މެދުއިރުމަތީގައި ޚާއްސަކޮށް މިސަރަހައްދުގެ ޒުވާން އަންހެން ފަތުރުވެރިންގެ މެދުގައި، ރާއްޖޭގެ މަޤުބޫލުކަން އިތުރުކުރުމަށްޓަކައި މެދުއިރުމަތީގެ މަޝްހޫރު މަޖައްލާއެއް ކަމަށްވާ ކޮސްމޯ ކްލަބް ހައުސް އާއެކު ވިޒިޓް މޯލްޑިވްސްއިން ޚާއްސަ ކެމްޕެއިނެއް ފަށައިފިއެވެ.
މިގޮތުން ވިޒިޓް މޯލްޑިވްސްގެ ދައުވަތަކަށް ކޮސްމޯ ކްލަބް ހައުސްގެ ސޯޝަލް މީޑިޔާގައި ނުފޫޒުގަދަ 6 ފަރާތެއް ފެމިލިއަރައިޒޭޝަން ދަތުރެއްގައި ރާއްޖެވަނީ އައިސްފައެވެ. މިޓީމްގައި ހިމެނޭ އިންފްލުއެންސަރުންގެ ތެރޭގައި މާރވާ އަލް ހާޙް، ލޭލާ އާކިލް ނެޑީން ހޮށްސާމް, މޯނީ ހެލާލް، ސާރާ އަލް ހުމިރި އަދި ޓިވިންކަލް ސްޓަންލީ ހިމެނެއެވެ. މި ދަތުރުގައި ކޮސްމޯ ކްލަބްހައުސްގެ ޓީމް ރާއްޖޭގައި 7 ދުވަސް ހޭދަކުރާނެއެވެ.
ކޮސްމޯ ޕޮލިޓަން އަކީ މެދުއިރުމަތީގައި ޒުވާން އަންހެނުންގެ މެދުގައި ވަރަށް މަޤުބޫލު މަޖައްލާއެކެވެ. މިމަޖައްލާ އަކީ އޮންލައިން، ޑިޖިޓަލް އަދި ޕްރިންޓް މީޑިއަމްގައި ދައުރުކުރާ މަޖައްލާއެކެވެ. އަދި މިމަޖައްލާގައި މަޝްހޫރު އިންފްލުއެންސަރުން ހަދާ ތަފާތު ކޮންޓެންޓްތައް ޕްރޮމޯޓުކުރެއެވެ. ކޮސްމޯޕޮލިޓަން މަޖައްލާގެ ޕަބްލިކޭޝަންތައް ޓިކްޓޮކް، ޔޫޓިއުބް އަދި އިންސްޓަގްރާމްގައި ޝާއިޢުކުރެއެވެ.
ކޮސްމޯ ކްލަބްހައުސްގެ އިންފްލުއެންސަރުން ރާއްޖެއަށް ކުރާ މިދަތުރުގެ ތެރެއިން ރާއްޖޭގެ ދެ ރިޒޯޓެއްގައި ތިބޭނެއެވެ. އެއީ ލަކްސް ސައުތު އަދި އެޓޯލް އާއި ކޮންރެޑް މޯލްޑިވްސް ރަނގަލި އައިލެންޑް އެވެ. މި ޓީމުން ކުރާ ތަޖުރިބާތަކުގެ ތެރޭގައި ރާއްޖޭގެ ކަނޑު އަޑީގެ މަންޒަރުތައް ބަލާލުމަށް ސްނޯކެލްކުރުމާއި ސްޕާ ,ވޯޓާ ސްޕޯޓްސް އަދި ރިޒޯޓް ތަކުން ލިބެން ހުންނަ އެކި ގައުމުތަކުގެ ކެއުންތައް ތަޖުރިބާކޮށްލުން ހިމެނެއެވެ.
ކޮސްމޯ ކްލަބް ހައުސް އިންފްލުއެންސަރުންގެ ދަތުރުގެ ތެރެއިންނާއި ދަތުރު ނިންމުމަށްފަހުވެސް ރާއްޖޭގެ ރީތި މަންޒަރުތަކާއި، ތަޖުރިބާތައް އިޝްތިހާރުކުރުމަށް ޚާއްސަ ވީޑިއޯ، ފޮޓޯ ޑިޖިޓަލް، ވީޑިއޯ އަދި ޕްރިންޓް މެދުވެރިކޮށް މިމަޖައްލާގެ ބެލުންތެރިންނާއި ހަމައަށް ފޯރުކޮށްދޭނެއެވެ. އެގޮތުން ސޯޝަލް މީޑިއާ ޕްލެޓްފޯމްތަކާއި، ޔޫޓިއުބް އަދި ކޮސްމޯ ވެބްސައިޓް މެދުވެރިކޮށް ރާއްޖެ އިޝްތިހާރުކުރާނެއެވެ.
ވިޒިޓް މޯލްޑިވްސްއިން މި ފެމިލިއަރައިޒޭޝަން ޓްރިޕް އިންތިޒާމްކޮށްފައިވަނީ މެދުއިރުމަތީ މާކެޓަށް ވިޒިޓް މޯލްޑިވްސްއިން ކަނޑައަޅާފައިވާ މާކެޓިންގް ސްޓްރެޓަޖީގެ ދަށުންނެވެ.
މެދުއިރުމަށްޗަކީ ރާއްޖޭގެ ފަތުރުވެރިކަމުގެ ދާއިރާއަށް މުހިންމު ސަރަހައްދެކެވެ. މިއީ ރާއްޖޭގެ ބޯޑަރު ހުޅުވިފަހުން ރިކަވާވަމުން އަންނަ މާކެޓެއްވެސްމެއެވެ. އެގޮތުން މިއަހަރުގެ މިހާތަނަށް ރާއްޖެ ޒިޔާރަތްކޮށްފައިވާ 732896 ފަތުރުވެރިންގެ ތެރެއިން 60,450 ފަތުރުވެރިން ރާއްޖެ އައިސްފައިވަނީ މެދުއިރުމަތިންނެވެ.