އައްޑޫ ސިޓީއަށް އަލަށް އިންތިޚާބުވި ސިޓީ ކައުންސިލަކީ ރައްޔިތުންގެ އުއްމީދުުތައް ހަޤީޤަތަކަށް ހަދައިދޭނެ ކައުންސިލެއްކަމަށް އައްޑޫ ސިޓީގެ އިންތިޚާބީ މޭޔަރ އަލީ ނިޒާރު ވިދާޅުވެއްޖެއެވެ.
މިމަހު ބޭއްވި ލޯކަލް ކައުންސިލް އިންތިޚާބު ވެގެން ދިޔައީ، ލާމަރުކަޒީ ޤާނޫނަށް ބޮޑެތި ބަދަލުތަކެއް ގެނައުމަށް ބޭއްވިގެން ދިޔަ އިންތިޚާބަކަށެވެ. މިއިންތިޚާބުގައި އައްޑޫ ސިޓީ ކައުންސިލުގައި ތިބި މެންބަރުންގެ އަދަދު 7 އިން 13 އަށް ވަނީ އިތުރުވެފައެވެ. އަދި ސިޓީ މޭޔަރަކަށް މުޅި ސިޓީގެ ރައްޔިތުންގެ ވޯޓާއެކު އައު މޭޔަރއަކުވެސް ވަނީ އިންތިޙާބު ކޮށްފައެވެ.
ކުރީގެ ހިތަދޫ ދެކުނު ދައިރާގެ މެންބަރުކަން ކުރެއްވި، އަދި އައްޑޫ ސިޓީގެ މޭޔަރުގެ މަޤާމަށް އިންތިޚާބުވި އަލީ ނިޒާރު ވަނީ މިހާރުވެސް އައްޑޫ ސިޓީގެ ކަންކަން އިސްލާހު ކުރުމުގެ މަސައްކަތް ފަށާފައެވެ. މިގޮތުން އައު ކައުންސިލް މެންބަރުންނާއި ގުޅިގެން ދާއިރާތަކުގެ ހާލަތު ބައްލަވަން ވަނީ ފަށާފައެވެ. ނިޒާރުގެ މޭސްތިރިކަމުގެ ދަށުން ހިންގާ ކައުންސިލެއްގައި ރައްޔިތުންގެ ބަސް ވަރަށް ބޮޑަށް ހިމެނުމަށް ނިޒާރު ބޭނުންފުޅުވާކަމަށް އޭނާ ވިދާޅުވިއެވެ.
Addu gai hingey hurihaa project thakei kuriyah oi council in gaathun balaane. Adhi mulhi council Addu ge rayyithun naai gulhigen gaathun masakkai kuraane. Insha Allah. pic.twitter.com/BtOBMoHc0k
— Ali Nizar (@DhekunuNizar) April 27, 2021
ޕީއެސްއެމްއަށް ދެއްވި ހާއްސަ ބަސްތީގަތުމެއްގައި ނިޒާރު ފާހަގަކުރެއްވި ގޮތުގައި، މީގެ ކުރިން ކައުންސިލު ތަކުގައިވެސް ރައްޔިތުންނާއި ގުޅިގެން މަސައްކަތް ކުރެވުނު ނަމަވެސް، ރައްޔިތުންގެ އެދޭ ކަންކަން ފުރިހަމަވެގެން ދާތަން ނުފެންނާތީ، ކައުންސިލާމެދު ރައްޔިތުންގެ އުއްމީދު ވަނީ ކުޑަވެފައެވެ.
ނިޒާރު ވިދާޅުވިގޮތުގައި ފުރަތަމަ ކުރަން އަމާޒު ހިފާފައިވާ އެއް މަސައްކަތަކީ އައްޑޫ ސިޓީގެ ލޭންޑް ޔޫޒް ޕްލޭން ނިންމުމެވެ. އަދި މިކަމަށް ކުރެވޭ މަސައްކަތް ފުރަތަމަ 6 މަސް ދުވަހުގެ ތެރޭގައި ނިންމުމަށް އަމާޒު ހިފާފައިވާކަމަށް ނިޒާރު ވިދާޅުވިއެވެ. ނިޒާރު ވިދާޅުވީ މިފަދަ ކަންކަން ނިންމާއިރު، ސިޓީ ކައުންސިލުން ރައްޔިތުންގެ މަޝްވަރާ ވަރަށް ބޮޑަށް ހޯދާނެ ކަމަށާއި، އެރަށެއްގެ ބިން ބޭނުން ކުރެވޭ ގޮތް ނިންމާނީ އެރަށެއްގެ ރައްޔިތުން ބޭނުންވާ ގޮތަށްކަމަށެވެ.
