ފަތުރުވެރިކަމަށް 50 އަހަރު ފުރުމާއި އެއް އަހަރާ ގާތަށް ދިޔައިރު، މިސިނާޢަތް ރާއްޖޭގައި ފަތުރުވެރިކަން ފެށުމަށް އެތައް ބަޔަކު އަގު ނުކުރެވޭނެ އެތަކެއް މަސައްކަތަކެއް ކޮށްދީފައިވެއެވެ. މިސިނާޢަތާއި ގުޅޭ ގޮތުން 1971 ވަނަ އަހަރު ކުރީން، ޔޫއެންޑީޕީގެ ތަޖުރިބާކާރެއް ދިވެހި ސަރުކާރުގައި ބުނެދީފައި އޮތީ ދިވެހި ރާއްޖޭގައި ފަތުރުވެރިކަން ކާމިޔާބު ނުވާނެ ކަމަށެވެ. އޭގެ ސަބަބަކަށްވީ ސިނާޢަތް ފެށުމަށް ބޭނުންވާ ޢުމްރާނީ އެއްވެސް ވަސީލަތެއް ނެތުމެވެ.
ނަމަވެސް ބައިގަރުނާއި ދިމާލަށް ދިވެހި ފަތުރުވެރިކަމުގެ ސިނާޢަތް މިސްރާބު ޖަހާފައިވާއިރު، މިވޭތުވެދިޔަ ދުވަސްތަކުގައި ދިވެހިރާއްޖެ މިވަނީ ފަތުރުވެރިކަމުގައި ދުނިޔޭގެ އެންމެ މަޤްބޫލު މަންޒިލުގެ ޝަރަފު ހޯދާފައެވެ. އަދި އޭގެ އިތުރުންވެސް އެތައް އެވޯޑަކާއި ޝަރަފެއް 49 އަހަރު ތެރޭ ރާއްޖެ ވަނީ ހާސިލުކޮށްފައެވެ.
މިއާއިއެކު ރާޢްޖޭގެ އިޤްތިޞާދު އެއް ސިނާޢަތަކަށް ބަރޯސާވާ ސިނާޢަތަކަށް ފަތުރުވެރިކަން މިވަނީ ވެފައެވެ. އިޤްތިޞާދަށް އަންނަ ކޮންމެ ލޮޅުމަކާއި ފަތުރުވެރިކަން މިވަނީ ގުޅިލާމެހިފައެވެ. މިކަން އެންމެ ބޮޑަށް ހާމަވެގެން ދިޔައީ މުޅި ދުނިޔެ އެކަމަކާއި ކުރިމަތިލާން ޖެހުނު ކޯވިޑް-19ގެ ވަބާގެ ތެރެއިންނެވެ.
ކޯވިޑުގެ ވަބާގެ ތެރެއިން ރާއްޖޭގެ ބޯޑަރު މިދިޔަ އަހަރު މާރިޗުމަހުގެ 27 ވަނަ ދުވަހު ބަނދުވިއިރުވެސް، ކޯވިޑުގެ ސަބަބުން ފަތުރުވެރިންގެ އަދަދުތައް ވަނީ ބޮޑުތަނުން ދަށަށް ގޮސްފައެވެ. އޭރު އަހަރުގެ ފުރަތަމަ ދެމަހު ދޮޅު ލައްކައަށް ވުރެ މަތީގައި ހުރި ފަތުރުވެރިންގެ އަދަދު މާރިޗު މަހު 59،000 އަށް ތިރިވެގެން ދިޔައެވެ. އަދި މާރިޗުމަހުގެ ފަހުކޮޅު ބޯޑަރު ބަނދުވުމާއެކު ރާއްޖެއަށް ފަތުރުވެރިން އައުން އެއްކޮށްހެން ހުއްޓިގެން ދިޔައެވެ.
ބޯޑަރު އަލުން ހުޅުވާލާފައިވަނީ 3 މަސް ފަހުން ޖުލައިމަހުގެ 15 ވަނަ ދުވަހުއެވެ. އޭރު ސަރުކާރުން ބުނެފައިވަނީ ދެވަނަ ފަހަރަށް ރާއްޖޭގެ ބޯޑަރު ބަނދުކުރަން ޖެހޭނެ ކަމަށް ލަފާ ނުކުރެވޭ ކަމަށާއި، ނަމަވެސް ފަތުރުވެރިކަން އިޔާދަވުމަށް ދުވަސްތަކެއް ނަގާނެ ކަމަށެވެ. އަދި ފަތުރުވެރިކަން އިޔާދަ ކުރުމަށް މުހިންމު މާކެޓުތަކުގައި ރާއްޖެ އިސްތިހާރު ކުރުމުގެ މަސައްކަތް ސަރުކާރުން ފެށިއެވެ.
