ރާއްޖޭގެ ބޯޑަރުތަށް އަލުން ހުޅުވާލިތާ އެއް އަހަރު, ގޮންޖެހުންތަކާއި އެކު ގިނަ ކާމިޔާބީތަކެއް

ރާއްޖޭގެ ބޯޑަރު އަލުން ހުޅުވާލިފަހުން އެއް އަހަރު ފުރުން ފާހަގަކުރުމަށްޓަކައި މިއަދު ރާއްޖެއަށް އައި ފުރަތަމަ ފަތުރުވެރިއާއަށް ވެލާނާ އިންޓަރނޭޝަނަލް އެއަރޕޯޓުން ހޫނު މަރުޙަބާއެއް ކިޔައިފިއެވެ.

މިއަދު ރާއްޖެއަށް އައި ފުރަތަމަ ފަތުރުވެރިއަކީ ސްވިޓްޒަރލޭންޑުގެ ފަތުރުވެރިއެއް ކަމަށްވާ ކޮބެލް ކްލަމެންސް ސްޓީޕެވެ. އޭނާ ރާއްޖެއަށް އައިސްފައިވަނީ ފްލައިދުބާއީގެ ފްލައިޓެއްގައެވެ.

ކޮބެލް ކްލަމެންސް ރާއްޖެއަށް އައީ އޭނާގެ ހަޔާތުގެ ބައިވެރިއާ ނިކޮލާ ޑިކްސަން ސާންއާއި އެކުއެވެ.
ނޫސްވެރިންނާއި ވާހަކަދައްކަމުން ކޮބެލް ކްލަމެންސް ސްޓީޕް ބުނީ މިއީ އޭނާ ރާއްޖެއަށް އައި ފުރަތަމަ ފަހަރު ކަމަށެވެ. އަދި ރާއްޖެއަށް އައުމަށް ނިންމީ ރާއްޖޭގެ ރީތިކަން ބަލާލާ ހިތްހަމަ ޖައްސާލުމަށް ކަމަށް ކޮބެލް ބުންޏެވެ.

" ދުނިޔޭގެ މި ހިސާބުގެ ރަށްތަކަށް އަދި ޒިޔާރަތް ނުކުރަން، ރާއްޖެއަށް އަންނަން ބޭނުންވީ ރާއްޖޭގެ ރީތިކަން ބަލާލަން، މޫދުގައި ފަތާލާ ހިތްހަމަ ޖައްސާލުމަށް މި ދަތުރު މިއައީ،" ކޮބެލް ބުންޏެވެ.

ބޮޑު ބެރުގެ ހަރަކާތާއެކު މި ފަތުރުވެރިއާއަށް މަރުޙަބާ ކިޔުމަށް ބޭއްވި ހަރަކާތުގައި ޓޫރިޒަމް މިނިސްޓްރީއާއި، އެމްއޭސީއެލް އާއި އިމިގްރޭޝަންގެ ފަރާތުން ވަނީ ބައިވެރިވެފައެވެ.

ރާއްޖޭގެ ބޯޑަރު އަލުން ހުޅުވާލިތާ މިއަދަށް އެއް އަހަރު ފުރިފައިވާއިރު، ރާއްޖެއަށް އަންނަ ފަތުރުވެރިންގެ އަދަދުތައް އިތުރުކޮށް ރާއްޖޭގެ ފަތުރުވެރިކަން ދުނިޔެއަށް އިޝްތިހާރު ކުރުމަށް ސަރުކާރުންދަނީ ގިނަ މަސައްކަތްތަކެއް ކުރަމުންނެވެ.

މިކަމާއި ގުޅޭގޮތުން ވާހަކަދައްކަވަމުން ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ އައްސަދު ރިޒާ ވިދާޅުވީ ބޯޑަރު އަލުން ހުޅުވިފަހުން މިވީ މުއްދަތުގައި ރާއްޖެއަށް 7 ލައްކައަށްވުރެ ގިނަ ފަތުރުވެރިން އައިސްފައިވާކަމަށެވެ.

" އެއް އަހަރު ފުރިގެން ދިޔައިރު، 7 ލައްކައަށްވުރެ ގިނަ ފަތުރުވެރިންވަނީ ޒިޔާރަތްކޮށްފައި، މިއަހަރު ނިމޭއިރު ރާއްޖެއަށް މިލިއަނަށްކަށްވުރެ ގިނަ ފަތުރުވެރިން ޒިޔާރަތްކުރާނެ ކަމުގެ ޔަޤީންކަން އެބައޮތް،" އައްސަދު ވިދާޅުވިއެވެ.

ކޯވިޑް-19އާ ގުޅިގެން ރާއްޖޭގެ ބޯޑަރުތައް ބަންދުކޮށްފައިވަނީ މިދިޔަ އަހަރުގެ މާޗުމަހުގެ 27 ވަނަ ދުވަހުއެވެ. 110 ދުވަހަށްފަހު ރާއްޖޭގެ ބޯޑަރުތައް އަލުން ހުޅުވާފައިވަނީ އެއަހަރުގެ ޖުލައިމަހުގެ 15 ވަނަ ދުވަހުއެވެ.