ރިސޯޓްތަކުގައި މަސައްކަތްކުރާ މުވައްޒަފުންގެ ތެރެއިން މިހާތަނަށް 21،000 މުވައްޒަފުން ކޯވިޑް-19އިން ރައްކާތެރިވުމަށް ޖަހާ ވެކްސިންގެ 2 ޑޯޒް ފުރިހަމަކޮށްފައިވާ ކަމަށް ޓޫރިޒަމް މިނިސްޓަރ ޢަބްދުﷲ މަޢުސޫމް ވިދާޅުވެއްޖެއެވެ.
ރާއްޖޭގައި ކޯވިޑް ވެކްސިން ދިނުމުގެ ޤައުމީ ޕްރޮގްރާމް ފަށާފައިވަނީ މިދިޔަ ފެބްރުއަރީ މަހުގެ ފުރަތަމަ ދުވަހުއެވެ. ފަތުރުވެރިކަމުގެ ދާއިރާގައި މަސައްކަތްކުރާ މީހުންނަކީ ރާއްޖެ އަންނަ ފަތުރުވެރިންނާއި އެންމެ ގާތުން މަސައްކަތްކުރާ ބަޔަކަށްވުމުން ވެކްސިން ޕްރޮގްރާމް ފެށުމާއެކު ޚާއްސަ ސަމާލުކަމެއް މިސިނާއަތަށް ވަނީ ދީފައެވެ. އެގޮތުން ވެކްސިން ޕްރޮގްރާމް ފެށިތާ 3 ދުވަހުގެ ތެރޭގައި ފަތުރުވެރިކަމުގެ ދާއިރާގެ ފްރަންޓްލައިންގައި މަސައްކަތް ކުރާ މުވައްޒަފުންނަށް ވެކްސިން ދޭންވަނީ ފަށާފައެވެ.
ޓީވީ ޕްރޮގްރާމެއްގައި ވާހަކަަފުޅުދައްކަވަމުން ޓޫރިޒަމް މިނިސްޓަރ އަބްދުﷲ މަޢުސޫމް ވިދާޅުވީ، އުންމީދަކީ ކުރިއަށް އޮތްތާގައި ކޯވިޑްގެ ޚާލަތު ރާއްޖޭގައި ރަނގަޅުވެ، ވެކްސިންގެ 2 ޑޯޒް ހަމަކުރުމުން ރިސޯޓު މުވައްޒަފުންނަށް ޢާއިލާ ގާތަށް ދެވޭނެ ގޮތެއް ވުން ކަމަށެވެ.
" ވަރަށް ބޮޑު ގުރުބާނީއެއް ރިސޯޓް މުވައްޒަފުންވަމުން އެދަނީ، އުއްމީދަނީ އެބޭފުޅުން އެވަމުންދާ ގުރުބާނީގެ ކޮންމެވެސް އަގުވަޒަންކުރުމުގެ ސިފައިގައި ފިރިދަރިން ކައިރިއަށް އަނބިދަރިންކައިރިއަށް ދެވޭނެ ކަމަށް،" މިނިސްޓަރ މަޢުސޫމް ވިދާޅުވިއެވެ.
ރިސޯޓް މުވައްޒަފުންގެ ތެރެއިން %99 މުވައްޒަފުންނަށް މިހާރުވަނީ ވެކްސިންގެ ފުރަތަމަ ޑޯޒް ދީފައެވެ. ވެކްސިން ޖަހާފައިވާ ބަޔަކު އުޅޭ މަންޒިލަކަށް ރާއްޖެ ހެދުމަށް "އަހަރެން ވެކްސިން ޖަހައިފިން" ނުވަތަ "އައިއޭމް ވެކްސިނޭޓެޑް"ގެ ނަމުގައި ދާދިފަހުން ކެމްޕެއިނެއްވެސްވަނީ ފަށާފައެވެ.
މި ކެމްޕެއިނަކީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން އިސްނަގައިގެން ޓޫރިޒަމް މިނިސްޓްރީއާ ގުޅިގެން ފަށާފައިވާ ކެމްޕެއިނެކެވެ. މިިިކެެމްޕެއިންގެ މަޤްސަދަކީ ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ހުރިހާ ފަރާތްތަކަށް ވެކްސިން ޖަހައި މުޅި ދުނިޔޭންވެސް އެންމެ ފުރަތަމަ "ފުލީ ވެކްސިނޭޓެޑް" ޓޫރިޒަމެއް ޤާއިމްކުރާ ޤައުމަށް ރާއްޖެ ހެދުމެވެ.
އައިއޭމް ވެކްސިނޭޓެޑް ކެމްޕެއިމް ޕްރޮމޯޓްކުރުމަށް ވެކްސިން ފުރިހަމަކުރުމުން ވިޒިޓް މޯލްޑިވްސް ވެބްސައިޓްގައި ޤާއިމްކޮށްފައިވާ މައިކްރޯސައިޓުން، ފަތުރުވެރިކަމުގެ ދާއިރާގައި ވެކްސިން ފުރިހަމަކުރާ ރިސޯޓް، ގެސްޓްހައުސް އަދި ސަފާރީ ފަދަ ތަންތަނުގެ މައުލޫމާތާއި ފޮޓޯ ގެނެސްދޭނެއެވެ.