ރާއްޖޭގެ ފަތުރުވެރިކަން އިޝްތިހާރު ކުރުމަށް މިހާރުވެސް 10 ޤައުމެއްގައި 14 ހަރަކާތެއް ކުރިއަށް ދާ ކަމަށް އެމްއެމްޕީއާރުސީން ހާމަކޮށްފިއެވެ.
ކޯވިޑާއި ގުޅިގެން ރާއްޖޭގެ ފަތުރުވެރިކަން އިޝްތިހާރު ކުރުމަށް އެމްއެމްޕީއާރުސީންދަނީ ތަފާތު އެކި ޕްލެޓްފޯމްތަކުގެ ބޭނުން ހިފަމުންނެވެ. ރާއްޖޭގެ އިޝްތިހާރު ކުރުމަށް ކުރިއަށްގެންދާ ހަރަކާތްތަކާއި ގުޅޭގޮތުން މައުލޫމާތު ދެއްވަމުން މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވީ ކޯވިޑްގެ ހާލަތާއިއެކު ޓްރެވަލް އެޖެންޓުން ތަމްރީން ކުރުމަށް ގިނަ ހަރަކާތްތަކެއް ކުރިއަށް ގެންދާ ކަމަށެވެ.
ޠައްޔިބު ވިދާޅުވީ އެމްއެމްޕީއާރުސީން ކުރިއާ ޚިލާފަށް މިހާރު އެހެން އެއަރލައިންތަކާއި، ޓްރެވަލް އެޖެންސީތަކާއި ގުޅިގެންވެސް ތަފާތު ހަރަކާތްތައް ކުރިއަށްގެންދާ ކަމަށެވެ.
" ބޭރުގަ އިޝްތިހާރުކުރުން، އައުޓް ޑޯ ކެމްޕޭންސް، ޑިޖިޓަލް ކެމްޕޭން، އޮންލައިން މެގަޒިން، ވެބްސައިޓްތައް، ވެބިނަރސްތަކުގައި ބައިވެރިވަން، އެޖެންޓްސް ޓްރެއިނިންގްސް ކުރިއަށްގެންދަން، ފެއަރސްތަކާއި، ފޭސް ޓްރިޕްސްވެސް ވަރަށް މުހިންމު،" ޠައްޔިބު ވިދާޅުވިއެވެ.
ޠައްޔިބު ވިދާޅުވީ އެމްއެމްޕީއާރުސީން ކުރިއަށްގެންދާ ހަރަކާތްތަކުގެތެރޭގައި ވަކި ވަކި މާރކެޓްތަކަށް އަމާޒްކޮށްގެން ކުރިއަށްގެންދާ ކުދި ކުދި ހަރަކާތްތަކާއި، ގްލޯބަލް ލެވަލްއެއްގައި ކުރިއަށް ގެންދާ ހަރަކާތްތައް ހިިމެނޭ ކަމަށެވެ.
އެމްއެމްޕީއާރުސީގެ މިހާރު ކުރިއަށްދާ ހަރަކާތްތަކުގެތެރޭގައި، ރަޝިއާ، ޗައިނާ، ކޮރެއާ އަދި ޗަޕާން މާކެޓަށް އަމާޒްކޮށްގެން އެޤައުމުގެ ސޯޝަލް މީޑިއާގައި ކުރިއަށްގެންދާ ހަރަކާތްތަކާއި، ޓްރެވަލް އެޖެންޓުން ތަމްރީން ކުރުމުގެ ޕްރޮގްރާމަކާއި، ބްރެޒިލް މާރކެޓަށް އަމާޒްކޮށްގެން ކުރިއަށްދާ ފެމް ޓްރިޕެއް ހިމެނެއެވެ. ދުނިޔޭގެ އެކި ހިސާބުތަކުގައި ރާއްޖޭގެ ފަތުރުވެރިކަމުގެ މައުލޫމާތުތައްދީ ރާއްޖޭގެ ފަތުރުވެރިކަމާއި ގުޅޭ މައުލޫމާތުތައް ވީހާވެސް ގިނަ ބަޔަކަށް ދިނުމަށް ޚާއްސަ މަސައްކަތްތަކެއް ކުރެވެމުންދާ ކަމަށް އެމްއެމްޕީއާރުސީން ވިދާޅުވެއެވެ.
ރާއްޖެ އިޝްތިހާރުކުރުމަށް ރާއްޖެއިން ބޭރުގައި ބާއްވާ 44 ފެއަރއަކާއި ރޯޑްޝޯއެއްގައި މިއަހަރު ބައިވެރިވާނެ ކަމަށް އެމްއެމްޕީއާރުސީން ބުނެއެވެ. ކޯވިޑްގެ ދަތި ދުވަސްތަކުގައިވެސް މިދިޔަ އަހަރުގެ ތެރޭގައި 22 މާކެޓެއްގައި އެމްއެމްޕީއާރުސީން ވަނީ 412 ހަރަކާތެއް ހިންގާފައެވެ.
މީގެތެރެއިން 314 ހަރަކާތަކީ ކޯވިޑްގެ ތެރޭގައި ރާއްޖެ އިޝްތިހާރުކުރުމަށް ހިންގި ހަރަކާތްތަކެވެ. މި ކެމްޕެއިން ހަރަކާތްތައް މެދުވެރިކޮށް މަދުވެގެން 5.2 ބިލިއަން މީހުންނަށް ރާއްޖޭގެ މައުލޫމާތުތައް ހިއްސާކޮށްފައިވާނޭ ކަމަށް އެމްއެމްޕީއާރުސީން ބުނެއެވެ.