ދުނިޔެ ވަށާ ބުރު ޖަހަމުންދާ، އެޑަސްޓްރާ ޔޮޓު މިހަފްތާގައި ރާއްޖެ އަންނަގޮތަށް ހަމަޖެހިއްޖެއެވެ.
އެޑަސްޓްރާ މިހަފްތާތެރޭގައި ރާއްޖެ އަންނައިރު، މި ޔޮޓަކީ ދުނިޔޭގެ އެކި ސަރަހައްދުތަކަށް ދަތުރުކޮށް، އެސަރަހައްދުތަކުގެ މީހުންގެ ސަމާލުކަން ހޯދާފައިވާ ޔޮޓެކެވެ.
ޓްރިމަރާންއެއްގެ ގޮތުގައި ފަރުމާ ކުރެވިފައިވާ މި ޔޮޓު، ދެކުނު އިރުމަތީ އޭޝިއާ، ޕެސިފިކް ސަރަހައްދު، ކެރީބިއަން، އެމެރިކާ ބައްރާއި، ދުބާއި އަދި ސައުދީ އަރަބިއްޔާގެ ރެޑް ސީ ސަރަހައްދުގެ އިތުރުން މެދުއިރުމައްޗަށް މިދަތުރުގެ ތެރެއިން މިހާތަނަށް ވަނީ ދަތުރުކޮށްފައިވެއެވެ. އަދި މަޝްހޫރު ޕެނަމާ ކެނާލް އާއި ސުއޭސް ކެނާލް ވަނީ ހުރަސްކޮށްފައެވެ.
ޔޮޓުގެ ނަން "އެޑަސްޓްރާ" މާނަ ކުރަނީ ތަރިތަކަށް ދިއުމަށެވެ. އެޑަސްޓްރާ ފަރުމާ ކުރެވިފައިވާ ގޮތުން މި ޔޮޓަކީ ރަށްރަށަށް ފަސޭހަކަމާއެކު ކައިރި ކުރެވޭ ޔޮޓެކެވެ. އަދި މި ޔޮޓުގެ މައިގަނޑު 3 ބައެއް އެކުލެވޭ އިރު، މިތިން ބައި ގުޅުވައިދޭގޮތަށް ޔޮޓުގެ ހުރަހަށް އޮތް 16 މީޓަރު ބީމުގެ ސަބަބުން ޔޮޓުގެ ޖާގަ އެންމެ ފުރިހަމަ ގޮތުގައި ބޭނުން ކުރެވެއެވެ. އެގޮތުން މިގޮތުގައި 9 މީހުންނަށް ނިދޭގޮތަަށް 3 ކޮޓަރި މިޔޮޓުގައި ހުރެއެވެ.
މިޔޮޓު ބަނދެފައިވަނީ އޮސްޓްރޭލިޔާގެ މެކްކޮގަނީ ބޯޓްސް ނަމަކަށް ކިޔާ ކުންފުންޏަކުން ޗައިނާގެ ޒުހާއީގައެވެ. މިޔޮޓުގެ ބަންނަން ގާތްގަނޑަކަށް 15 މިލިއަން ޑޮލަރު ހޭދަކޮށްފައިވެއެވެ. އަދި މިހާތަނަށް އައިރު މިޔޮޓަށް ޝަރަފުވެރި އެވޯޑްތަކެއް ވަނީ ލިބިފައެވެ.