ކޯވިޑަށްފަހު އެއްމަހެއްގެ ތެރޭގައި ފުރަތަމަ ފަހަރަށް އެއްލައްކަ ފަތުރުވެރިން ރާއްޖެއަށް ޒިޔާރަތްކުރުން ފާހަގަކޮށްފިއެވެ.
މިމަހު ރާއްޖެއަށް އައި ފަތުރުވެރިންގެ އަދަދު ލައްކައަށްވުރެ މައްޗަށް އެރުން ފާހަގަކޮށް، އެއްލައްކަ ވަނަ ފަތުރުވެރިޔާއަށް ވެލާނާ އިންޓަރނޭޝަނަލް އެއަރޕޯޓުން ވަނީ މިއަދު ޙޫނު މަރުޙަބާއެއް ކިޔާފައެވެ.
މިމަހު ރާއްޖެއަށް އައި އެއް ލައްކަވަނަ ފަތުރުވެރިޔާއަކީ ހަނީމޫނަށް ރާއްޖެއަށް އައި މިސްރުގެ ރައްޔިތެއް ކަމުގައިވާ ހަނާ މުޙައްމަދު އަޙްމަދު ކަމަލް މުސްތަފާއެވެ. އޭނާ ބުނީ ހަނީމޫނަށް ރާއްޖެއަށް އައުމަށް ނިންމީ ރާއްޖޭގެ ގުދުރަތީ ރީތިކަމުގެ ސަަބަބުން ކަމަށެވެ.
"ވަރަށް އުފާވެއްޖެ ރާއްޖެއިންކީ މަރުޙަބާއަށް، އަދިވެސް ރާއްޖެއަށް ޒިޔާރަތްކުރަން ބޭނުން، ހަނީމޫނަށް ރާއްޖެއަށް އައުމަށް ނިންމީ ރާއްޖޭގެ ޤުދުރަތީ ރީތިކަމުގެ ސަބަބުން" ހަނާ ބުންޏެވެ.
މިމަހު ރާއްޖެއަށް ޒިޔާރަތްކުރި އެއްލައްކަވަނަ ފަތުރުވެރިޔާއަށް މަރުޙަބާ ކިޔުމަށްފަހު ޕީއެސްއެމް ނިއުސްއަށް ދެއްވި އިންޓަރވިއުއެއްގައި މިނިސްޓަރ އޮފް ޓޫރިޒަމްގެ ނައިބު އަޙްމަދު ޢާޠިފް ވިދާޅުވީ އެއް މަސްދުވަސްތެރޭ ރާއްޖެއަށް އެއް ލައްކަ ފަތުރުވެރިން އައުމުން ދައްކައިދެނީ ރާއްޖެއިން މިއަހަރަށް ހިފާފައިވާ 1.5 މިލިއަން ފަތުރުވެރިންގެ އަމާޒް ހާސިލްކުރެވޭނެކަން ކަމަށެވެ.
"ޓޫރިޒަމް ރަނގަޅުވަމުން މިދަނީ، މިއަހަރުގެ ޓާގެޓަކީވެސް 1.5 މިލިއަން ފަތުރުވެރިން ގެނައުން، މިހާރު ހިތްވަރު ލިބިގެން މިދިޔައީ، މިކުރާ މަސައްކަތް ކާމިޔާބު ވާކަން، މުޅި އިންޑަސްޓްރީން ކުރާ މަސައްކަތްތައް ކާމިޔާބުކަން،" މިނިސްޓަރގެ ނައިބު އަޙްމަދު ޢާޠިފް ވިދާޅުވިއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ކޯވިޑާއި ގުޅިގެން ރާއްޖޭގެ ބޯޑަރު ބަންދު ކުރުމަށްފަހު އަލުން ހުޅުވާލި ޖުލައިމަހު ރާއްޖެއަށް އައިސްފައިވަނީ 1701 ފަތުރުވެރިންނެވެ. އަދި އޮގަސްޓު މަހު 7628 ފަތުވެރިއަކު ރާއްޖެ ޒިޔާރަތްކޮށްފައިވެއެވެ. އަދި ސެޕްޓެމްބަރުމަހު ރާއްޖެއަށް އައިސްފައިވަނީ 9538 ފަތުރުވެރިންނެވެ.
އޮކްޓޫބަރުމަހު ރާއްޖެއަށް 21515 ފަތުުރުވެރިން ޒިޔާރަތްކޮށްފައިވާއިރު، ނޮވެމްބަރުމަހު ރާއްޖެއަށް ވަނީ 35759 ފަތުރުވެރިން ޒިޔާރަތްކޮށްފައެވެ. ޑިސެމްބަރުމަހު ރާއްޖެއަށް އައިސްފައިވަނީ 96225 ފަތުރުވެރިންނެވެ. މިއަހަރުގެ ޖެނުއަރީމަހު ރާއްޖެއަށް 92103 ފަތުރުވެރިން އައިސްފައިވެއެވެ. އަދި ފެބްރުއަރީމަހު ރާއްޖެއަށް އައިސްފައިވަނީ 96882 ފަތުރުވެރިންނެވެ. އަދި މިމަހު މިހާރު މިވަނީ އެއްލައްކައަށް ވުރެ ގިނަ ފަތުުރުވެރިން ރާއްޖެއަށް ޒިޔާރަތްކޮށްފައެވެ.
މި އަދަދުތަކުންވެސް އެނގިގެންދަނީ ފަތުރުވެރިންގެ މެދުގައި ރާއްޖެެއާއި މެދު އޮންނަ މަޤްބޫލްކަން އިތުރުވެ، މަހުން މަހަށް ރާއްޖެއަށް އަންނަ ފަތުރުވެރިންގެ އަދަދުތައް އިތުރުވަމުންދާ ދިއުމެވެ.