އެގްރޯނެޓަށް ސަރުކާރުން ދޫކުރި ރަށްތަކުގައި ދަނޑުވެރިންނަށް ބިންދޫކުރަން އެ ކުންފުނިން ނިންމައިފިއެވެ. ރާއްޖޭގެ ދަނޑުވެރިކަމުގެ ސިނާއަތް ކުރިއެރުވުމަށް ސަރުކާރުން އުފައްދާފައިވާ ކުންފުނިން ދަނީ ރާއްޖޭގެ އެކި ހިސާބުތަކުގައި ދަނޑުވެރިކަމުގެ މަސައްކަތްކުރަމުންދާ ފަރާތްތަކާއެކު ކޮންޓްރެކްޓްތައް ޤާއިމްކޮށް އެފަރާތްތަކާއި ގުޅިގެން މަސައްކަތްތައް ކުރަމުންނެވެ.
ދިވެހި ދަނޑުވެރިންނަށް އެމީހުންގެ އުފެއްދުންތަކަށް މާކެޓް ހޯދައިދޭ ހަމަ އަގު ހޯދާދިނުމަކީ ސަރުކާރުގެ މުހިއްމު އެއް ސިޔާސަތެވެެ. މި މަސައްކަތުގެ ދަށުން ދަނޑުވެރިންނަށް ބޭނުންވާ ފުރުސަތުތައް ހަމަޖައްސާދިނުމަށް އުފެއްދި އެގްރޯނެޓުން މިވަނީ އަނެއްކާވެސް އިތުރު ފުރުސަތުތަކެއް ދަނޑުވެރިންނަށް ތަރައްޤީކޮށްދޭން ތައްޔާރުވެފައެވެ.
މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ ބެލުމުގެ ދަށުން އެގްރޯނެޓަށް މިވަނީ ތިން ފަޅު ރަށެއް ދޫކޮށްފައެވެ. އެކުންފުންޏަށް ދޫކޮށްފައިވަނީ ހއ. މުލިދޫ، ލ. ގާދޫ އަދި ގދ. ގަމެވެ. އެގްރޯނެޓްގެ މެނޭޖިންގް ޑިރެކްޓަރ، ހާރޫން ރަޝީދު ވިދާޅުވީ މިރަށްތަކާއި އެކުންފުނިން ހަވާލުމުގެ މަސައްކަތް މީހާރު ކުރަމުން އަންނަކަމަށެވެ. މިހާރު ކުރިޔަށްދަނީ އެއްބަސްވުންތައް އެކުލަވާލާ ފައިނަލްކުރުމުގެ މަސައްކަތްކަމަށް ހާރޫން ވިދާޅުވިއެވެ.
މި ތިން ރަށާއިއެކު ދަނޑުވެރިކަން ކުރަން ބޭނުންވާ ފަރާތްތަކަށް އެގްރޯނެޓުން މުހިއްމު ވަސީލަތްތަކެއް ހަމަޖައްސާދިނުމަށްވެސް އެކުންފުނިން އަންނަތީ ތައްޔާރުވަމުންނެވެ. ހާރޫން ވިދާޅުވީ، މިތިން ރަށުގައި ވެސް އެކުންފުނިން މައިގަނޑު ގޮތެއްގައި އަމާޒު ހިފާފައިވަނީ ކޮންޓްރެކްޓް ފާމިން ކުރިއަށް ގެންދިއުމަށެވެ. އެގޮތުން ކައިރި ރައްތަކުގެ މީހުންނަށް މިރަށުން ދަނޑުވެރިކަމަށް ބިން ދޫކޮށް ކޮންޓްރެކްޓް ފާމިން އުސޫލުން ދަނޑުވެރިކަން ކުރެވޭނެ އިންތިޒާމު ހަމަޖައްސާނެ ކަމަށް އޭނާ ވިދާޅުވިއެވެ.
ރަށާއި ކައިރީގައި އޮންނަ ފަޅު ރަށްތަކުގައި މިހާރުވެސް ބައެއް ދަނޑުވެރިން އަންނަނީ ދަނޑުވެރިކަން ކުރަމުންނެވެ. އެހެންނަމަވެސް މިފަދަ ދަނޑުވެރިންނަށް ދިމާވާ އެތައް ދަތިތަކެއް ހުރެއެވެ. މިގޮތުން އެފަދަ ރަށްރަށުގައި ފެނާއި ކަރަންޓާއި އަސާސީ ބައެއް ހިދުމަތްތައް ލިބޭނެ ގޮތެއް ނެތުމުން އެކަމަށް ދަނޑުވެރިން ކުރަންޖެހޭ ހަރަދުތައް އެތައް ތަނެއް އިތުރުވެ ކުރާ މަސައްކަތުން ނަފާ ނުލިބޭތީ އެކަމުގެ ޝަކުވާތައްވެސް ދަނޑުވެރިން ކުރަމުން އާދައެވެ.
