ރާއްޖޭގެ ދެކުނުގައި މަސްވެރިކަން ރަނގަޅުވުމާއި އެކު، ގަނޑު ކުރެވޭ ރޭޓަށް ވުރެ އިތުރަށް މަސް ލިބެމުންދާތީ ބުދަ ދުވަހުގެ ނިޔަލަށް މަސް ކިރާނީ ކޮންޓްރޯލް ކުރެވިގެން ކަމަށް މިފްކޯއިން ބުނެފިއެވެ.
މިފްކޯއިން މިކަން ހާމަކޮށް އެކުންފުނިން ނެރުނު ނޫސް ބަޔާނުގައި ބުނީ، މިދުވަސްވަރު ރާއްޖޭގެ ދެކުނުގެ މަސްވެރިކަން އާދަޔާ ޙިލާފަށް ރަނގަޅުވެ، ދެކުނުގެ ބޯޓުތަކާއި ސެންޓަރުތަކަށް ރާއްޖޭގެ ހުރިހާ ހިސާބެއްގެ ދޯނިތައް މަސް ކިރުވަމުންދާ ކަމަށެވެ. އަދި މިހެން ވުމާއި މިފްކޯގެ ފްރީޒިން ކެޕޭސިޓީއަށް ވުރެ އިތުރަށް މަސް ކުރުވަން އައުމާއި އެކު، މަސް ކިރުވުމަށް ދަތިތަކާއި ކުރިމަތިވެފައިވާ ކަމަށެވެ.
މިފްކޯއިން ބުނީ، މިވަގުތަށް ކެޕޭސިޓީއަށް ވުރެ އިތުރަށް މަސް ލިބެމުން ދިއުމާއި އެކު ގަނޑު ކުރުމަށް ވަގުތު ބޭނުންވާތީ، އާދިއްތަ ދުވަހުން ފެށިގެން ބުދަ ދުވަހުގެ ނިޔަލަށް ކޮންޓްރޯލް ކުރެވިގެން ދޯންޏަކުން 4 ޓަނު މަސް ކިރާ ގޮތަށް ހަމަޖައްސާފައިވާ ކަމަށެވެ. ނަމަވެސް މިހާރުވެސް ނަންބަރު ދޫކުރެވިފައި ހުރި ދޯނިތަކުން މަސް ކޮންޓްރޯލެއް ނެތި މަސް ނެގުމަށް ހަމަޖެހިފައިވާ ކަމަށް މިފްކޯއިން ވަނީ ވިދާޅުވެފައެވެ.
މީގެ އިތުރުން، ހަފްތާ ބަނދު ތެރޭގައިވެސް މަސް ކިރުވުމުގެ މަސައްކަތް އެކުންފުނިން ވަނީ ކުރިއަށް ގެންގޮސްފައެވެ. އެގޮތުން ހުކުރު ދުވަހަކީ އާންމުކޮށް މަސް ނުކިރާ ދުވަހެއް ކަމުގައިވިއަސް، މިވަގުތު ހާލަތައް ބަލައި ރަނގަޅު ކޮލިޓީގެ މަސް ގަންނަން އެކުންފުނިން ބޭނުންވުމާއެކު، ބުރާސްފަތި ދުވަހު ކިއުއަށް އެރި ފަރާތްތަކުން ހުކުރު ދުވަހުވެސް ވަނީ މަސް ކިރުވާފައެވެ. އަދި މިގޮތަށް މަސް ގަންނަމުން ދިއުމާއެކު ކޯލްޑް ސްޓޯރޭޖް ފުރެމުންދާތީ، މެދުކެނޑުމެއް ނެތި ކެރިއަރ ބޯޓުތައް އެކްސްޕޯޓު ކުރުމަށް ލޯޑު ކުރަމުންދާ ކަމަށްވެސް އެކުންފުނިން ބުނެއެވެ.
ރައްޖޭގެ ދެކުނުގައި މިވަގުތު މަސްވެރިކަން ރަނގަޅުވެފައިވާކަން މިފްކޯއިން ހާމަކޮށްފައިވާއިރު، އެކުންފުނިން ދަނީ ރާއްޖޭގެ އެކި ސަރަހައްދުތަކުގައި ޤާޢިމު ކުރެވިފައިވާ އެކުންފުނީގެ ފެސިލިޓީތައް ތަރައްޤީ ކުރުމަށް މަސައްކަތް ކުރަމުންނެވެ.
މިގޮތުން ދެކުނުން އައްޑޫސިޓީގައި ޤާޢިމު ކުރެވިފައިވާ މިފްކޯ މަސް ޕްލާންޓުގެ ބަނދަރު އަޕްގްރޭޑް ކުރުމުގެ މަސައްކަތް ސަރުކާރުން އެމްޓީސީސީއާ ވަނީ ހަވާލުކޮށްފއެވެ. ހުޅުމީދޫ މަސް ޕްލާންޓުގެ ބަނދަރުގެ މަސައްކަތް ނިމުމާއެކު، އެބަނދަރަށް ކެރިއަރ ބޯޓުތައް ވަނުމަށް ދިމާވާ ދަތިތައް ހައްލުވެގެން ދާނެކަމަށް މިފްކޯއިން ބުނެއެވެ.