" ރައްޔިތުންގެ ބައްދަލުވުން ތަކަށް އޮތް ތަރުހީބުވެސް ވަރަށް ކުޑަކޮށް އޮތީ. އެކަން އެހެންވީ ރައްޔިތުންނަށް ދެވޭ އުއްމީދު ކުޑަ ވުމުން. ބައްދަލުވުމެއް ބާއްވާފައި ނިންމާލާފަ ދާ ގޮތަށް، ތަރުތީބު ވާކަމަށް ވާނަމަ، ރައްޔިތުންގެ މާބޮޑު އިންޓްރެސްޓެއް ނުހުންނާނެ. އަޅުގަނޑު މިނިންމަނީ އައު ކައުންސިލާއި އެކު ރައްޔިތުންނަށް ހުށަހެޅޭ ހުށަހެޅުމެ، ކުލަ ޖައްސަން މަސައްކަތް ކުރާ ކައުންސިލަކަށް [ވުމަށް]. އެހެންވީމަ ދެން ބާއްވާ ކައުންސިލަކަށް ވެސް އެނގޭނެ މުހިންމު ކަމެއްގަ މިދަނީ. އެހެންވީމަ މިހުށަހަޅާ ހުށަހެޅުން އަމަލީ ގޮތުން މަސައްކަތް ކުރާނެ ކަން. އުއްމީދު ދެވެންޏާ ތަރުހީބުވެސް ލިބޭނެ. " ނިޒާރު ވިދާޅުވިއެވެ.
މިނިސްޓަރ@ShimranAb އައްޑޫ އަށްކުރެއްވި ޒިޔާރަތުގައި އަޅުގަޑާއި ބައްދަލުކޮށް އައްޑޫއަށް މިވަގުތު ދިމާވެފައިވާ މައްސަލަތަލާއި ގުޅޭގޮތުން މަޝްވަރާކުރެއްވި.އަދި ފުލުހުންގެ މަސައްކަތް އައްޑޫގައި އިތުރަށް ހަރުދަނާކޮށް ފުލުހުންގެއަދަދު އިތުރުކުރެވިދާނެގޮތާއިމެދު މަޝްވަރާ ކުރެއްވި. pic.twitter.com/7iH12eNxH2
— Ali Nizar (@DhekunuNizar) April 26, 2021
ނިޒާރު ވިދާޅުވާ ގޮތުގައި ތަރައްޤީގެ ބޮޑެތި މަޝްރޫޢުތައް މިހާރުވެސް ސިޓީގެ އެކި ހިސާބުތަކުގައި ހިންގަމުން އަންނަ އިރު، އެމަޝްރޫޢުތައް ކުރިއަށް ގެންދަންވަނީ ރައްޔިތުންގެ އެދޭ ގޮތަށެވެ. އަދި އައު ކައުންސިލުން މިކަން ކަށަވަރު ކުރުމަށް މަސައްކަތް ކުރައްވާނެކަމަށް އޭނާ ވިދާޅުވިއެވެ.
އަލަށް އިންތިޙާބުވި އައްޑޫސިޓީ ކައުންސިލުގައި، މޭޔަރ ފިޔަވައި 12 ދާއިރާ އަކުން މެންބަރުން ވަނީ އިންތިޙާބު ވެފައެވެ. މީގެ ތެރެއިން އެމްޑީޕީ 8 ގޮނޑި ލިބިފައިވާއިރު، ޕީޕީއެމް އިން 3 ގޮނޑި ކާމިޔާބުކުރިއެވެ. އަދި އަމިއްލަ ގޮތުން ވާދަކޮށް 3 ފަރާތެއް ގޮނޑި ކާމިޔާބު ކޮށްފައިވެއެވެ. މިއީ އައްޑޫސިޓީ ކައުންސިލު އުފެދުމަށް ފަހު، އެމްޑީޕީ ފިޔަވައި އެހެން ޕާޓީ އަކުން ކައުންސިލް ގޮނޑި ގެންދިޔަ ފުރަތަމަ ފަހަރެވެ.
މިކަމަށް އިޝާރާތް ކުރައްވާ ނިޒާރު ވިދާޅުވީ، މޭޔަރ ކަމަށް ވަޑައިގަތީ ޕާޓީ ޓިކެޓުގައި ކަމުގައި ވިއަސް ސިޓީ ކައުންސިލުގެ ކަންކަމާއި ސިޔާސީ ހަރަކާތްތަކަކީ ވަކިން ކުރިއަށް ގެންދަވާނެ ކަންކަން ކަމަށެވެ. އަދި ހިޔާލު ތަފާތުވިޔަސް އަލަށް އިންތިޙާބުވި ކައުންސިލުގެ ހުރިހާ މެންބަރުންވެސް އައްޑޫގެ ތަރައްޤީއަށް އެއްބާރުލުން ދެއްވާނެކަމުގެ ޔަޤީންކަން ލިބިފައިވާކަމަށް އޭނާ ވިދާޅުވިއެވެ.