އައްޑޫ ސިޓީއިން ކޯވިޑް-19އަށް ޕޮޒިޓިވްވި އެންމެން މިދިޔަ ހަފްތާތެރޭ ބަލިން ރަނގަޅުވެފައިވާކަމަށް އައްޑޫ އެކުއެޓޯރިއަލް ހޮސްޕިޓަލުން ބުނެފިއެވެ.
ޕީއެސްއެމް ނިއުސްއަށް މައުލޫމާތުދެމުން އޭއީއެޗްއިން ބުނީ، އައްޑޫގައި މިބައްޔަށް އެންމެ ފަހުން ޕޮޒިޓިވްވި މީހާ ރަނގަޅު ވެފައިވަނީ، މިދިޔަ ހަފްތާގެ ބުދަދުވަހު ކަމަށެވެ. އަދި އެންމެ ފަހުން ބަލިން ރަނގަޅު ވެފައިވަނީ، މީދޫންއިން ނެގި ރެންޑަމް ސާމްޕަލްއިން ޕޮޒިޓިވްވި މީހުންގެ ކްލަސްޓަރގެ މީހުން ކަމަށްވެސް އެ ހޮސްޕިޓަލުން މައުލޫމާތުދެއެވެ.
މިދިޔަ ފެބްރުއަރީމަހު އައްޑޫއިން ކޯވިޑް ކޭސްތަކެއް ފެނި މުޅި ސިޓީ މޮނީޓަރިންގއަށް ވަނީ ލާފައެވެ. މޮނީޓަރިންއަށް ލީ މުއްދަތުގެ ތެރޭގައި އައްޑޫއިން 92 މީހަކު ޕޮޒިޓިވްވިއެވެ. އޭގެ ތެރެއިން ގިނަ މީހުން ޕޮޒިޓިވްވީ އައްޑޫގެ ގުޅިފައިވާ ރަށްތަކުން ފާހަގަކުރެވުނު އޭވިއޭޝަން ކްލަސްޓަރއިންނެވެ. މީގެ އިތުރުން ހުޅުމީދޫގެ އެމްޓީސީސީ ސައިޓުގައި މަސައްކަތް ކުރުމަށް އައި ބިދޭސީންތަކެއް ވެސް ޕޮޒިޓިވްވިއެވެ. އެ ކްލަސްޓަރ އިން ޖުމްލަ 35 މީހުން ޕޮޒިޓިވްވިއެވެ. މި ދެ ކްލަސްޓަރގެ އިތުރުން ހުޅުމީދޫ ފްލޫ ކްލިނިކަށް ދެއްކި ބައެއް މީހުންވެސް ވަނީ ޕޮޒިޓިވް ވެފައިވެއެވެ.
އައްޑޫގައި ކޯވިޑް-19ގެ ކޭސްތައް ކޮންޓްރޯލް ކުރުމަށް ހާއްސަ ފިޔަވަޅުތަކެއް ވަނީ އަޅާފައެވެ. ނަމަވެސް މަހަކަށްވުރެ ގިނަ ދުވަހަށްފަހު ފިޔަވަޅުތައް ވަނީ އުވާލާފައެވެ.