފުރުސަތު އެރޭ ލިބުމަކީ އެތައް ފުރާނައެއް ސަލާމަތްކުރުމަށް ލިބުނު އަގުނުކުރެވޭވަރުގެ ފުރުސަތެއްކަމެވެ.
ސައްދާމަށް އައްސަރިބަހާއި ސާބަހެވެ. ޙިކުމަތްތެރިކަމާއެކު އެފަދަ ވަރުގަދަ ހިތްވަރެއް ސައްދާމު ނުކުރިނަމަ މީހުން ސަލާމަތްކުރަން ޑައިވަރުންނާއެކު މާލެއިން އައި ފްލައިޓު ޖައްސަން ޖެހޭނީ އައްޑޫއަތޮޅު ގަމަށެވެ. ގަމުން ފުރައިގެން ކަނޑުމަގުން އެނަމާބޯޑު ބަންޑުން ޖަހާލި ސަރަޙައްދަށް ދިއުމަށް ގިނަވަގުތު ހޭދަވާނެއެވެ.
މިހިތާމަވެރި ދަނޑިވަޅުގައި އާދައާ ޚިލާފު ޤައުމީ ޚީދުމަތެއް ކޮށްދިން ސައްދާމަށް ލިބުނު އެނެމްބޮޑު ހިތާމައަކީ އެކާރިޘާގައި އޭނާގެވެސް ތިމާގެ ބައެއްމީހުން ނިޔާވިކަމެވެ. އެމީހުންގެ ކަށުކަމާކެމީގެ ކަންކަމުގައި ބައިވެރި ވުމުގެ ފުރުސަތުވެސް ސައްދާމަކަށް ނުލިބުނެވެ. އަމިއްލަ ޖަޒުބާތާއި ހިތާމަތަކަށްވުރެ ސައްދާމަށް މުހިންމުވީ ޤައުމީ ޚިދުމަތެވެ. އިންސާނީ ޚިދުމަތެވެ.