ޤައުމީ ވެކްސިން ޕްރޮގްރާމް މިއަހަރު ފެބްރުއަރީމަހު ފެށިގެން ދިއުމާއިއެކު، ފަތުރުވެރިކަމުގެ ސިނާޢަތް ދެމެހެއްޓުމަށް ސިނާޢާތުގައި ހަރަކާތްތެރިވާ އެންމެން ވެކްސިން ދިނުމުގެ މަސައްކަތް ސަރުކާރުން ފެށިއެވެ. މީގެ އިތުރުން ރާއްޖެ އަންނަ ފަތުރުވެރިންގެ ތެރެއިން ވެކްސިން ފުރިހަމަ ކޮށްފައިވާ ފަތުރުވެރިންނަށް ލުއިތަކެއް ވަނީ ދީފައެވެ.
މިހާތަނަށް ސިނާޢަތުގެ %99 ފުރަތަމަ ޑޯޒް ދީފައިވާއިރު، ދެވަނަ ޑޯޒް %93 މުވައްޒަފުން ވަނީ ފުރިހަމަކޮށްފައެވެ. މިއާއި އެކު އެއް ސިނާޢަތަކަށް ނިސްބަތްވާ އެންމެ ގިނަ މުވައްޒަފުން ވެކްސިން ފުރިހަމަ ކުރި ފުރަތަމަ ސިނާޢަތަށް މިސިނާޢަތް ވާނެއެވެ. މިކަމުންވެސް ރާއްޖޭގެ ފަތުރުވެރިކަމުގެ ސިނާޢަތް ރައްކާތެރިވެފައިވާ މިންވަރު ދުނިޔެއަށް ހާމަވެގެން ދެއެވެ.
މީގެ އިތުރުން ފަތުރުވެރިން އަދަދުތަށްވެސް މިއަހަރު ނިމޭއިރު މިލިއަނަކަށް ވުރެ މަތިވާނެ ކަމަށް މިހާރު ވަނީ ލަފާ ކުރެވިފައެވެ. މިދިޔަ އަހަރު ބޯޑަރުތައް ބަނދުކޮށް އަލުން ހުޅުވުމާއި އައިސްފައިވަނީ 554،494 ފަތުރުވެރިންނެވެ. ނަމަވެސް މިއަހަރު ޖުލައި މަހުގެ މެދުތެރޭ މިއަދަދު ފަހަނަޅާ ގޮސް މިއަހަރު މިހާތަނަށް 840000 އަށްވުރެ ގިނަ ފަތުރުވެރިން ރާއްޖެ މިވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މިހާތަނަށް އައި އަދަދާއި ބަލާއިރު %111 އިތުރުވުމެއް ކަމަށް ޓުއަރިޒަމް މިނސްޓްރީން ވިދާޅުވެއެވެ.
މީގެ އިތުރުން އަންނަ އަހަރު ރާއްޖޭގެ ފަތުރުވެރިކަން އެންމެ ރަނގަޅުވެގެންދާ ހާލަތުގައި ރާއްޖެއަށް 1.4 މިލިއަން ފަތުރުވެރިން އަންނާނެ ކަމަށް ދާދިފަހުން އެމްއެމްއޭއިން ކުރި ދިރާސާއަކުން ވަނީ ދައްކާފައެވެ. ނަމަވެސް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ލަފާ ކުރައްވާ ގޮތުގައި ފަތުރުވެރިކަމުގެ ރަން 50 ވަނަ އަހަރު، ރާއްޖެއަށް ދެމިލިއަން ފަތުރުވެރިން ނުވަތަ 13.5 މިލިއަން ބެޑްނައިޓްސް ލިބޭނެއެވެ.
އެހެން ކަމުން ރާއްޖޭގެ ފަތުރުވެރިކަމުގެ ސިނާއަތަށް ބައިގަރުނު ވެގެން ދާއިރު ދުވަހުން ދުވަހަށް ރާއްޖޭގެ މަޤްބޫލުކަން ދަނީ އިތުރުވަމުންނެވެ. މިކަން ފަތުރުވެރިންގެ އަދަދުތަކުން ސާފުވެއެވެ. ރާއްޖެ މިވަނީ ރައްކާތެރި މަންޒިލެއްގެ ގޮތުގައި ދުނިޔެ ބަލައިގަނެފައެވެ.
މިސިނާޢަތް ފުޅާކުރުމަށް ރާއްޖެ މިއޮތީ ފުރިހަމައަށް ތައްޔާރު ވެފައެވެ. މިހާރު ހުރި ޕްރޮޑަކްޓަތައް ކަމަށްވާ ރިސޯޓު، ހޮޓެލް، ގެސްޓް ހައުސް އަދި ލިވަބޯޑުގެ އިތުރުން އަލަށް ތަޢާރަފު ކުރުމަށް މަސައްކަތް ކުރަމުންދާ ހޯމްސްޓޭ ފަތުރުވެރިކަމާއެކު މިސިނާޢަތަށް ކުރިއަށްވެސް އޮތީ ކާމިޔާބު ދުވަސްތަކެކެވެ.