މިހާ ދިގުލައިގެން ދިޔަ ރަނގަޅު މަސްވެރިކަމެއް ފަހުގެ ތާޜީހެއްގައި ތަޖުރިބާކޮށްފައެއް ނުވޭ: މިފްކޯ

ރާއްޖޭގެ ދެކުނަށް މަސްވެރިކަން ރަނގަޅުވެ، މިދުވަސްކޮޅު ކޫއްޑޫއަށް ދަނީ ރެކޯޑް އަދަދަކަށް މަސް ކިރަމުންނެވެ.

ކޫއްޑޫއަށް ބާރުބޮޑުވެ، ކޯލްޑް ސްޓޯރޭޖްތައް ފުރި، މަސް ކިރުވަން ދަތިތަކާއި ދިމާވުމުން މިފްކޯއިން މިހާރުވަނީ ބުދަ ދުވަހުގެ ނިޔަލަށް މަސް ކިރާނީ ކޮންޓްރޯލް ކޮށްގެންކަމަށްވެސް ބުނެފައެވެ.

ޕީއެސްއެމް ނިއުސްއާއި ވާހަކަދައްކަވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ، ދެކުނަށް މަސްވެރިކަން ރަނގަޅުވުމުން ރާއްޖޭގެ އެކި ހިސާބުތަކުން މަސް ދޯނިތައް މިހާރު ހަރަކާތްތެރިވަމުންދަނީ ދެކުނުގައި ކަމަށެވެ.

މިހާ ރަނގަޅު މަސްވެރިކަމެއް މިފްކޯގެ ތާރީޚުގައި ތަޖުރިބާކޮށްފައިވަނީ މީގެ 15 އަހަރު ކުރިން 2006 ވަނަ އަހަރުއެވެ. އިސްމާއީލް ވިދާޅުވީ މަސްވެރިން މަސް ބާނަމުންދަނީވެސް ކޫއްޑޫއާއި ކައިރިން ކަމަށްވުމުން، މަސް ކިރަން ކޫއްޑޫއަށް އަންނަ ދޯނިފަހަރުތައް ވަރަށް ގިނަ ވެފައިވާ ކަމަށެވެ.

"ކޮންޓިނުއަސްކޮށް މިހާ ދިގުލައިގެން ދިޔަ މަސްވެރިކަމެއް އަދި އެކްސްޕީރިއެންސްއެއް ނުކުރަން، އެވްރެޖްކޮށް ދޯނިފަހަރުތަކުން ބާނާފައި ހުރި މަސް ވަރަށްވެސް ގިނަ، ވަރަށް ކައިރިން ބާނާފައި ހުރި ކަމަށް މަސްވެރިން ބުނަނީ، ހުވަދު އަތޮޅާއި އައްޑޫ ސިޓީ އާއި ވަރަށް ކައިރިން ކަމަށް،" އިސްމާޢިލް ވިދާޅުވިއެވެ.

އަންނަ ބުދަ ދުވަހުގެ ނިޔަލަށް ކޫއްޑޫއަށް މަސް ކިރަމުންދާނީ ކޮންޓްރޯލްކޮށްގެންނެވެ. އެގޮތުން ދޯންޏަކުން 4 ޓަނު މަސް ކިރާ ގޮތަށް މިފްކޯއިންވަނީ ހަމަޖައްސާފައެވެ. އިސްމާއީލް ވިދާޅުވީ ގިނައިން ބާނަމުންދަނީ ބޮޑެތި ގޮދާ ކަމަށާއި، މިއީ ގިނަ އަދަދަކަށް އައިސް ބޭނުންވާ މަހެއް ކަމަށެވެ.

" މާގިނަ އަދަދުތަކުން މަސް ބާނައިގެން އައުމުން، ކިއުގައި ތިބެން ޖެހި ކަމުގެ ކޮލިޓީވެސް ދަށްވޭ، ބޮޑެތި ގޮދާ ބާނާފައި ހުރީ، ލަސްނުކޮށް ފްރީޒްކުރަން ޖެހޭ،" އިސްމާއީލް ވިދާޅުވިއެވެ.

އިސްމާއިލް ވިދާޅުވީ އަންގާރަ ދުވަހާއި ހަމައަށް މަސްވެރިކަން ހުރި ގޮތަކަށް ބެލުމަށްފަހު، ބުދަ ދުވަހުގެ ފަހުން އަމަލްކުރާނެ ގޮތެއް ނިންމާނެކަމަށެވެ. ރާއްޖޭގެ ދެކުނުގައި މިވަގުތު މަސްވެރިކަން ރަނގަޅުވެފައިވާކަން މިފްކޯއިން ހާމަކޮށްފައިވާއިރު، އެކުންފުނިން ދަނީ ރާއްޖޭގެ އެކި ސަރަހައްދުތަކުގައި ޤާއިމު ކުރެވިފައިވާ އެކުންފުނީގެ ފެސިލިޓީތައް ތަރައްޤީ ކުރުމަށް މަސައްކަތް ކުރަމުންނެވެ.

އެގޮތުން ދެކުނުން އައްޑޫ ސިޓީގައި ޤާއިމު ކޮށްފައިވާ މިފްކޯ މަސް ޕްލާންޓުގެ ބަނދަރު އަޕްގްރޭޑް ކުރުމުގެ މަސައްކަތް ސަރުކާރުން އެމްޓީސީސީއާ ވަނީ ހަވާލުކޮށްފައެވެ. ހުޅުމީދޫ މަސް ޕްލާންޓުގެ ބަނދަރުގެ މަސައްކަތް ނިމުމާއެކު، އެބަނދަރަށް ކެރިއަރ ބޯޓުތައް ވަނުމަށް ދިމާވާ ދަތިތައް ހައްލުވެގެން ދާނެކަމަށް މިފްކޯއިން ބުނެއެވެ.

އަދި ކޫއްޑޫގެ ބަނދަރު މަރާމާތުކުރުމާއި، ކޯލްޑް ސްޓޯރޭޖް ބޮޑުކުރުމުގެ މަޝްރޫޢުއެއްވެސް މިއަހަރުތެރޭ ފެށިގެން ދާނެ ކަމަށް ލަފާކުރެވެއެވެ. އަދި މީގެ އިތުރުން ގދ. ތިނަދޫގައި އަދި މ.މުލަކުގައިވެސް މަސް ކިރޭނެ އިންތިޒާމް ހަމަޖެއްސުމުގެ މަސައްކަތް ސަރުކާރުންދަނީ ކުރަމުންނެވެ.