މިޔަރުގެ މަސްވެރިކަމަށް ހުއްދަ ދިނުމަށް އެއްވެސް ވަރަކަށް މަޝްވަރާ ކުރެވިފައިނުވާކަމަށް ފިޝަރީޒް މިނިސްޓްރީން ވިދާޅުވެއްޖެއެވެ.
ފިޝަރީޒް މިނިސްޓަރ ޒަހާ ވަހީދު މިދިޔަ މަހުގެ 23 ވަނަ ދުވަހު މަޖިލީހުގެ އިޤްތިޞާދީ ކޮމެޓީގެ 14 ވަނަ ބައްދަލުވުމުގައި މިޔަރުގެ މަސްވެރިކަމާއި ގުޅޭ ގޮތުން ދެއްކެވި ވާހަކަތަކާއި ގުޅިގެން ތިމާވެއްޓާއި ގުޅޭ ގިނަ ޖަމީއްޔާ ޖަމާޢަތްތަކުން ވަނީ ކަންބޮޑުވުން ފާޅުކޮށްފައެވެ. ޖަމީއްޔާތަކުން ކަންބޮޑުވުން ފާޅުކުރި މައިގަނޑު ސަބަބަކީ ރާއްޖޭގައި މިޔަރުގެ މަސްވެރިކަން މަނާ ކުރިތާ 10 އަހަރަށް ވުރެ ގިނަ ދުވަސް ފަހުން އަލުން މިޔަރުގެ މަސްވެރިކަމަށް ހުއްދަ ދޭން ސަރުކާރުން މަސައްކަތްކުރާ ކަމަށް ބުނެއެވެ.
މިމައްސަލައިގައި ފިޝަރީޒް މިނިސްޓްރިން ނެރުނު ނޫސްބަޔާނުގައި ވިދާޅުވީ، ރާއްޖޭގައި މިޔަރުގެ މަސްވެރިކަމަށް އެއްވެސް ވަރަކަށް ހުއްދަ ދިނުމަށް މިނިސްޓްރީގެ ވިސްނުމެއް ނެތް ކަމަށެވެ. އަދި އެދުވަހު ކޮމެޓީ ބައްދަލުވުމުގައި މިނިސްޓަރ ޒަހާ ދެއްކެވި ވާހަކަފުޅާއި ގުޅިގެން މިނިސްޓްރީން ވިދާޅުވީ، މިނިސްޓަރގެ ވާހަކަ އަމާޒުވީ ލޭނު އަޅައިގެން ލޯބޮޑު ކަންނެލި ބޭނުން އަލުން ފެށުމަށް ކުރެވުނު މަޝްވަރާތަކެއްގެ މައްޗަށް ކަމަށެވެ. އެގޮތުން ކުރެވުނު މަޝްވަރާތަކުގައި ލޭނުގައި މިޔަރު ބައިކެޗްގެ ގޮތުގައި ޖެހުމުގެ ފުރުސަތު އޮތުމުން އެކަމަށް ކުރެވޭނީ ކޮންކަމެއްތޯ ބެލުމަށް ކަމާއި ގުޅޭ ފާރާތްތަކާއެކު މަޝްވަރާ ކުރެވުނު ކަމަށެވެ. އަދި މިމަޝްވަރާގެ ތެރެއިން އެއްވެސް ވަރަކަށް މިޔަރުގެ މަސްވެރިކަން ހުއްދަ ކުރުމާއި ގުޅޭ މަޝްވަރާއެއް ކުރިއަށް ގޮސްފައިނުވާކަމުގެ ޔަޤީންކަންވެސް މިނިސްޓްރީން ދެއެވެ.
މިނިސްޓްރީން ވިދަޅުވީ، ފާއިތުވި އަހަރުތަކުގެތެރޭގައި ރާއްޖޭގައި ކުރެވޭ އެހެން ބާވަތުގެ މަސްވެރިކަމަށް މިޔަރުގެ ސަބަބުން ވަރަށް ބޮޑަށް އަސަރު ކުރަމުންދާ ކަމުގެ ޝަކުވާތައް މިނިސްޓްރީއާ ހިސާބަށް އައިސްފައިވާ ކަމަށެވެ. އަދި މިކަމާއި ގުޅޭގޮތުން މޯލްޑިވްސް މެރީން ރިސާޗް އިންސްޓިޓިއުޓުން ދިރާސަަތަކެއް ކުރަމުންދާ ކަމަށެވެ. އެގޮތުން މިޔަރުގެ އާބާދީއަށް އައިސްފައިވާ ބަދަަލާއި މަސްވެރިކަމަށް އޭގެ ސަބަބުން ކުރާ އަސަރު ދެނެގަތުމަށް މަސައްކަތް ކުރެވެމުންދާކަމަށް މިނިސްޓްރީން ވިދާޅުވެއެވެ.
މިނިސްޓްރީން ވިދާޅުވީ، މިހާތަނަށް ހޯދުނު ހޯދުންތަކުން މިޔަރުގެ މަސްވެރިކަން މަނާ ކުރިފަހުންވެސް، މިޔަރުގެ އާބާދީ އެންމެ އެދެވޭ މިންވަރަށް އިތުރުވެގެން ގޮސްފައިވާކަން ފާހަގަނުކުރެވޭ ކަމަށެވެ. މިނިސްޓްރީން ވިދާޅުވީ، މިފަހަކަށް އައިސް މިޔަރުގެ ސަބަބުން އެހެން މަސްވެރިކަމަށް ނޭދެވޭ އަސަރު ކުރުމުންދާކަމުގެ ޝަކުވާ ވަނީ އިތުރެވެފައެވެ.
މިކަމުގެ ސަބަބުން ޤުދުރަތީ ނިޒާމުގެ ތެރެއިން ކާނާ ހޯދުމަށް މިޔަރުތައް ކާނާ ހޯދުމަށް ކުރާ މަސައްކަތައް ބުރު އަރާކަން މިނިސްޓްރީން ފާހަގަކުރެއެވެ. އެހެން ކަމުން ފަތުރުވެރިކަމުގެ ދައިރާގައި ހަރަކާތްތެރިވާ ފަރާތްތަކާއި އަދި ޑައިވަރުންވެސް މިޔަރުތަކަށް ކާން ދިނުން ހުއްޓާލުމަށާއި، މިޔަރުތައް ތިލަކުރުމަށް ކަރުގޮހޮރު އެޅުން ހުއްޓާލުމަށްވެސް މިނިސްޓްރީން ވަނީ އިލްތިމާސް ކޮށްފައެވެ.
މިނިސްޓްރީން ވިދާޅުވީ މިނިސްޓްރީން އެއްވެސް ވަރަކަށް މިޔަރުގެ މަސްވެރިކަން ކުރުމަށް ހުއްދަ ނުދޭނެ ކަމަށާއި، ރާއްޖެ އަކީ ދެމެހެއްޓެނިވި މަސްވެރިކަމެއް ކުރުމުގައި ނަމޫނާ ޤައުމެއްގެ ގޮތުގައި އަބަދު ބާއްވަން މިނިސްޓްރީން މަސައްކަތް ކުރަމުންދާނެ ކަމަށެވެ. މީގެ އިތުރުން މަސްވެރިކަމުގެ އާ ޤާނޫނުގެ ދަށުން މިޔަރުގެ މަސްވެރިކަން މަނާ ކުރެވިފައި އޮތް އޮތުން އިތުރަށް ހަރުދަނާ ވެގެން ގޮސްފައިވާކަން މިނިސްޓްރީން ފާހަގަކުރެއްވިއެވެ.