މިދިޔަ މަހުގެ 6 ވަނަ ދުވަހު ރައީސް ނަޝީދު އަވަހާރަކޮށްލެއްވުމަށް ދިން ހަމަލާގެ ތަހްޤީގު އަންނަ މަހު ނިންމާލެވޭނެކަމަށް އުއްމީދުކުރައްވާކަމަށް ޕްރޮސެކިއުޓަރ ޖެނަރަލް ހުސައިން ޝަމީމް ވިދާޅުވެއްޖެއެވެ.
ޕީޖީ ޝަމީމް ވިދާޅުވީ މި މައްސަލައިގެ ތަޙްޤީގު ކުރިއަށްދާ ގޮތާ މެދު ހިތްހަމަޖެހިވަޑައިގަންނަވާކަމަށެވެ.
ޕްރޮސެކިއުޓަރ ޖެނަރަލްގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕީއެސްއެމް ނިއުސްއިން ދެންނެވި ސުވާލަކަށް ޖަވާބުދެއްވަމުން ޕީޖީ ޝަމީމް ވިދާޅުވީ ރައީސް ނަޝީދު އަވަހާރަކޮށްލެއްވުމަށް ދިން ހަމަލާއާ ގުޅިގެން ކުރިއަށްދާ ތަޙްޤީގު ބާރު ސްޕީޑެއްގައި ކުރިއަށްދާކަމަށެވެ. އަދި އެ ހަދިސާ ތަހްޤީގުކުރުމަށްޓަކައި ފުލުހުންނާއި ޕްރޮސެކިއުޓަރ ޖެނަރަލްގެ އޮފީހާއި ބޭރުގެ ތަޖުރިބާކާރުން ގުޅިގެން މަސައްކަތް ކުރައްވަމުން އަންނަކަމަށާއި ތަޙްޤީގު ކުރިއަށް ދާ ގޮތާއި މެދު ހިތްހަމަޖެހި ވަޑައިގަންނަވާކަމަށްވެސް ޝަމީމް ވިދާޅުވިއެވެ.
މިބާވަތުގެ މައްސަލަތަކަކީ ތަޙްޤީގުކުރަން އުނދަގޫ މައްސަލަތަކެއްކަން ފާހަގަކުރައްވާ ޝަމީމް ވިދާޅުވީ މައްސަލައިގެ ތަޙްޤީގު އަވަސްކުރުމުންވެސް ނުވަތަ މާ ލަސްކުރުމުންވެސް ގެއްލުންތަކެއް ކުރިމަތިވާނެކަމަށެވެ. މިގޮތުން އަވަސް އަރުވާލައިފިނަމަ ހާދިސާ ހިންގުމުގައި ބައިވެރިވާ ފަރާތްތައް ނުހޯދިދާނެކަމަށާއި ލަސްކޮށްފިނަމަ ހެކި ނައްތާލުމަށްވެސް މަސައްކަތް ކޮށްފާނެކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ މި މައްސަލައިގެ ތަހްޤީގު އަންނަމަ މަހު ނިންމާލެވޭނެކަމަށް އުއްމީދުކުރައްވާކަމަށެވެ. އަދި އޯގަސްޓްމަހުގެ 5 ވަނަ ދުވަހުގެ ކުރިން މައްސަލަ ކޯޓަށް ހުށައެޅޭނެކަމަށާއި އަދި އެއަށްވުރެ އަވަހަށްވެސް މައްސަލަ ކޯޓަށް ހުށައެޅުމަށް މަސައްކަތް ކުރައްވަމުން ގެންދަވާނެކަމަށް ޝަމީމް ވިދާޅުވިއެވެ.
