މިއަހަރުގެ ފުރަތަމަ 4 މަސްދުވަސްތެރޭ 389،770 ފަތުރުވެރިން ރާއްޖެއަށް ޒިޔާރަތްކޮށްފިއެވެ.
ޓޫރިޒަމް މިނިސްޓްރީން ޢާއްމުކޮށްފައިވާ ތަފާސްހިސާބުތައް ދައްކާގޮތުން މިޢަދަދަކީ 2019ވަނަ އަހަރު ރާއްޖެއަށް މި މުއްދަތުގައި ޒިޔާރަތްކުރި 646،092 އާ އަޅާބަލާއިރު %39.7 ދަށް އަދަދެެކެވެ. އަދި 2020ވަނަ އަހަރާއި އަޅާބަލާއިރު %1.8 އިތުރު ޢަދަދެކެވެ.
ފާއިތުވި 4 މަސްދުވަހަށް ބަލާއިރު ރާއްޖެއަށް އެންމެ ގިނަ ޢަދަދަކަށް ފަތުުރުވެރިން އައިސްފައިވަނީ މާރޗުމަހުއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ ޖެނުއަރީމަހު ރާއްޖެއަށް އައިސްފައިވަނީ 92،103 ފަތުރުވެރިންނެވެ. ފެބްރުއަރީމަހު ރާއްޖެއަށް 96،882 ފަތުރުވެރިންނެވެ. އަދި މަރޗުމަހު ރާއްޖެއަށް 109،585 ފަތުރުވެރިން އައިސްފައިވާއިރު ނިމުނު އޭޕްރީލްމަހު ރާއްޖެއަށް އައިސްފައިވަނީ 91،200 ފަތުރުވެރިންނެވެ.
އޭޕްރީލްމަސްތެރޭ ރާއްޖެއަށް އެންމެގިނަ ޢަދަދަކަށް ފަތުރުވެރިން އައިސްފައިވަނީ އެމަހުގެ 2ވަނަ ދުވަހުއެވެ. އެގޮތުން އެދުވަހު ރާއްޖެއަށް 5،141 ފަތުރުވެރިން އައިސްފައިވެއެވެ.
ތަފާސްހިސާބުތައް ދައްކާގޮތުން މިއަހަރުގެ ފުރަތަމަ 4 މަސްދުވަސްތެރޭ ރާއްޖެއަށް އެންމެ ގިނަ ޢަދަދަކަށް ފަތުރުވެރިން އަައިސްފައިވަނީ އިންޑިއާއިންނާއި ރަޝިއާއިންނެވެ.
މިހާރު އެވްރެޖްކޮށް ކޮންމެ ދުވަހަކު ރާއްޖެއަށް 3،040 ފަތުރުވެރިން އަންނައިރު، ފަތުރުވެރިން ރާއްޖޭގައި އެވްރެޖްކޮށް 9 ދުވަހުގެ ޗުއްޓީއެއް ހޭދަކުރާކަމަށް ޓޫރިޒަމް މިނިސްޓްރީން ހާމަކުރެއެވެ.