އެގްރޯނެޓްއިން މިހާރު ރާއްޖޭގެ 10 ރިސޯޓަކަށް ދަނޑުވެރިކަމުގެ އުފެއްދުންތައް ސަޕްލައި ކުރަމުންދާކަމަށް އެކުންފުނިން ހާމަކޮށްފިއެވެ.
ރާއްޖޭގެ ދަނޑުވެރިކަމުގެ ސިނާއަތް ކުރިއެރުވުމަށް ސަރުކާރުން އުފައްދާފައިވާ ކުންފުނިން ދަނީ ރާއްޖޭގެ އެކި ހިސާބުތަކުގައި ދަނޑުވެރިކަމުގެ މަސައްކަތްކުރަމުންދާ ފަރާތްތަކާއެކު ކޮންޓްރެކްޓްތައް ޤާއިމްކޮށް އެފަރާތްތަކާއި ގުޅިގެން މަސައްކަތްތައް ކުރަމުންނެވެ.
އެއްބަސްވުން ޤާއިމްކޮށްފައިވާ ދަނޑުވެރިންނާއެކު އެގްރޯނެޓުން ދަނީ 17 ބާވަތެއް ހެއްދުމުގެ މަސައްކަތްކުރަމުންނެވެ. އެ 17 ބާވަތަކީ ބަރަބޯ، ފަތްކެޔޮ، ބަށި، މެލަން، ފަޅޯ، ކަރާ، ބަޓަރ ނަޓްސް، ޓޮމާޓޯ، ކިއުކަމްބާ، ޗިޗަންޑާ، ތޮރާ، މާމިއާ ތޮޅި، ބީންސް، ކެޕްސިކަމް، ލެޓިއުސް، ކެބެޖް، ޗައިނީސް ކެބެޖްއެވެ. މިހާރު މީގެތެރެއިން ގިނަ ބާވަތްތަކެއް ބާޒާރަށް ވަނީ ނެރެވިފައެވެ.
ޕީއެސްއެމް ނިއުސްއާ ވާހަކަދައްކަވަމުން އެގްރޯނެޓްގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވީ އެގްރޯނެޓްގެ މައިގަނޑު އެއް ބޭނުމަކީ ރާއްޖެއަށް ތަރުކާރީއާއި މޭވާ އިމްޕޯޓްކުރާ މިންވަރު މަދުކުރުން ކަމަށެވެ. އަދި ރާއްޖެއަށް އެތެރެކުރާ މި ބާވަތްތަކުގެ ބޮޑު ބައެއް ދަނީ ރިސޯޓްތަކަށް ކަމަށްވުމުން ރިސޯޓްތަކަށް ދިވެހި ދަނޑުވެރިންގެ އުފެއްދުންތައް ސަޕްލައިކުރުމަށް ކުރަންޖެހޭ މަސައްކަތްކުރަމުންދާ ކަމަށާއި، ކުރިއެރުންތައްވެސް ލިބެމުންދާކަމަށް ހާރޫން ރަޝީދު ވިދާޅުވިއެވެ.
"ސަޕްލައި ކުރުމުގެ މަސައްކަތް އަދި ކިރިޔާ މި ފަށައިގަތީ، އެހެން ނަމަވެސް މިހާރުވެސް 10 ރިސޯޓުން ޝައުގުވެރިކަން ފާޅުކޮށްގެން އަމަލީ ގޮތެއްގައި ތަކެތި ގަންނަން ފަށައިފި މިހާރު، އެނޫނަސް ރާއްޖޭގައި ހޯލްސޭލް ވިޔަފާރިކުރާ ފަރާތްތަށްވެސް އެގްރޯނެޓާއި އެކު ރަޖިސްޓްރީ ކުރެވިގެން ޝައުގުވެރިކަން ފާޅުކޮށްފައިހުރީ،" ހާރޫން ވިދާޅުވިއެވެ.
ހާރޫން ވިދާޅުވީ ގިނަ ރިސޯޓްތަކަށް ބޭނުންވާ ދަނޑުވެރިކަމުގެ އުފެއްދުންތައް ސަޕްލައިކުރުމަށް އެކުންފުނިން ބޭނުންވާ ކަމަށެވެ. އެގޮތުން އެކަމާއި ގުޅޭ ޕްލޭންތައް މިހާރު ކުރެވެމުންދާ ކަމަށްވެސް ހާރޫން ވިދާޅުވިއެވެ.
" އުއްމީދަކީ ގިނަ ދަނޑުވެރިންނާއި އެކު ދެމެހެއްޓެނިވި ގޮތެއްގައި މަސައްކަތްތައް ކުރުން، އެއާ އެކު ގިނަ ރިސޯޓްތަކަށް ތާޒާ ކަމާއި އެކު ގިނަ އުފެއްދުންތަކެއް ރިސޯޓްތަކަށް ސަޕްލައިކުރެވޭނެ،" ހާރޫން ވިދާޅުވިއެވެ.
އެގްރޯ ނެޝަނަލް ކޯޕަރޭޝަންގެ ފަރާތުން ކުރިއަށްގެންދާ "ކޮންޓްރެކްޓް ފާމިން"ގެ ދަށުން އެއްބަސްވުންތައް ޤާއިމްކޮށް ދަނޑުވެރިންނަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދީ އެފަރާތްތަކުން ހައްދާ ތަކެތި ދާއިމީކޮށް އެ ކުންފުނިން ގަންނާނެއެވެ. މީގެ ސަބަބުން ދަނޑުވެރިންނަށް އެމީހުންގެ އުފެއްދުންތައް މާކެޓްކުރެވޭނެކަމުގެ ފުރިހަމަ ޔަޤީންކަން ލިބިގެންދާނެއެވެ. އަދި ދިވެހި ދަނޑުވެރިންގެ އުފެއްދުންތަކަށް ހަމައަގު ލިބިގެންދާނެއެވެ.
ކޮންޓްރެކްޓް ފާމިން މަޝްރޫއަށް 1500 އަށްވުރެ ގިނަ ދަނޑުވެރިން ޝައުގުވެރިކަން ފާޅުކުރިއިރު، އޭގެތެރެއިން 787 ދަނޑުވެރިންނާއެކު އެއްބަސްވުމާއި ހިސާބަށް މިހާރުވަނީ ދެވިފައެވެ. އަދި މީގެތެރެއިން ތެރެއިން 500 އެއްހާ ދަނޑުވެރިންނާއެކު މަސައްކަތް ފެށިފައިވާކަންވެސް އެގްރޯނެޓުން ހާމަކުރެއެވެ.