އައްޑޫގެ ގުޅިފައިވާ ރަށްތަކުން ފްލޫ ކްލިނިކަށް ދިޔަ މީހަކު ޕޮޒިޓިވް ވުމާއި ގުޅިގެން މުޅި އައްޑޫ ސިޓީ މޮނީޓަރިންއަށް ލައިފިއެވެ.
ޕޮޒިޓިވް ވެފައިވަނީ ހިތަދޫގައި ހުރި ފްލޫ ކްލިނިކަށް ދެއްކި ފޭދޫ މީހެއް ކަމަށް މައުލޫމާތު ލިބެއެވެ. މިކަން އައްޑޫ އިކުއެޓޯރިއަލް ހޮސްޕިޓަލުން ވަނީ ކަށަވަރު ކޮށްދީފައެވެ. އައްޑޫގެ ގުޅިފައިވާ ރަށްތަކުން މީހަކު ޕޮޒިޓިވްވި ވެފައި މިވަނީ ދާދި ފަހުން ވަކިން އޮންނަ ހުޅުމީދޫ ފްލޫ ކްލިނިކަށް ދެއްކި މީހަކު ޕޮޒިޓިވްވެ އެރަށް މޮނީޓަރިންއަށް ލާފައިވާ ދަނޑިވަޅެއްގައެވެ.
މިއާއެކު އައްޑޫގައި މިވަގުތު އެކްޓިވް ކޭސް އަދަދުވަނީ 9 އަށް އަރާފައެވެ. ހުޅުމީދޫ މިދިޔަ ބުރާސްފަތި ދުވަހު މޮނިޓަރިން އަށް ލާފައި ވާއިރު، އެރަށުން ހަތްމީހަކު މިހާރުވަނީ ބައްޔަށް ޕޮޒިޓިވްވެފައެވެ. އެއީ ފްލޫ ކްލިނިކުން ޕޮޒިޓިވްވި މީހަކާއި، އޭނާގެ ޑައިރެކްޓް ކޮންޓެކްޓުންގެ ތެރޭގައި ހިމެނޭ 5 މީހަކާއި، ހޯމް ކަރަންޓީނުގައި ހުރެ ޕޮޒިޓިވްވި މީހަކާއި އެކުއެވެ. ހުޅުމީދޫ ކޭސް އާއި ގުޅިގެން ކޮންޓްކްޓް ޓްރޭސިން ހަދައި 17 މީހަކު ވަނީ ކަރަންޓީނު ކުރެވިފައެވެ.
މީގެ އިތުރުން ހިތަދޫގައި ވެސް ހޯމް ކަރަންޓީނުގައި ހުރި މީހަކު ޕޮޒިޓިވްވެފައިވާ ކަމަށް އޭއީއެޗް އިން ވިދާޅުވެއެވެ.
އައްޑޫސިޓީ ހިތަދޫން ފްލޫ ކްލިނިކަށް ދައްކައިގެން އެންމެ ފަހުން މީހަކު ޕޮޒިޓިވް ވެފައިވަނީ މިދިޔަ ފެބްރުއަރީ މަހުއެވެ. އެފަހަރުގެ ކޭސް އާއި ގުޅިގެން 50 އަށް ވުރެ ގިނަ މީހުން އެކްލަސްޓަރގައި ޕޮޒިޓިވްވިއެވެ. މިއެންމެވެސް ބަލިން ރަނގަޅުވެ ވަނީ ދޫކޮށްލާފައެވެ.