ހާރޫން ވިދާޅުވީ އެކުންފުނިން އަލަށް ލިބުނު ރަށްތައް ދަނޑުވެރިކަމަށް ދޫކުރާނީ ބޭނުންވާ މުހިއްމު ވަސީލަތްތައް ޤާއިިމުކޮށްދިނުމާއި އެކުއެވެ. މިގޮތުން މިރަށްތަކުގައި އެކުންފުނީގެ ފަރާތުން އެކަމަޑޭޝަން، ކަރަންޓާއި ފެން، ސްޓޯރޭޖް ފަދަ އަސާސީ ޙިދުމަތްތައް ޤާއިމު ކޮށްދޭނެކަން ހާރޫން ފާހަގަކުރެއްވިއެވެ. ރަށްތައް މެނޭޖްކުރުމުގެ ކޮންސެޕްޓް އެކުލަވާލާ އެ ރަށްތަކުން ބިންތަކަށް ކުރިމަތިލުމުގެ ފުރުސަތު ދާދި އަވަހަށް ހުޅުވާލާނެކަމަށްވެސް ހާރޫން ވިދާޅުވިއެވެ.
އެގްރޯނެޓް ކުންފުންޏަކީ ރައްޖޭގެ ދަނޑުވެރިކަމަށް ހެޔޮ ބަދަލެއް ގެނެސް ދަނޑުތަކުން އުފައްދާ ތަކެތި މާކެޓު ކުރުމުގައި އެހީ ތެރިވުމަށް އުފައްދާފައިވާ ކުންފުންޏެކެވެ. މި ކުންފުންނިން ދަނޑުވެރިން ދަނޑުތަކުން އުފައްދާ ބާވައްތައް ގަނެ އެތަކެތި މާކެޓު ކުރެއެވެ. މީގެ އިތުރުން އެކުންފުންޏާއި އެކު މަސައްކަތް ކުރާ ދަނޑުވެރިންނަށް ފަންނީ އަދި އެހެނިހެން ގޮތްގޮތުން އެހީތެރިކަން އަންނަނީ ފޯރުކޮށްދެމުންނެވެ.
އެގްރޯނެޓުން ވިދާޅުވީ މީގެ ކުރީން ދަނޑުވެރިން ހައްދާ ތަކެތި ގަތުމާއި މާކެޓު ކުރުމުގައި ވަރަށް ބޮޑަށް ބިދޭސީންގެ ހަރަކާތްތެރިވަމުން ގޮސްފައިވާ ކަމަށެވެ. އެކަމުގެ ސަބަބުން ދަނޑުވެރިން ހައްދާ ބާވަތްތަކުގެ އަގު ކޮންޓްރޯލް ނުކުރެވި ދަނޑުވެރިންނަށް ފައިދާއެއް ނުލިބޭ ކަން އެކުންފުނިން ފާހަގަ ކުރެއެވެ.
އެގްރޯނެޓްގެ މައިގަނޑު އެއް ބޭނުމަކީ ރާއްޖެއަށް ތަރުކާރީއާއި މޭވާ އިމްޕޯޓްކުރާ މިންވަރު މަދުކުރުމެވެ. އަދި ރާއްޖެއަށް އެތެރެކުރާ މި ބާވަތްތަކުގެ ބޮޑު ބައެއް ދަނީ ރިސޯޓްތަކަށް ކަމަށްވުމުން ރިސޯޓްތަކަށް ދިވެހި ދަނޑުވެރިންގެ އުފެއްދުންތައް ސަޕްލައިކުރުމަށް ކުރަންޖެހޭ މަސައްކަތް އެކުންފުނިން މިހާރު ވަނީ ފަށާފައެވެ. މިގޮތުން ދިވެހި ދަނޑުވެރިންގެ އުފެއްދުންތައް 10 ރިސޯޓަކަށް މިހާރުވެސް ގެންދަނީ ސަޕްލައިކުރަމުންނެވެ. މީގެއިތުރުން ރާއްޖޭގައި ހޯލްސޭލް ވިޔަފާރި ކުރާ ބައެއް ވިޔަފާރިވެރިންވެސް އެގްރޯނެޓްގައި ރަޖިސްޓްރީކޮށް ތަކެތި ގަތުމަށް ޝައުގުވެރިކަން އަންނަނީ ފާޅުކުރަމުންނެވެ.
އެކުންފުނީގެ ކޮންޓްރެކްޓް ފާމިން މަޝްރޫޢު ފެށުމާއި އެކު، އެކުންފުންޏާއި އެކު މަސައްކަތް ކުރުމަށް މިހާތަނަށް 1500 ދަނޑުވެރިން ވަނީ ތައްޔާރުވެފައެވެ. އަދި މީގެ ތެރެއިން 787 ފަރާތްތަކާއި އެކު އެއްބަސްވުންތައް އެކުލަވާލުމާއި ހަމައަށް ދެވިފައިވާކަމަށް އެގްރޯނެޓުން ބުނެއެވެ.
ދަނޑުވެރިންނާއެކު އެގްރޯނެޓުން ދަނީ 17 ބާވަތެއް ތަކެތި ހެއްދުމުގެ މަސައްކަތްކުރަމުންނެވެ. އޭގެތެރޭގައި ބަރަބޯ، ފަތްކެޔޮ، ބަށި، މެލަން، ފަޅޯ، ކަރާ، ބަޓަރ ނަޓްސް، ޓޮމާޓޯ، ކިއުކަމްބާ، ޗިޗަންޑާ، ތޮރާ، މާމިއާ ތޮޅި، ބީންސް، ކެޕްސިކަމް، ލެޓިއުސް، ކެބެޖް، ޗައިނީސް ކެބެޖް ހިމެނެއެވެ. މިހާރު މީގެތެރެއިން ގިނަ ބާވަތްތައްވަނީ ބާޒާރަށް ވަނީ ނެރެފައެވެ.