ސީއެންއެންގެ މަޝްހޫރު ހޯސްޓް އަދި ޕްރެޒެންޓަރ ރިޗާޑް ކުއެސްޓުގެ "ވޯލްޑް އޮފް ވޮންޑާސް" ޕްރޮގްރާމް ރާއްޖޭގައި ނަގައިފިއެވެ.
ސީއެންއެންއިން މިހާރު މިޕްރޮގްރާމު ދެއްކުމަށް ތައްޔާރު ވެފައިވާއިރު، ރިޗާޑް ކުއެސްޓުގެ މި ޕްރޮގްރާމު ރެކޯޑުކުރުމަށް ރާއްޖޭގައި ހަރަކާތްތެރިވެފައިވަނީ މިދިޔަ މަހުގެ ފަހުކޮޅުގައެވެ. ރިޗާޑް ކުއެސްޓް ރާއްޖެ އައިސް ޕްރޮގްރާމެއް ނަގާފައި މިވަނީ މިދިޔަ އަހަރު ނޮވެމްބަރުމަހު ޓުއަރިޒަމް މިނިސްޓަރ ޑރ. އަބްދުﷲ މައުސޫމް ސީއެންއެން އިންޓަވިއުއެއްގައި ރާއްޖެ އައުމަށް އޭނާ އަށް ދައުވަތު ދެއްވާފައިވާ ދަނޑިވަޅެއްގައެވެ.
އެނާގެ ވޯލްޑް އޮފް ވޮންޑާސްއަކީ ދުނިޔޭގެ އެކި ކަންކޮޅުތަކުގައި، ފަތުރުވެރިންނާއި ގުޅޭ ތަފާތު ސަރަހައްދުތަކަށް ޒިޔާރަތްކޮށް އެތަނުގައި ދިރިއުޅޭ ފަރާތްތަކާއި އެކު ވަގުތު ހޭދަކޮށް ސަޤާފަތާއި ތަނުގެ މަޢުލޫމާތު ބެލުންތެރިންނަށް ގެނެސްދޭ ޕްރޮގްރާމެކެވެ. ރާއްޖޭގައި އޭނާ ނަގާފައިވާ ޕްރޮގްރާމުގައި ރާއްޖޭގެ ފަތުރުވެރިކަމުގެ ދައިރާގެ ގިނަދުވަސްވީ ފަރާތެއްކަމަށްވާ އަދި މަޓީގެ ރައީސް މުހައްމަދު އުމަރު މަނިކު އާއި ބައްދަލު ކުރައްވާފައެވެ. މިބައްދަލުވުމުގައި ރާއްޖޭގެ ފަތުރުވެރިކަމުގެ ފެށުމާގުޅޭ ގޮތުން ވަނީ ވާހަކަދައްކަވާފައެވެ.
މީގެ އިތުރުން ޕްރޮގްރާމުގެ ތެރެއިން މަޖިލިސް ރައީސް، ރައީސް މުހައްމަދު ނަޝީދުއާ ވެސް ވަނީ ބައްދަލު ކުރައްވާފައެވެ. މައިގަނޑު ގޮތެއްގައި ދިވެހި ރާއްޖޭގެ ޤުދުރަތީ ވެއްޓާއި ގުޅޭ ގޮތުން މި ބައްދަލުވުމުގައި ވަނީ ވާހަކަ ދެކެވިފައެވެ.
މީގެ އިތުރުން ރާއްޖޭގެ މަޝްހޫރު ޑައިވަރު ހުސެއިން ރަޝީދު އާއިއެކު ސްނޯކްލިންއަށް ގޮސް ރާއްޖޭގެ ފަރުތަކާއި ދިރުންތައް ކުއެސްޓް ވަނީ ތަޖުރިބާ ކޮށްފައެވެ.
ސީއެންއެންގެ މަޝްހޫރު ޕްރެޒެންޓަރ ރިޗާޑް ކުއެސްޓްއަކީ ވިޔަފާރި އަދި ފަތުރުވެރިކަމުގެ ދައިރާގައި ދުނިޔޭގެ މަޝްހޫރު ޕްރެޒެންޓަރެކެވެ. އޭނާ ވަނީ ފަތުރުވެރިކަމުގެ ދައިރާގައި ޙަބަރާއި މައުލޫމާތު ފޯރުކޮށްދިނުމުން އ.ދ ފަތުރުވެރިކަމާއި ބެހޭ އިދާރާގެ ލައިފްޓައިމް އެޗީވްމެންޓް އެވޯޑު 2013 ވަނަ އަހަރު ހާސިލުކޮށްފައެވެ. އޭނާގެ ވިޔަފާރި ޝޯވްތައް އެތައް މިލިއަން ބަޔަކު ދުނިޔޭގެ އެކި ކަންކޮޅުތަކުގައި ބަލައެވެ.