މިއަހަރު ނިމުމުގެ ކުރިން އެންމެ ކުޑަ އުޖޫރަ ކަނޑައަޅައި، މަސައްކަތްތެރިންނާއި ގުޅޭ މުހިންމު ދެ ޤާނޫނެއް ފާސްކުރުމަށް މަސައްކަތް ކުރަމުންދާކަމަށް އިކޮނޮމިކް މިނިސްޓަރ ފައްޔާޒު އިސްމާޢީލް ވިދާޅުވެއްޖެއެވެ.
ބައިނަލްއަޤްވާމީ މަސައްކަތްތެރިންގެ ދުވަހާއި ގުޅިގެން ކުރެއްވި ޓްވީޓެއްގައި އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ، މިދިޔަ އަހަރަކީ މަސައްކަތްތެރިންނަށް ގިނަ ދަތިތަކާއި ކުރިމަތިލާން ޖެހުނު އަހަރެއް ނަމަވެސް، މިއަހަރު އުއްމީދީ ބަދަލުތަކެއް އަންނާނެ ކަމަށެވެ. އެގޮތުން ޤާނޫނުގައި މިހާރު ބުނެފައިވާ އެންމެ ކުޑަ އުޖޫރަ، އަހަރު ނިމުމުގެ ކުރިން ކަނޑައަޅަން މަސައްކަތް ކުރަމުންދާކަމަށްކަމަށް މިނިސްޓަރ ވިދާޅުވިއެވެ.
ސަރުކާރުން ވަޒީފާއާބެހޭ ޤާނޫނަށް ގިނަ އިސްލާހުތަކެއް ގެނެސްފައިވާއިރު، އެންމެ މުހިންމު އިސްލާހަކީ 2021 ވަނަ އަހަރު ނިމުމުގެ ކުރިން އެންމެ ކުޑަ އުޖޫރަ ކަނޑައެޅުމެވެ. މިއީ ރައީސް ސާލިހުގެ ވަޢުދުފުޅެއްވެސްމެއެވެ. ޤާނޫނަށް ގެނައި އިސްލާހުގެ ދަށުން 9 ދާއިރާއަކުން އަހަރު ނިންމުމުގެ ކުރީން އެންމެ ކުޑަ އުޖޫރަ ކަނޑައެޅުމަށް ލާޒިމް ކުރެއެވެ. މީގެ ތެރޭގައި މަސްވެރިކަމާއި، ދަނޑުވެރިކަން، ކޮންސްޓްރަކްޝަން، ފަތުރުވެރިކަމާއި، ދަތުރުފަތުރުގެ ސިނާޢަތާއި، ސިއްޙީ އަދި ތަޢުލީމީ ދާއިރާގެ އިތުރުން، އައިސީޓީ އަދި މެރިޓައިމް ދައިރާއިން އެންމެ ކުޑަ އުޖޫރަ ކަނޑައަޅަން ޖެހެއެވެ.
މިއިސްލާހުގެ އިތުރުން މަސައްކަތްތެރިންގެ ހައްޤުތައް ރައްކާތެރި ކުރުމަށް، ގިނަ އިސްލާހުތަކެއް ވަނީ ގެނެސްފައެވެ. އެގޮތުން ފަތުރުވެރިކަމުގެ ދައިރާގައި ސާވިސް ޗާޖު ހަމަހަމައަށް އެންމެންގެ މެދުގައި މަހުން މަހަށް ދިނުމާއި، އަދި އެހެނިހެން ވިޔަފާރިތަކަށް ވެސް ސާވިސް ޗާޖު ނެގުމުގެ އިޙްތިޔާރު މިޤާނޫނުގެ ދަށުން ވަނީ ދީފައެވެ.
މިނިސްޓަރ ފައްޔާޒު ވިދާޅުވި ގޮތުގަގައި މަސައްކަތްތެރިންނަށް މުހިންމު ދެ ޤާނޫނެއް މިއަހަރު ތެރޭ އަންނާނެއެވެ. އެއީ މަސައްކަތު މާހައުލުގައި ރައްކާތެރިކަން ފޯރުކޮށްދިނުމުގެ ޤާނޫނާއި އިންޑަސްޓްރިއަލް ރިލޭޝަންސް ޤާނޫނެވެ. މަސައްކަތު މާހައުލުގައި ރައްކާތެރިކަން ފޯރުކޮށްދިނުމުގެ ޤާނޫނަކީ މިފަހަކަށް އައިސް މަަސައްކަތެރިން ގެނައުމަށް ވަކާލާތު ކުރަމުން އަންނަ ޤާނޫނެކެވެ. މިޤާނޫނުގެ ދަށުން މަސައްކަތުގެ މާހައުލުގައި، ކުރާ މަސައްކަތެއްގެ ބާވަތުން ރައްކާތެރިކަން ފޯރުކޮށްދިނުމަށް ވަޒީފާ ދޭ ފަރާތްތަކަށް ލާޒިމް ވާނެއެވެ.
ރާއްޖޭގެ މަސައްކަތު މާހައުލުގައި އެންމެ އެކަށީގެންވާ ރައްކާތެރިކަން ނުދެވޭ ކަމަށް ގިނަ މަސައްކަތެރިން އަބަދުވެސް ފާހަގަކުރެއެވެ. އަދި މިފަދަ ކަންކަމުގެ ސަބަބުން ހިތާމަވެރި ހާދިސާތައް ހިނގައި މީހުންގެ ފުރާނައަށް ވެސް ނުރައްކާ ވެފައި އެބަހުއްޓެވެ.
މީގެ އިތުރުން އިންޑަސްޓްރިއަލް ރިލޭޝަން ޤާނޫނުވެސް މިއަހަރު ތެރޭގައި އަންނާނެ ކަން ސަރުކާރުން މިވަނީ ހާމަ ކޮށްފައެވެ. މިޤާނޫނަކީ ދޭދޭ ކުންފުނިތަކުގެ މެދުގައި އެއްބަސްވުންތައް ހެދިގެންދާއިރު، ޖެހޭ މައްސަލަތައް ހައްލު ކުރުމަށް މުހިންމު ޤާނޫނެކެވެ. މިފަދަ ޤާނޫނެއްގެ ސަބަބުން ވަޒީފާ އަދާކުރާ ފަރާތްތައް ހިމާޔަތް ކުރުމަށް އިތުރު ބާރެއް ލިބިގެންދާކަމަށް ތަޖުރިބާކާރުން ބުނެއެވެ. މިކަންކަމާއެކު މިއަހަރު މަސައްކަތްތެރިންނަށް ވަރަށް ފައިދާ ކުރަނިވި އަދި އުއްމީދީ އަހަރަކަށް ވާނެކަމަށް ސަރުކާރުން ވިދާޅުވެއެވެ.