އައްޑޫސިޓީ ހިތަދޫގައި ހިނގި މުޒާހަރާއެއް ފުލުހުން ބާރުގެ ބޭނުންކޮށްގެން ރޫޅާލައިފިއެވެ.
ހިތަދޫގައި މުޒަހާރާ ކޮށްފައިވަނީ، ކުޑަކުއްޖަކަށް ޖިންސީ ގޯނާ ކުރި ކަމަށް ބުނާ މީހެއްގެ މައްސަލަ ހުށަހެޅުމުން އޭނާ ހައްޔަރުނުކޮށް ދޫކޮށްލާފައި ހުރުމާއި ގުޅިގެންނެވެ.
މުޒާހަރާ ފުލުހުން ރޫޅާލާފައިވަނީ މިރޭ 8:00 ޖަހައި އެހާކަންހާއިރުއެވެ. ފުލުހުން ވިދާޅުވީ، މިއަދު އައްޑޫގައި ކުރި އިހުތިޖާޖުގައި ފުލުހުންގެ ދައުރު އަދާކުރުމަށް ހުރަސް އެޅުމާއި ގުޅިގެން ބާރުގެ ބޭނުން ކޮށްފައިވާ ކަމަށެވެ. އެގޮތުން އެއްވެ ތިބި މީހުން ދުރަށް ޖެއްސުމަށް ޕެޕާ ސްޕްރޭ ބޭނުންކޮށްފައިވާނެ ކަމަށް ފުލުހުން ވިދާޅުވެއެވެ.
މުޒާހަރާ ރޫޅާލުމުގެ ތެރޭގައި އަނިޔާވި ބައެއް ފަރާތްތަައް ވަނީ އައްޑޫ އެކުއެޓޯރިއަލް ހޮސްޕިޓަލަށް ގެންގޮސް ފަރުވާ ދީފައެވެ. މިމުޒަހާރާ ރޫޅާލި ނަމަވެސް މައްސަލައިގައި ޝާމިލްވާ ފަރާތްހައްޔަރުކުރިކަމެއް މިހާތަނަށް ފުލުހުން ހާމަކޮށްފައެއް ނުވެއެވެ. ނަމަވެސް ދެކުނު ރަށެއްގައި ކުޑަކުއްޖަކަށް ޖިންސީ ގޯނާކުރި މައްސަލައެއް ސައުތު ޕޮލިސް ޑިވިޝަނުން ތަހުޤީޤު ކުރަމުން އަންނަކަން ފުލުހުން ވަނީ ހާމަކޮށްފައެވެ.