މިއަހަރުގެ މަސްވެރިންގެ ދުވަސް ކ.އަތޮޅު ގާފަރުގައި ފާހަގަ ކުރުމަށް ސަރުކާރުން ނިންމަވައިފިއެވެ.
ގާފަރުގައި މަސްވެރިންގެ ދުވަސް ފާހަގަކުރުމަށް ނިންމާފައިވަނީ، ކޯވިޑް-19އާއެކު ޚރަދު ކުޑަ ކުރުމުގެ ގޮތުން މާލެއާ ކައިރި ސަރަހައްދެއްގައި މިދުވަސް ފާހަގަ ކުރުމުގެ ގޮތުންކަމަށް ފިޝަރީޒް މިނިސްޓްރީން ވިދާޅުވެއެވެ. އެހެންކަމުން މިއަހަރު މިދުވަސް ފާހަގަ ކުރުމަށް ކުރިމަތިލުމަށް އެހެން އަހަރުތަކެކޭ އެއްގޮތަށް އިއުލާންކޮށް ހުޅުވާލެވިފައި ނުވާނޭ ކަމަށް މިނިސްޓްރީން ވިދާޅުވެއެވެ.
މިއަހަރު މިދުވަސް ގާފަރުގައި ފާހަގަ ކުރުމަށް ނިންމާފައިވަނީ ގާފަރު ކައުންސިލާ މަޝްވަރާ ކުރެވިގެންކަމަށް ސަރުކާރުން ވަނީ ހާމަކޮށްފައެވެ.
މިދިޔަ އަހަރު ފާހަގަ ކުރި 40ވަނަ މަސްވެރިންގެ ދުވަހުގެ ގިނަ ޙަރަކާތްތައް ބާއްވާފައިވަނީ ވާޗުވަލްކޮށެވެ. އަދި މިދުވަސް މިދިޔަ އަހަރު ވަކިރަށެއްގައި ކުލަގަދަކޮށް ފާހަގަ ކޮށްފައި ނުވެއެވެ.
މަސްވެރިންގެ ދުވަހަކީ ކޮންމެ އަހަރެއްގެ ވެސް ޑިސެމްބަރު މަހުގެ 10ވަނަ ދުވަހެވެ. މިދުވަސް އާންމު ގޮތެއްގައި ވަކި ރަށެއް ކަނޑައަޅައި ކުލަގަދަކޮށް ކޮންމެ އަހަރަކުވެސް ފާހަގަ ކުރެއެވެ.