ރިސޯޓު އިމާމުން ތަމްރީނު ކުރުމުގެ ޕްރޮގްރާމުގައި ދަސްވެނިވި 72 ފަރާތަކަށް އެކަމުގެ ހަނދާނީ ލިއުން އަރުވައިފިއެވެ.
ރިސޯޓު އިމާމުން ތަމްރީނު ކުރުމުގެ ޕްރޮގްރާމް ނިންމާލުމަށް ބޭއްވި ރަސްމިއްޔާތުގައި، ޓުއަރިޒަމް މިނިސްޓްރ ޑރ. އަބްދުﷲ މައުސޫމްއާއި އިސްލާމިކް މިނިސްޓަރ ޑރ. އަހުމަދު ޒާހިރު އަލީ ބައިވެރިވަޑައިގެންނެވިއެވެ. މިޕްރޮގްރާމުގެ ބައިވެރިން މިރަސްމިއްޔާތުގައި ބައިވެރިވީ އޮންލައިން ކޮށެވެ.
ޓުއަރިޒަމް މިނިސްޓްރީއާއި އިސްލާމިކް މިނިސްޓްރީ ގުޅިގެން ބާއްވާ މިޕްރޮގްރާމުގެ މަޤުޞަދަކީ ޓޫރިސްޓު ރިސޯޓުތަކުގައި (ވަގުތީ ގޮތުން) ބަންގި ގޮވުމާއި ޚުޠުބާ ކިޔުމާއި އިމާމުވެ ހުކުރު ނަމާދާއި ފަރްޟު ފަސް ނަމާދު އަދި ޖަމާޢަތުގައި ކުރާ ސުއްނަތް ނަމާދު ކުރުމުގެ ޤާބިލުކަން ހުރި ބަޔަކު އުފެއްދުމެވެ.
މިރަސްމިއްޔާތުގެ ބައިވެރިންނާއި މުޚާތަބް ކުރައްވާ ވާހަކަފުޅު ދައްކަވަމުން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، މީގެ ކުރީން ރިސޯޓު ތަކުގައި ހުކުރު ނަމާދު ކުރުމަށް ކައިރި ރަށްރަށުގެ ކައުންސިލުގެ އެހީތެރިކަމާއި އެކު އިމާމުން ގެންނަ ކަމަށާއި، ނަމަވެސް ކޯވިޑް-19 އާއި ގުޅިގެން ހުކުރު ނުކުރެވިދިއުމުގެ ޝަކުވާ މުވައްޒަފުންނާއި ރިސޯޓު މެނޭޖްމަންޓުންވެސް މިނިސްޓްރީއަށް ހުށަހެޅި ކަމަަށެވެ.
މިނިސްޓަރ ވިދާޅުވީ މިސިނާޢަތުގައި މީހުން ބިނާ ކުރާއިރު ހުރިހާ ދާއިރާއަކަށް ވެސް އިސްކަންދެއްވާ ކަމަށާއި ރިސޯޓު އިމާމުން ތަމްރީނު ކުރުމުގެ މިޕްރޮގްރާމުގެ ސަބަބުން ރިސޯޓު މުވައްޒަފުންގެ އިތުރުން ރިޒޯޓުތަކަށް އަންނަ މުސްލިމް ފަތުރުވެރިންނަށް ވެސް ފަސޭހަތަކެއް ލިބިގެންދާނެކަމަށެވެ. އަދި ރޯދަ މަހުގެ ކުރިން ޕްރޮގްރާމު ނިންމާލަން ފުރުސަތު ލިބިގެން ދިއުމަކީ ލިބުނު ހިތްހަމަ ޖެހުމެއް ކަން މިނިސްޓަރ ފާހަގަކުރެއްވިއެވެ.
މިރަސްމިއްޔާތުގައި އިސްލާމިކް މިނިސްޓަރ ދެއްކެވި ވާހަކަފުޅުގައި ވިދާޅުވީ މި ތަމްރީނުގެ ތެރެއިން ބައިވެރިންނަށް ނަމާދުގައި ކުށެއް ޖެހުމުން ޢަމަލު ކުރާނެ ގޮތާއި، މިކަމުގައި ހުރި ފިޤްޙީ މައްސަލަތަކާއި ގުޅޭ ގޮތުން ވަރަށް ބޮޑަށް ކިޔައި ދެވުނު ކަމަށެވެ. އަދި މިއީ އިމާމްވެ ނަމާދު ކުރާއިރު އަސާސީގޮތުން އެނގެން ޖެހޭ ތަކެތި ދަސްކޮށްދިނުމުގެ ޕްރޮގްރާމެއް ކަން ފާހަގަ ކުރައްވާ މިނިސްޓަރ ވިދާޅުވީ، އިތުރަށް ވެސް އުނގެނި ކުރިއަށް ދިއުމުގެ ފުރުސަތު އިސްލާމިކް މިނިސްޓްރީ މެދުވެރިކޮށް ޓުއަރިޒަމް މިނިސްޓްރީ އާއި ގުޅިގެން ކުރިއަށް ގެންދަވާނެކަމަށެވެ.
މިޕްރޮގްރާމުގައި ސެޓްފިކެޓް ލިބުނު ފަރާތްތައް މިރަސްމީއްޔާތުގައިވަނީ އިއުލާން ކޮށްފައެވެ. ޓުއަރިޒަމް މިނިސްޓްރީން ވިދާޅުވީ މި ސެޓްފިކެޓާއެކު ރާއްޖޭގެ ކޮންމެ ރިސޯޓެއްގައި އިމާމްވެ ނަމާދު ކުރެވޭނެ ކަމަށެވެ.
މި ޕްރޮގްރާމުގެ ދަށުން ތަމްރީނުވި އިމާމުންނަށް ސެޓްފިކެޓް ދީފައިވަނީ އިމްތިޙާނު ކުރުމަށް ފަހުއެވެ. މި ރަސްމިއްޔާތުގައި ސެޓްފިކެޓް ދިނީ ތަމްރީނުގައި ބައިވެރިވި 7 ބެޗުގެ ތެރެއިން 5 ބެޗުގެ ބައިވެރިންނަށް ކަމަށް އިސްލާމިކް މިނިސްޓްރީން ވިދާޅުވެއެވެ.