ޗައިނާ ފަތުރުވެރިން އަލުން ގެނައުމުގެ މަސައްކަތް ދަނީ ކުރަމުން: މިނިސްޓްރީ

ޗައިނާއިން ރާއްޖެއަށް ފަތުރުވެރިން ގެނައުމާއި ގުޅޭގޮތުން މަޝްވަރާތައް ކުރެވެމުންދާކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ކޯވިޑްގެ ކުރިން ރާއްޖެއަށް އެންމެ ގިނަ ފަތުރުވެރިން އަންނަމުން ދިޔައީ ޗައިނާއިންނެވެ. އެހެންނަމަވެސް ކޯވިޑާއި ގުޅިގެން އެޤައުމުން އަޅާފައިވާ ރައްކާތެރިކަމުގެ ފިޔަވަޅުތަކާއެކު ޗައިނާއިން ރާއްޖެއަށް ފަތުުރުވެރިން އައުން ވަނީ މަޑުޖެހިފައެވެ.

ޕީއެސްއެމް ނިއުސްއަށް ދެއްވި އިންޓަރވިއުއެއްގައި ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ އަޙްމަދު ޢާޠިފް ވިދާޅުވީ ޗައިނާއިން އަޅާފައިވާ ފިޔަވަޅުތަކަށް ލުއި ލިބި، އެޤައުމުގެ ބޯޑަރުތައް ހުޅުވާލުމާއެކު އެޤައުމުން ރާއްޖެއަށް ގިނަ އަދަދަކަށް ފަތުރުވެރިން އަންނާނެކަމަށް އުއްމީދު ކުރެވޭ ކަމަށެވެ.

" ފެށޭނެ ދުވަހެއް ބުނަން އަދި ނޭންގޭ، ޗައިނާއިން ނަގާ ޑިޝިޝަންތަކަށް ޑިޕެންޑްވާނެ، ކޯވިޑުން ސަލާމަތްވުމަށް ކުރާ މަސައްކަތުން ނިކުންނަ ޕޮޒިޓިވް ނަތީޖާތަކަށް މައްޗަށް ބިނާވެގެންވަނީ، ބެލެވެނީ މާ ގިނަ ދުވަސްތަކެއް ނުވެ ޗައިނާ މަރކެޓު ހުޅުވިގެންދާނެ ކަމަށް" މިނިސްޓަރގެ ނައިބު އަޙްމަދު ޢާޠިފް ވިދާޅުވިއެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން 2019 ވަނަ އަހަރު ރާއްޖެއަށް ޖުމްލަ 1.7 މިލިއަން ފަތުރުވެރިން ވަނީ ޒިޔާރަތްކޮށްފައެވެ. މީގެތެރެއިން 284029 ފަތުުރުވެރިންނަކީ ޗައިނާއިން ރާއްޖެއަށް ޒިޔާރަތްކޮށްފައިވާ ފަތުރުވެރިންނެވެ. މިއީ އެއަހަރުތެރޭ ރާއްޖެއަށް ޒިޔާރަތްކޮށްފައިވާ ޖުމްލަ ފަތުރުވެރިންގެ 16.7 އިންސައްތައެވެ.