"އަވަސް އަރުވާލުމަށްޓަކައި އެއްވެސް ކަމެއް ދޫނުކޮށްލާނަން. ފައިނޭސްއާއި ކަން ހިންގި މީހުންވެސް ހޯދުމަށް މަސައްކަތް އެބަކުރަން. އަމަލީ ގޮތުން ހަރަކާތްތެރިވާ ފާރާތްތައް ކޯޓަށް ހާޒިރުކުރުވިނަމަވެސް ތަޙްޤީގުގެ އިތުރު ބައިތައް ނުނިމޭނެ. މިކަމުން ރަނގަޅު ނަތީޖާއެއް ލިބޭނެ. 45 ދުވަހާއި އާއި 75 ދުވަހުގެ މުއްދަތެއް ތަޙްޤީކަށް ހޭދަވާންމިޖެހެނީ. ހަޤީގަތުގައި މިފަދަ މައްސަލަތައް ތަޙްޤީގުކުރުމަށް މިއި ޚުރު މުއްދަތެއް. ނަމަވެސް ފުލުހުން އެމަސައްކަތް ކުރާނެ. "ޕްރޮސެކއިުޓަރ ޖެނަރަލް ހުސެއިން ޝަމީމް ވިދާޅުވިއެވެ.
މިދިޔަ މަހުގެ 6 ވަނަ ދުވަހުގެރޭ ރައީސް ނަޝީދު ދިރިއުޅުއްވާ ގ.ކެނެރީގެއިން ނުކުމުވަޑައިގެން ނީލޯފަރު ހިނގުމުން މަޖީދީމަގާވީ ކޮޅަށް ހިންގަވާފައި ވަޑައިގެން ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލުމާ ގުޅިގެން އެމަނިކުފާނަށް ވަނީ ބޮޑެތި އަނިޔާތަކެއް ލިބިފައެވެ.
މި ހަމަލާއާއި ގުޅިގެން މިހާތަަނަށް ހައްޔަރުކުރި ހަތަރު މީހުންނަކީ މއ.ފޭރުގެ ޢުމުރުން 21 އަހަރުގެ މުޖާޒް އަޙްމަދާއި ގއ.ކޮނޑޭ ފޮޅޭމާގޭ ޢުމުރުން 32 އަހަރުގެ ތަހްމީނު އަޙްމަދާއި، ރައީސް ނަޝީދަށް ހަމަލާދިން ބޮން ގޮއްވާލީ ވ.ތިނަދޫ ހިޔާ ޢުމުރުން 25 އަހަރުގެ އަދުހަމް އަޙްމަދު ރަޝީދާއި ލ.ގަން / ދުންފިނި އުފާ، ޢުމުރުން 23 އަހަރުގެ އަހުމަދު ފާތިހެވެ.
މީގެތެރެއިން އަދުހަމް އަޙްމަދަކީ ރައީސް ނަޝީދަށް ހަމަލާދިނުމަށް ސައިކަލްގައި ހަރުކޮށްފައި އޮތް ބޮން ގޮއްވާލުމުގައި އަމަލީ ގޮތުން ބައިވެރިވި މީހާއެވެ. ފުލުހުން އާއްމުކުރި ވީޑިއޯ ފުޓޭޖްތަކަށް ބަލާއިރު މީނާ މިކަން ކޮށްފައިވަނީ ރައީސް ނަޝީދަށް ފާރަލައިގެން ފިލާ ހުރެކަން އެނގެއެވެ. ދެން މި މައްސަލާގައި ހަރަުކޮށްފައިވާ ތަހްމީނު އަޙްމަދަކީ ބޮން ހަރުކޮށް ގޮއްވާލި ސައިކަލްގެ ވެރި ފަރާތެވެ. އަދި ފުލުހުން ޓެރަރިޒްމާ ދެކުޅޮށް ކުރިއަށްގެންދިޔަ އޮޕަރޭޝަންތަކުގައި ހައްޔަރު ކުރި ބައެއްގެ ތެރޭގައި ރަޢީސް ނަޝީދަށް ދިން ހަމާލާގައި ބައިވެރިވި މީހަކު ދެނެގަނެވިފައިވާކަމަށް ފުލުހުން ވަނީ ހާމަކުރައްވާފައެވެ.