ލަންކާ މައްތަލަ އެއާޕޯޓުން ރާއްޖެއަށް ޝެޑިއުލް ދަތުރުތަކެއް ފެށުމަށް ސްރީލަންކަން އެއާލައިންސްއިން ތައްޔާރުވެއްޖެއެވެ.
މިހަފްތާގެ ބުރާސްފަތިދުވަހު ފެށުމަށް ހަމަޖެހިފައިވާ މިދަތުރުތަކުގެ އަގު ސްރީލަންކަން އެއާލައިންސްގެ ރާއްޖޭގެ ޖެނެރަލް ސޭލްސް އޭޖެންޓް އޭސް އެވިއޭޝަނުން ވަނީ ހާމަކޮށްފައެވެ. މައްތަލަ އެއާޕޯޓާއި ރާއްޖެއާ ދެމެދު ކުރާ ސީދާ ދަތުރުތަކުގެ އަގަކީ މީހަކަށް 307 ޑޮލަރެވެ. ކޮލަމްބޯ މަގުން ދަތުރު ކުރާނަމަ، 401 ޑޮލަރެވެ.
މިދަތުރުތައް ސްރީލަންކަންއިން ފަށަން ތައްޔާރުވަމުންދާއިރު ލަންކާ ސަރުކާރުން ދަނީ ބަނޑަރަނައިކަ އިންޓަނޭޝަނަލް އެއާޕޯޓަށް ބާރު ކުޑަ ކުރުމަށް ގިނަ މަސައްކަތްތަކެއް ކުރަމުންނެވެ.
ލަންކާގެ ދެކުނު ސަރަހައްދުގައި އޮންނަ މައްތަލަ އިންޓަނޭޝަނަލް އެއަރޕޯޓަށް ސްރީލަންކަން ދަތުތަކެއް ފަށާއިރު ޤައުމީ އެއާލައިން މޯލްޑިވިއަންއިންވެސް މިދިޔަ އަހަރު ފަހުކޮޅު ޝެޑިއުލް ދަތުރުތަކެއް މިއެއާޕޯޓަށް ކުރިއެވެ.
ލަންކާގެ މައްތަލަ ރާޖަޕަކްސަ އިންޓަނޭޝަނަލް އެއާޕޯޓުގެ އިތުރުން ރަތުމަލާނާ އިންޓަނޭޝަނަލް އެއާޕޯޓުންވެސް ރާއްޖެއަށް ދަތުރު ފަށާނެކަމަށް ލަންކާ ސަރުކާރުން ވަނީ ހާމަކޮށްފައެވެ.