އައްޑޫސިޓީއަށް ރޭ ކުރި ވިއްސާރައިގައި ބައެއް ގެތަކަށް ގެއްލުންވެފައިވާ އައްޑޫ ސިޓީ ކައުންސިލުން ވިދާޅުވެއްޖެއެވެ.
އައްޑޫ ސިޓީގެ މޭޔަރ އަބްދުﷲ ސޯދިޤް ވިދާޅުވީ، ރޭގެ ދަންވަރު 3:00 އިން ފެށިގެން ކުރި ވިއްސާރައިގައި އައްޑޫ ސިޓީގެ އެކި އަވަށްތަކުގެ ގެތަކަށް ފެން ވަދެ، ބައެއް ގެތަކުގެ ފުރާޅުވެސް އެއްލާލާފައިވާކަމަށެވެ.
މޭޔަރ ވިދާޅުވީ ގެތަކަށް ލިބުނު ގެއްލުން ސިޓީ ކައުންސިލުން ބަލަމުންދާކަމަށެވެ. އަދި މިވަގުތު އެމްއެންޑީއެފް ޕޮލިސް އަދި ކައުންސިލްގެ ޕަބްލިކް ވޯކްސް މުވައްޒަފުން ގުޅިގެން ފެން ހިނދުމާއި ވެލި ބަސްތާ ޖެހުމުގެ އިތުރުން ލިބުނު ގެއްލުންތައް ބަލާ އެހީތެރިކަން ފޯރުކޮށްދެމުންދާކަމަށް މޭޔަރ ވިދާޅުވިއެވެ.
އައްޑޫސިޓީ ކައުންސިލުން ވިދާޅުވީ ވިއްސާރައިގެ ސަބަބުން މިހާތަނަށް ހިތަދޫ 9 ގެއެއް، މަރަދޫ 3 ގެއެއް، މަރަދޫ ފޭދޫގެ އެއް ގެ އަދި ފޭދޫގެ 8 ގެއަކަށް ގެއްލުންވެފައިވާކަމަށް ރިޕޯޓްކޮށްފައިވާކަމަށެވެ.
މީގެ އިތުރުން މީދޫ އަވަށުން 2 ގެއަކުން ގެއްލުން ވެގެން ރިޕޯޓު ކޮށްފައިވާކަމަށްވެސް ކައުންސިލުން ވިދާޅުވެއެވެ.
ރާއްޖޭގެ ދެކުނުގެ ދެ ސިޓީއަށް ކުރަމުންދާ ވިއްސާރައިގެ ސަބަބުން މޫސުމަށް ސަމާލުމަށް ވަނީ އަންގާފައެވެ.