ރިސޯޓް ތަރައްޤީކުރަން ބިޑް ހުށަހެޅުމަށް ޝައުގުވެރިވާ އިންވެސްޓަރުންނަށް މިހާރު ހުރި ބައެއް ދަތިތަކަށް ހައްލެއް ގެނައުމަށް މަސައްކަތްކުރަމުންދާކަމަށް ޓޫރިޒަމް މިނިސްޓަރ އަބްދުﷲ މަޢުސޫމް ވިދާޅުވެއްޖެއެވެ.
މިނިސްޓަރ މަޢުސޫމް ވިދާޅުވީ ފަތުރުވެރިކަން ތަރައްޤީކުރަން ހުޅުވާލާ ރަށްތަކަށް ބިޑު ހުށަހެޅުމުގެ ޕްރޮސެސްގައި ދަތިތަކެއް ހުރިކަމަށް އިންވެސްޓަރުން ފާހަގަކޮށްފައިވާ ކަމަށެވެ. މިއާއެކު ބިޑިންގ ޕްރޮސެސް މުރާޖާކޮށް، އެފަދަ ދަތިތަކަށް ހައްލެއް ގެނައުމުގެ މަސައްކަތް ކުރަމުންދާކަމަށް މިނިސްޓަރ ވިދާޅުވިއެވެ.
"އެންމެ ބޮޑު ކަމަކަށް އިންނާނީ މިހާރު ބޭސިކް ލީސްގައި އޮންނާނެ ކަނޑައަޅާފަ ދެ ކަމެއް، އެއް ކަމަކީ ޕްރައިމް ރޭޓެއްގެ ގޮތުގައި ކަނޑައަޅެފައި އިންނަ ކަނޑައެޅުމެއް، އަނެއް ކަމަކީ ލޯންއަށް ބަލާފަ ކަނޑައަޅާފައި އިންނަ ކަނޑައެޅުމެއް، ލޯންއަށް ބަލާފައިންނަ ކަނޑައެޅުންވެސް އިންނާނީ ބޮޑުކޮށް، ޕްރައިމް ލޮކޭޝަން ކޮމްޕޯނަންޓެއްވެސް އިންނާނެ، މި އެއްޗެހި ރިވިއުކޮށްފައި، މަރކެޓް ވެލިއުއަށް ބޭސް ލީސް އެކިއުޒިޝަން ކޯސްޓް އެޖެސްޓް ކުރުމަށް ވިސްނާފައިވަނީ،" މިނިސްޓަރ މަޢުސޫމް ވިދާޅުވިއެވެ.
މިނިސްޓަރ ވިދާޅުވީ ބިޑިންގ ޕްރޮސެސްއަށް ގެންނަ ބަދަލުތަކާއެކު މަރކެޓްގައި އެންމެ ދަށްވެގެން ހުށަހެޅޭނެ އަގަށް ބަދަލުތަކެއް އަންނާނެ ކަމަށެވެ. އަދި މިކަމުގެ ސަބަބުން އިންވެސްޓަރުންނަށް ގިނަ ފަސޭޙަތަކެއް ލިބިގެންދާނެކަން މިނިސްޓަރ ފާހަގަކުރެއްވިއެވެ.
ޓޫރިޒަމް މިނިސްޓްރީން މިދިޔަ ޑިސެމްބަރުމަހުގެ ތެރޭގައި ވަނީ ރާއްޖޭގެ 4 އަތޮޅަކުން 3 ރަށާއި އަދި ބިމެއް، ރިސޯޓު ތަރައްޤީކުރުމަށް ހުޅުވާލައިފައެވެ. ޓުއަރިޒަމް މިނިސްޓްރީން ރިސޯޓު ތަރައްޤީކުރުމަށް ހުޅުވާލާފައިވަނީ، ހއ. އަލިދުއްފަރުފިނޮޅު، ށ. ކުޑަޅައިމެންދޫ ނ. ކުންނަމަލެއި އަދި ހދ އަތޮޅުން ދަނޑުވެރިކަމަށް ދޫކޮށްފައިވާ ވައިކުރަމުރައިދޫން 15 ހެކްޓަރުގެ ބިމެކެވެ. މުއްދަތު ހަމަވި އިރު ބިޑް ހުށަހަޅާފައިވަނީ އެންމެ ފަރާތަކުންނެވެ. އެއީ ނ. އަތޮޅުން ހުޅުވާލި ރަށަށެވެ.
މިނިސްޓަރ ވިދާޅުވީ މިރަށްތަކަށްވެސް ޝައުގުވެރިވެ، 30 ފަރާތަކުން މައުލޫމާތު ސެޝަންގައި ބައިވެރިވިކަމަށާއި، 6 ފަރާތަކުން ބިޑްވެސް ގަތްކަމަށެވެ. އެެހެން ނަމަވެސް ތަފާތު އެކި ސަބަބުތަކާއި ހުރެ މުއްދަތު ހަމަވިއިރު، ބިޑް ހުށަހަޅާފައިވަނީ އެންމެ ރަށަކަށް ކަމަށް މިނިސްޓަރ ވިދާޅުވިއެވެ.
"މި ބަލަނީ ވެކްސިން ޖެހިގެން އިންވެސްޓަރުންނަށް ދަތުރުކުރެވެން ފެށީމައި، ރަށްތަކުގެ ޑިމާންޑު ބޮޑުވެގެންދާނެ ކަމަށް، އިންވެސްޓަރުން ބޭނުންވޭ ރަށަކަށް ބިޑްކުރުމުގެ ކުރިން އެރަށެއް ބަލާލަން،" މިނިސްޓަރ ވިދާޅިވިއެވެ.
މިނިސްޓަރ ވިދާޅުވީ މިއަހަރަކީ "ޓޫރިޒަމް އިންވެސްޓްމަންޓް" އަހަރަށްވެގެންދާނެ ކަމަށެވެ. އެގޮތުން މިއަހަރުތެރޭ ގިނަ އަދަދެއްގެ ރަށްތަކާއި ބިންތައް ރިސޯޓް ތަރައްޤީކުރުމަށް ބިޑަށް ލުމަށް ޕްލޭން ކުރެވިފައިވާކަމަށް މިނިސްޓަރ ވިދާޅުވިއެވެ.