ސަރުކާރުން މަސައްކަތްކުރަމުން ދަނީ އައްޑޫ ސިޓީގެ ތަރައްޤީގެ މަސައްކަތުގައި "ހައި ޖަމްޕެއް" ޖެހޭތޯކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލް ވިދާާޅުވެއްޖެއެވެ.
އެމްޑީޕީން ކުރިއަށްގެންދާ "ރަށްވެހި ފަތިސް" ކެމްޕެއިނުގައި އައްޑޫ ސިޓީއަށް ޚާއްސަކޮށްގެން ބޭއްވި ބައްދަލުވުމުގައި ވާހަކަފުޅުދައްކަވަމުން މިނިސްޓަރ ފައްޔާޒް ވިދާޅުވީ މާލެ ސިޓީއަށް ފަހު އެންމެ ބޮޑަށް ތަރައްޤީވެފައި އޮތީ އައްޑޫ ސިޓީ ކަމަށެވެ. އެހެންކަމުން އައްޑޫ ސިޓީއަކީ މާލެ ފިޔަވައި އެންމެ ބޮޑު ބަދަލެއް، އެންމެ އަަވަސް މުސްތަޤްބަލެއްގައި ގެނެވޭނެ ސަރަޙައްދުކަމަށް ފައްޔާޒު ވިދާޅުވިއެވެ.
"އެންމެ ބޮޑު ބަދަލެއް އެންމެ އަވަހަށް ގެނެވޭނެ، އެންމެ މެޓީރިއަލް ބަދަލެއް ގެނެވޭނެ ތަނަކީ އައްޑޫއަށް ވަތީވެ، އަޅުގަނޑުމެން އައްޑޫގެ ވަޢުދު ނާމާގެ ތެރެއިން، އައްޑޫގެ ރައްޔިތުންގެ ފަރާތުން ލިބުނު ހިޔާލްތަކާއި އެއްގޮތަށް މަސައްކަތްކުރަމުން މިދަނީ" މިނިސްޓަރ ފައްޔާޒް ވިދާޅުވިއެވެ.
މިނިސްޓަރ ފައްޔާޒް ވަނީ އައްޑޫ ސިޓީއަށް އަމާޒްކޮށްގެން ކުރިއަށްގެންދާ މަޝްރޫޢުތަކުގެ ތަފްސީލްތައްވެސް ދެއްވާފައެވެ. އެގޮތުން އައްޑޫ ސިޓީގެ މަގުތަކާއި، ބިން ހިއްކުމާއި، އަދި ގަން އންޓަރނޭޝަނަލް އެއަރޕޯޓް ތަރައްޤީކުރުމުގެ މަސައްކަތް ކުރިއަށްދާކަމަށް މިނިސްޓަރ ވިދާޅުވިއެވެ. އަދި އެހުރިހާ ޕްރޮޖެްކްޓްތައް އެއްކޮށްލީމަ އެއީ ގާތްގަނޑަކަށް 180 މިލިއަން ޑޮލަރުގެ މަސައްކަތްކަންވެސް މިނިސްޓަރ ފާހަގަކުރެއްްވިއެވެ.
ފައްޔާޒުގެ ވާހަކަފުޅުގައި އައްޑޫ ސިޓީން ބިން ހިއްކާއިރު ފަތުރުވެރިކަމަށް އިތުރު ރިސޯޓްތައް ތަރައްގީކުރުމަށް އިސްކަން ދެއްވާނެކަމަށްވެސް ވިދާޅުވިއެވެ. އަދި އިތުރު ސަރަޙައްދުތަކުން ފަތުރުވެރިކަމަށް އެނދުތައް ތަރައްޤީކުރުމަށް ރާވާފައިވާކަމަށްވެސް ފައްޔާޒު ވިދާޅުވިއެވެ.