މިއަހަރުގެ ފުރަތަމަ 3 މަސްދުވަހު ރާއްޖެއަށް 297,000އަށްވުރެ ގިނަ ފަތުރުވެރިން ރާއްޖެ އައިސްފިއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރު ފެށުނުފަހު މަހަކުން މަހަކަށް ރާއްޖެ އަންނަ ފަތުރުވެރިންގެ ޢަދަދު އަންނަނީ އިތުރުވަމުންނެވެ. އެގޮތުން ޖަނަވަރީ މަހު ރާއްޖެ އައިސްފައިވަނީ 92،103 ފަތުރުވެރިންނެވެ.
ފެބްރުއަރީ މަހު 96،882 ފަތުރުވެރިން ވަނީ ރާއްޖެ އައިސްފައެވެ. އަދި މާރޗް މަސް ވެފައިވަނީ ބޯޑަރު ހުޅުވާލިފަހުން އެއްމަހެއްގައި ރާއްޖެއަށް 1 ލައްކައަށްވުރެ ގިނަ ފަތުރުވެރިން އައި ފުރަތަމަ މަހަށެވެ. އެގޮތުން މާރޗް މަހުގެ ތެރޭގައި ރާއްޖެއަށް 109،585 ފަތުރުވެރިން ވަނީ ރާއްޖެ އައިސްފައެވެ. މިއާއިއެކު މިއަހަރުގެ ފުރަތަމަ 3 މަސްދުވަހު ރާއްޖެ އައި ފަތުރުވެރިންގެ ޖުމްލަ ޢަދަދަކީ 298،570 އެވެ.
މިދިޔަ މާރޗް މަހު އެއްދުވަހެއްގައި އެންމެ ގިނަ ފަތުރުވެރިން ރާއްޖެ އައިސްފައިވަނީ އެމަހުގެ 26ވަނަ ދުވަހުއެވެ. އެއީ މިއަހަރުގެ މިހާތަނަށް އެންމެ ގިނަ ފަތުރުވެރިން އައި ދުވަސްވެސްމެއެވެ. އެދުވަހު ރާއްޖެއަށް 5،516 ފަތުރުވެރިން ވަނީ ރާއްޖެ އައިސްފައެވެ. އެންމެ މަދުން ފަތުރުވެރިން އައިދުވަހު ރާއްޖެ އައިސްފައިވަނީ 2،368 ފަތުރުވެރިންނެވެ. އެއީ މާރޗް މަހުގެ 10ވަނަ ދުވަހުއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ ޖަނަވަރީ މަހު އެވްރެޖްކޮށް ރާއްޖެއަށް ދުވާލެއްގެ މައްޗަށް 2،971 ފަތުރުވެރިން ވަނީ އައިސްފައެވެ. ފެބްރުއަރީ މަހު 3،460 ފަތުރުވެރިން ރާއްޖެ އައިއިރު މާރޗް މަހު އެވްރެޖްކޮށް ދުވާލެއްގެ މައްޗަށް ރާއްޖެ އައިސްފައިވަނީ 3،535 ފަތުރުވެރިންނެވެ.
އަހަރުގެ ފުރަތަމަ 3 މަސްދުވަހު ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ އިންޑިއާއިންނެވެ. އެއީ ރާއްޖެ އައި ފަތުރުވެރިންގެ %23.4 އެވެ. 2 ވަނައިގައި އުޅެނީ ރަޝިއާއެވެ. އެއީ %21.3 އާއެކުގައެވެ. އަދި 3ވަނައަށް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ޔުކްރެއިނުންނެވެ.
ކޯވިޑް-19އަށްފަހު ފަތުރުވެރިންނަށް ޚިދުމަތް ދިނުމަށް މިހާރު ރާއްޖޭގައި 694 ތަނެއް ވަނީ އަލުން ހުޅުވާފައެވެ. މިއާއިއެކު 46،157 އެނދު ވަނީ އަލުން އޮޕަރޭޝަނަށް ގެނެސްފައެވެ.