ދުނިޔޭގެ އެންމެ ބޮޑު 3ޑީ ޕްރިންޓެޑް ފަރުގެ ގޮތުގައި، ސަމާ އައިލޭންޑުގެ ބްލޫ ލެގޫން ސަރަހައްދުގައި ހަދާފައިވާ މަސްނުވީ ފަރު، ދުނިޔޭގެ ރެކޯޑު ފޮތުން ޖާގަ ހޯދައިފިއެވެ.
ގިނިސް ބުކް އޮފް ވޯލްޑް ރެކޯޑްސް ފޮތުން ޖާގަ ހޯދި މިމަސްނުވީ ފަރު، ތަރައްޤީ ކުރުމުގެ މަސައްކަތް ފެށީ 2018 ވަނަ އަހަރުއެވެ. އެގޮތުން ރިސޯޓުގެ ބްލޫ ލެގޫން ސަރަހައްދަށް މަސްނުވީ ފަރެއް ފަރުމާކޮށް ވަނީ ފައްތާލާފައެވެ. މިފަރު ފަރުމާ ކުރުމުގެ މަަސައްކަތް ފެށުނީ އޮސްޓްރޭލިއާގެ މެލްބަންގައި ރީފް ޑިޒައިން ލެބުގައެވެ. މި މަސްނުވީ ފަރު ފަރުމާކުރުމުގެ މަސައްކަތް ކުރި އެލެކްސް ގޯޑްގެ ބޭނުމަކަށްވީ ރާއްޖޭގެ ރަށްތައް ވަށައިގެން ހުންނަ ކަހަލަ ފަރެއް ފަރުމާކުރުމެވެ.
މިގޮތުން ފަރު ފަރުމާކޮށްފައިވަނީ ސެރަމިކް އިންނެވެ. އަދި އޭގެފަހުން އެކި ބައިބަޔަށް ފަރުގެ ބައިތައް ރާއްޖެ ގެނެސް، މޭރިން ކޮންކްރީޓް އެޅުމަށްފަހު 7 މީޓަރު އަޑިއަށް ވަނީ ފައްތާލާފައެވެ. މިތަން ޤާއިމުކޮށްފައިވަނީ ރިސޯޓުގައި މިހާރުވެސް ހުރި ކޮރަލް ނާސަރީ ކައިރީގައެވެ. އަދި އެ ނާސަރީން ބައެއް މުރަކަ ގެނެސް މި މަސްނުވީ ފަރުގައި ދަނީ ބަހައްޓަމުންނެވެ.
ސަމާ އައިލޭންޑުގެ ރިސޯޓު މެނޭޖަރ މަރީ ޝަރީފް ވިދާޅުވީ، ސަމާ އައިލެންޑުގެ މަސްނުވީ ފަރަށް މިފަދަ ލަޤަބެއް ލިބުމަކީ ވަރަށް އުފާވެރިކަމެއް ކަމަށާއި، ނަމަވެސް ތިމާވެށި ރައްކާތެރި ކުރުމަށް ކުރަންޖެހޭ ބުރަ މަސައްކަތް ހަނދާން ނައްތާލައިގެން ނުވާނެ ކަމަށެވެ. އެގޮތުން ފިޔަވަހިތަކަކަށް ބަހާލައިގެން ސިންގަލް ޔޫޒް ޕްލާސްޓިކް ރިސޯޓުގައި ބޭނުން ކުރުން މަނާ ކުރުމާއި ބޭރުން ފެން އެތެރެކުރުންވެސް މަނާ ކޮށްފައިވާކަން އޭނާ ފާހަގަކުރެއްވިއެވެ.
ސަމާ އައިލޭންޑުން ތަރައްޤީކުރާ މަސްނުވީ ފަރު ދުނިޔޭގެ ރެކޯޑު ފޮތުން ޖާގަ ހޯދާފައިވާއިރު، މިފަރުގެ ނަކަލެއް ނިއުޔޯކުގެ މިއުޒިއަމް އޮފް މޮޑާން އާޓްސްގައި ވެސް ވަނީ ބަހައްޓާފައެވެ.
ސަމަރ އައިލެންޑް ރިސޯޓުން ވަނީ ދާދިފަހުން ހޮލިޑޭ ގޯލްޑް ޗެކް އެވޯޑުވެސް ހާސިލްކޮށްފައެވެ. އަދި 2017، 2018 އަދި 2019 ވަނަ އަހަރު ދެކުނު އޭޝިއާގެ ލީޑިންގް ބީޗް ރިސޯޓުގެ ލަޤަބު، ސަޓާ އެވޯޑްސްގައި އެރިސޯޓުން ވަނީ ހޯދާފައެވެ.