މިދިޔަ އަހަރު އެމްއެމްއޭއިން 633.9 މިލިއަން ޑޮލަރު ވިއްކާފައިވާކަމަށް އެ އޮތޯރިޓީން ހާމަކޮށްފިއެވެ.
މިއީ ދިވެހި ރުފިޔާއިން ބަލާނަމަ 9.7 ބިލިއަން ރުފިޔާއެވެ.
މޯލްޑިވްސް މަނިޓަރީ އޮތޯރިޓީ، އެމްއެމްއޭއިން އާއްމުކޮށްފައިވާ މިދިޔަ އަހަރުގެ އަހަރީ ރިޕޯޓުގައިވާގޮތުން ޑޮލަރުގެ ރޭޓް އެއް ހަަމައެއްގައި ހިފެހެއްޓުމަށް މިދިޔަ އަހަރު ވިއްކި ޑޮލަރުގެ އަދަދު އިތުރުކޮށްފައިވާ ކަމަށެވެ. އެގޮތުން ހުސްވި އަހަރު 633.9 ޑޮލަރު ދޫކޮށްފައިވާއިރު، މިއީ 2019 ވަނަ އަހަރާއި އަޅާ ބަލާއިރު 1 އިންސައްތަ އިތުރު އަދަދެކެވެ.
އެމްއެމްއީން ވިދާޅުވީ ކޯވިޑް19އާ ގުޅިގެން އިޤްތިސާދު މަޑު ޖެހުމަކަށް އައުމުން، އިޤްތިސާދީ އެކި ބޭނުންތަކަށް ބޭރު ފައިސާ ބޭނުންކުރާ މިންވަރު ދަށްވި ނަމަވެސް ކާޑުގެ ބާވަތްތަކާއި ސިއްޙީ ސާމާނު ގަތުމަށް ބޭރު ފައިސާ ބޭނުންކުރާ މިންވަރު އިތުރުވި ކަމަށެވެ.
އެމްއެމްއޭއިން އެންމެ ގިނަ އަދަދަކަށް ޑޮލަރު ވިއްކާފައިވަނީ ސަރުކާރު ހިއްސާވާ ކުންފުނިތަކަށެވެ. މިއީ މައިގަނޑު ގޮތެއްގައި ތަރައްޤީގެ މަޝްރޫޢުތަކަށާއި، ވިޔަފާރީ ހިންގުމުގެ މަސައްކަތްތަކަށެވެ.
އެމްއެމްއޭއިން ވަނީ މިދިޔަ އަހަރުތެރޭ ސަރުކާރު ހިއްސާވާ ކުންފުނިތަކަށް 392.8 މިލިއަން ޑޮލަރު ވިއްކާފައިވާއިރު، މިއީ މިދިޔަ އަހަރު އެމްއެމްއޭއިން ވިއްކާފައިވާ މުޅި ޖުމްލަ ޑޮލަރުގެ 62 އިންސައްތައެވެ. މި އަދަދަކީ 2019 ވަނަ އަހަރާއި އަޅާބަލާއިރު 2 އިންސައްތަ ދަށް އަދަދެކެވެ.
ސަރުކާރު ހިއްސާވާ ކުންފުނިތަކުގެ އިތުރުން ދެން އެންމެ ގިނަ އަދަދަކަށް އެމްއެމްއޭއިން ޑޮލަރު ވިއްކާފައިވަނީ ރާއްޖޭގައި އޮޕަރޭޓްކުރާ ބޭންކުތަކަށެވެ. ކޯވިޑާއި ގުޅިގެން ބޭންކުތަކަށް ވިއްކި ޑޮލަރުގެ އަދަދުވެސް އެމްއެމްއޭއިން ވަނީ އިތުރުކޮށްފައެވެ.
އެގޮތުން ހުސްވި އަހަރުތެރޭ އެމްއެމްއޭއިން ވަނީ ބޭންކުތަކަށް 241 މިލިއަން ޑޮލަރު ވިއްކާފައެވެ. މިއީ 2019 ވަނަ އަހަރާއި އަޅާބަލާއިރު 6 އިންސައްތަ އިތުރު އަދަދެކެވެ.