އޮންލައިން ވިޔަފާރިކުރާ އެމެޒޯންއަށް ވަގުތީ މުވައްޒަފުން ހޯދުމުގައި ހުރި ދަތިތަކަށް ހައްލެއް ހޯދުމަށް މުސާރައިގެ އިތުރަށް ބޯނަސް ފައިސާ ދިނުމަށް ނިންމައިފިއެވެ.
އެމެޒޯންއިން މިހާރުވަނީ އެކުންފުނީގެ އިނގިރޭސިވިލާތުގެ އޮޕަރޭޝަންތަކަށް ވަގުތީ 20000 މުވައްޒަފުން ހޯދުމަށް އިޢުލާންކޮށްފައެވެ. މުވައްޒަފުން ލިބުމުގައި ދަތިތަކާއި ކުރިމަތިލާން ޖެހިފައިވާތީ، ބޯނަސް އެއް ދިނުމުގެ އިތުރަށް ރޭގަނޑު ޑިއުޓީ އަދާކުރާ މުވައްޒަފުންނަށްވެސް އިތުުރު ފައިސާ ދިނުމަށް އެމެޒޯންއިންވަނީ ނިންމާފައެވެ. ވަގުތީ މުވައްޒަފުންނަށް މުސާރައިގެ ގޮތުގައި ދިނުމަށް ހަމަޖެހިފައިވަނީ ގަޑިއަށް 10 ޕައުންޑެވެ. އިނގިރޭސިވިލާތުގެ ބައެއް ހިސާބުތަކުގައި ގަޑިއިރަކަށް 11.10 ޕައުންޑު ދިނުމަށްވެސް ވަނީ ނިންމާފައެވެ.
ކުރިއަށް އޮތް ދެމަސް ދުވަހަކީ އެމެޒޯންއަށް އެންމެ ޑިމާންޑު ބޮޑު ދުވަސްވަރެވެ. އެހެން ނަމަވެސް މުވައްޒަފުން ހޯދުމުގައި ހުރި ދަތިތަކާއި އެކު ގަޑިއަށް ތަކެތި ޑެލިވަރ ކުރުމާއި، ވިޔަފާރީގެ އެކި ދާއިރާތަކުން އެމެޒޯންއަށް ދަނީ ގެއްލުންވަމުންނެވެ.
އެމެޒޯންއިން ދާދިފަހުންވަނީ ކުންފުނީގެ ފަށާ މުސާރައިގެގޮތުގައި މަސައްކަތްކުރާ ކޮންމެ ގަޑިއިރަކަށް 18 ޑޮލަރު ދިނުމަށް ނިންމާފައެވެ. މިއާއިއެކު ކުންފުނީގެ އެމެރިކާގެ ގުދަންތަކަށާއި ދަތުރުފަތުރުގެ މަސައްކަތަށް އިތުރު 125000 މުވައްޒަފުން ނެގުމަށް ނިންމާފައިވާކަމަށްވެސް އެމެޒޯންއިން ބުނެއެވެ.
މިދުވަސްކޮޅު ވަޒީފާގެ ބާޒާރުގައި މުވައްޒަފުން ލިބުން ދަތިކަމާއި ހުރެ މުވައްޒަފުން ޝައުޤުވެރި ކުރުވުމުގެ ގޮތުން ގިނަ ކުންފުނިތަކަކުން ވަނީ ތަފާތު އެކި ކަހަލަ އިނާޔަތްތައް މުވައްޒަފުންނަށް ހުށަހަޅާފައެވެ.